4
Apu Nabucodonosor detsemeagbau
1 Nuna dutika pujus, apu Nabucodonosor chichaak: “Wika ashí aents maki makichik chichamtin, ditash nugkentin aina duka shiig agkan maanitsuk, ajak aidaun ajakmawag shiig atsumkas batsamsatnume tusan wakegajai.
2 Apajuí nigki ashí wagakua nunú shiig pegkeg aidaun mina iwaintugka nunú atumesh dekatajum tusan wakegajai.
3 ¡Yaunchkesh dekashtai aidaun Apajuí iwainamua duka, shiig pegkeg makichkish ejemaitsui! Nii inabaujiya duka ajumaish tuke atinai, tuja niina senchijiya dushakam makichkish nagkankashtinai.
4 “Witjai Nabucodonosor, wika apu asan, makichkish atsumkas mina pujusa inamtaijui shiig aneasan pujuyajai.
5 Imanisan pujukman, kashi kajanum ishamainun kajamjabiajai. Nuna anentaimtusan senchi ishabiajai.
6 Nuniakun, nunash wajukatnunak aan kajamjaja, nuna ujatkatnume tusan, aents anentaimsa dekamtan yacha aidau ashí ikautjuatajum tiabiajai.
7 Tusa ti ai, tunchi aidaun, anentaimas dekamin aidaun, yaya dekapau aidaun ikaunmawagmatai, wi kajamjamujun ujakajabiajai, tujash makichkish duka nuniktin aan kajamjaume tusag ujatkachagmayi.
8 Nunik ujatkachagmatai pujai Daniel taawabi. Wi niina daajinak yapagtuan mina apajuíjun eme anentsan Beltsasar adaikamiajai. Wika Danielnak Apajuí pegkegma nuna Wakani jintintui tajai. Niina wi kajamjamujun ujaakun:
9 “ ‘Beltsasarah, amek juju aents yacha aidau ijuna nuna nagkaesau yachaitme. Apajuí pegkegma nuna Wakani aminí puja nunak wika dekajai, nuadui amek shiig dekamainchau aidaush ashí dekame. Nuadui wi kajamjamujun amina ujaktatjam nunú antukam wajukatnunak aan kajamjaja ujatkata’, tiabiajai.
10 “Nuna tusan wi kajamjamujun ujaakun:
“ ‘Kajanmash nugka múunta nuna ejapeen
numi múun jiitkau wajame.
11 Nunú numia duka
shiig muuntan tsakaja nayaimpin antiime,
iman asamtai ashí nugkanmaya aidaush wainiagmae.
12 Nunú numi dukeg pegkeg samekbauwe,
tuja shiig kuashat nejeku asamtai,
nuna ashí chigki aidauk yuwagmae,
tuja kuntin aidauk nuna wajauti bikintunum
batsamas ayamiagmae,
untsu kanawe aidaunum chigki aidau pasugmagmae,
ashí nugkanum iwaku batsamin aidauk nuwiyan
yuwa batsamae.
13 “ ‘Nuna dii wajakman pachiachbau makichik ángel kuitamkagtin nayaimpinmaya akagun wainkamjai.
14 Nunú senchi untsumak chichaak:
“ ‘ “¡Au numia duka ajaka ajuatajum!
Dutikajum kanawe tsupijatajum,
dukeshkam utsankatajum,
neje aidaushkam akagjum utsankatajum.
Tuja kuntin aidau nuna wakenti bikintunum batsata
duka pisagtinme,
pishak aidau kanawen pasugmaina dushakam
shiyaktinme.
15 Untsu wajautiya duka tegainigpajum,
ayatak cadena hierro najanamui,
bronce najanamujai jigkagjum,
ajanum dupa ayaunum ukuktajum.
Dutikam jegashik uchupiam asati.
Nuniak kuntin aidaujai jimagtuk chijichin yuwati.
16 Nunú numi anentaimtajig yapajinati,
nunikmatai kuntinjai betek wajasti.
Nunisag pujus siete mijanan ejeti”, timae.
17 Aatus Apajuín aentsji ángel aidau
suwimkan susatnuwe.
Nunak dutikatnuwe, wagki Apajuí nigki
ashí wagakua nunuwai apu aidaun inauk,
tuja apu atinnashkam nii wakegamun etegkeawai,
aikasag makichik nugka apuji atinnash
aents aidaunmayan imanchauchin etegka
apu emawai tusa aents aidaun
nuna iwaintuktag tusa dutikmae’.
18 “Juna wi amina ujajam nuna kajamjamjai. Nunikan yacha aidaun ujatkatajum tijai, tujash ujatkachaje. Tujash wika amina Beltsasara niimpap ujatkattawa tajai, wagki aminig Apajuí pegkegma nuna Wakani pujawai, tibaijai.
19 “Tusa ti ai Danielak kuashat anentaimat minitbau asa, puyatak chichatsuk ekemayi. Nuniakui wi niina tikich daajin untsukan chichagkun:
“ ‘Beltsasarah, wi kajamjamua duka puyatjukaipa, tuja nunash wajukatnunak aan kajamjaja dushakam puyatjukaipa, ayatak ujatkata’, tibaijai.
“Tusa tai nii chichagtak: ‘¡Chah apuh, utugsag ame kajamjaum nunú ashí shiwag aidauwai uminka tajai!
20 Numi múun shiig esagman tsakaju asamtai, ashí nugkanmaya aidaush wainaidau,
21-22 tuja nuna dukeg pegkeg samekbau, tuja shiig kuashat nejeku asamtai, ashí nugkanmaya aidauk nuwiyan yuwawag batsatu, tuja kuntin aidauk nuna wajauti bikintunum batsamas ayamaidau, chigki aidaush nuna kanawen pasugmaidau kajamjaum duka, ame ashí tikich aidaush nagkaesau wajasum nunú kajanum wainmamkaume. Tuja amina imanjumea duka nayaimpinash antigke. Nuigtush ame inabaugminak ashí nugkanum dekainawai’.
23 “Tuja nuigtushkam Apajuí aentsji nayaimpinmaya kuitamkagtin minis chichaak: ‘Au numia duka ajaka ajuajum tsaiktajum, untsu wajautjiya duka tegainigpajum, ayatak cadena hierro najanamui bronce najanamujai jigkagjum ajanum dupa ayaunum ukuktajum. Dutikam jegashik uchupiam asati. Nuwi kuntin aidaujai ijuntug chijichin yuwati’, tusa tau kajanum wainkaume.
24 Auk duka Apajuí nigki ashí wagakua nunú amina suwimkan amastatus umigtamka nunú aan kajamjaume.
25 Amek aents aidaujai ijunjamek pujuschattame, kuntin aidaujai ijunjam pujustatme, nuniakum ditajai betek dupa yutatme. Amek jegashik uchupiam tepettame, nunika pujusam siete mijan ejetatme. Nuwi pujusam dekas Apajuí nigki ashí wagakua nunuwap apu aidaunak inawa, tuja nii wakegamujinap apu atinnash etegkeawa tusam anentaimat jukittame.
26 “Numi ajakbauwa duka wajautijai ukuktajum tusa tau kajanum antukum duka, dekas Apajuíyapi ashí senchigtinuk tusam anentai jukittam duwi ataktu apu wajastatam nunú aan kajamjaume.
27 Nuadui wi yamai titatjam nunú antukta: Pegkegchau takatak idaisata, nunikam shiig takakum ujudauch aidau yaigta. Nunú dutikakum shiig aneasam agkan pujakum shiig atsumkas pujuschainpash”, tiuwai.
28 Aatus Daniel apu Nabucodonosoran ujakua duka imanisag ashí uminkauwai.
29 Makichik mijan nagkaemakiu ai apu nii pujusa inamtaijin niimak wekagu.
30 Nunik wekagu untsumak chichaak: “¡Atumesh Babilonia shiig múunta nunú diistajum! ¡Aunak wi awi pujusa inamjatnujun ibau pegkejan umikuitjai! ¡Nuigtush mina senchijun ashí aents tikich nugkanmaya aidaun iwaintuktasan imatikan umikuitjai!” tau.
31 Tusa eke chichaak wajai nayaimpinmaya chichau antuekauwai, nunú niina chichajak: “Apuh, amek yamai nagkamsamek apu achattame.
32 Amek aents aidaujai ijunjamek pujuschattame, kuntin aidaujai ijunja pujusam ditajai betek dupa yusa pujusam siete mijan ejetatme. Nuwi pujusam dekas Apajuí ashí senchigtina nunuwap apu aidaunak inawa, tuja nii wakegamujinap apu atinnash etegkeawa tusam anentaimat jukittame”, tiuwai.
33 Nuna tusa inagnaig duka imanisag uminkauwai. Nuadui Nabucodonosor niina pujusa inamtaijin pujaun jiiki jukiag baka batsatbaunum ejegan ukukiajui. Dutikam nuwi pujus bakajai betek chijichin yuu pujau. Nuwi pujus jegashkijug pujau, tuja intashishkam águilan ujejai betek, nanchikish águilan nanchikijai betek muuntan tsakapak pujau.
Nabucodonosor detsemeag pujamun tsagagbau
34 “Wi suwimkan juki waitiamu tsawan amuekamtai, wi Nabucodonosor nayaimpin diismaijai, nunikan detsemeajujai betek waitu pujamujun tsagagbaijai. Nunikan Apajuí nigki ashí wagaku tuke pujuuwa nuna emematkun:
“ ‘Apajuí senchijiya duka
nagkankashtin atakesh tuke atinai,
niina inamtaijiya dushakam tuke imanuk atinai.
35 Apajuí emtinig aents aidauk tikima wainkaush ainawai.
Apajuík nayaimpinmash, nugkanmash
nii wajuk wakegawa nuna umiawai.
Apajuíjai ainik tudaimainuk atsawai, nuigtush
¿wagka aikame? tusa tumainkesh atsawai’, tibaijai.
36 “Tusa Apajuín emematin nagkanmawaik, detsemeaja pujamugnak pegkeg wajasmaijai, nunikan ataktu inamtan nagkamabiajai. Nunika ai chichamnum mina yaintujaku aidau tikich aents apu aidaujai ashí kautjuawagmayi. Nunik kaunawagmatai, ditajai ijunjan yaunchuk aajakbaujun nagkaesau wajasmaijai.
37 “Nuadui wika Apajuí nayaimpin apujiya nuna emematjai, wagki nii takamujiya duka betek shiig pegkeja nuadui. Aents emebauwa nunak Apajuí inatsawai. Wika apu Nabucodonosoraitjai. Wi nunak dekas tajai.”