7
Apajuí Danielan kajanum iwaintukbau
Belsasar Babilonia apuji wajasa makichik mijan inamak pujai, Daniel kashi kajanum kajamjauwai, nunik shintaag nii kajamjamujin agajui. Tuja duka aatus tawai:
“Kajanum nayaimpinmaya dase ashí yantamnum dasentuk nayantsan iyantug senchi tsukatmitkabi. Imaniamunmaya pachiachbau ipak usumat kuntin múun maki makichik niimtin aidau jiiniagmayi. Yama nagkamchak jiiniuwa duka leónjai betekmamtinayi, tujash nanapeg ukukuin nanapejai betekayi. Nuna dii wajai nanapen japiki ichinkagmayi, dutikawag inantainiag aentsjai betek awajainiagmayi, dutikawag aentsu anentaimtajijai betek awajsagmayi.
“Untsu tikich kuntinuk chayujai betekayi, niina pagae juinia yantame ima wagakuyi. Tuja kampatum ukunch pagae aidaun apaakuyi, nuna chichajuinak: ‘¡Wetá, nunikam neje ame wakegamu shiig kuashat yuwata!’ tiagmayi.
“Tuja tikich kuntinuk kaichjai betekayi. Nunú kuntinuk chigki nanapejai betek tuntupen ipak usumat nanape ajibi, tuja buukeshkam ipak usumta imaniyi. Niina senchimtikawagmayi, aents aidaun apuji wajas inamjati tusa.
“Untsu tikich kuntinun kajamjabiag duka yama nagkamchakun kampatum kuntinun kajamjabiag nuna nagkaesau shiig tsumain, ishamain, senchigtin, diez kachugtinayi. Iman asa naísh jiju hierro tsakaskatu etsakamu asamtai, nii wainbaunak ashí amubi, dutikak ampinunak najak tsaika ukubi.
“Nunú kuntinu kachuji diez asamtai, nuna dii wajai pachiachbau tikich kachuji piipich ukuunum jiinmayi. Nunikmatai, nunú nigki agkan wajasti tusa kachuji múun aidaun kampatum ukuitkagmayi. Tuja kachu yama tsapainiuwa nuna jiig aentsdaujai betekayi, chichaakush ememas chichabi.
 
“Nuniakui dii wajai, apu ekemsa inamtai aidaun
jukiag apusagmayi,
nuwi makichik apu múun ekemsabi.
Nuna jáanchjig yujagkim shiig pujua imanayi,
intashishkam lana pujua imanayi.
Tuja ekemtaijiya nuna ruedajig jii kegaujai betek
tsawan wajas amayi.
10 Tuja nii eketbaun emtinia jii kegau betsaka akaemayi.
Nunú muunnak aents shiig kuashat emematiagmayi.
Nuninai tikich aents aidau nuni kuashat
makichkish dekapamainchau,
jegantag ijuniagmayi.
Nuninai nunú múun dita takasbaujin diijus
suwimkan susatatus papii aidaun ujakmayi.
 
11 “Nuna kuntinun kachuji yamajam tsapainiuwa nunú ememas chichaakui dii wajabiajai, nuniai nunú kuntinun maawagmayi, dutikawag tsupijag jii kegaunum chimpiawagmayi. 12 Nuna dutikawag tikich kuntin aidaunashkam kakaagchamin awajsagmayi, dutikau ainayatak mautsuk tsawanji jegagti tusag ukukiagmayi.
13 “Nuna wika kajanum ashí diyakun wajabiajai.
 
“Nuniai pachiachbau, yujagminum pachitkau
makichik aentsjai betek akagun wainkabiajai.
Nunik akaiki nunú múun eketbaunum jeganmayi.
14 Nunikmatai niina dekas
tikich aidaun nagkaesau apu emabi,
dutikamtai aents ashí nugkanmaya maki makichik
chichamtin aidau niina umijuinak emematiagmayi.
Niina senchijig imanisag atinai,
tuja inamtaijishkam makichkish megkaekashtinai.
 
15 “Nuna imanun wainkan senchi ishamkabiajai, nunikan puyatkan jamaijai. 16 Nuniakun aents tuwaka ijunbaunum jegantan, makichik iniakun: ‘Aunash wagka imaninawa nunú minash ujatkata’ tibaijai. Tusa tai ayu tujutmayi. Tusa chichagtak: 17 ‘Juju ipak usumta imajin kuntin múun aina duka ipak usumat apu aidau ashí nugkanum inamjagtina nunuwai. 18 Tujash nunú nagkaemakmatai, Apajuí aents aidaun etegkauwa nunú atakea duish tuke inamjatnai’, tusa ujatkabi.
19 “Tusa ujatkamtai shiig dekatag tau asan, kuntin inagnamu ipak usumta nunú tikich aidaujaig betekchau tsumain, nai aidaush hierro, nanchikish bronce, nii wainbaunak ashí yuwa amuka, ampinunak najak tsaika ukua aush wagkag ibauwaita, 20 tuja nuigtush diez kachugtina dusha, tuja kachuji uchuchiji yama tsapainiuwa nunú jiinna dusha wagkag annaita, tuja nuigtush chichaakush ememas chichau, tuja kachuji yamajam tsapainiuwa nunú piipichitak tikich kachuji múun aidaun nagkaesau, nunú tsapatai kampatum kachuji ukuiniaja nunash, wagkag ankae nuna dekatasan iniasbaijai. 21 Tuja nuigtushkam, nunú kachu yama tsapainiuwa nunú Apajuín aentsji aidaujai maania ditan depeteaun wainkabiajai. 22 Imatika pujujai nunú múun taabi, nunik Apajuí ashí senchigtinu aentsji aidaun ayamjuk agkanmitkabi. Nunak Apajuí ashí senchigtinun aentsji aidau apu wajasag inamjagtin tsawan jegau asamtai nunak dutikatnai.
23 “Dutika chichaak:
 
“ ‘Kuntin inagnamu
ipak usumta nunú kuntin wainkaum duka,
apu ipak usumta nunú
ashí nugkanum inamjatna nunuwai,
duka tikich aidaujaig betekchau atinai.
Ashí nugkanmaya aidaunak yuwa amuak,
tikich aidaunak najak tsaika ukubi.
24 Untsu diez kachujiya duka,
nunú tsawantin diez apu aidau inamjagtina nunuwai.
Nunú nagkaemakmatai, yama nagkamchak
apu aajaku aidaun nagkaesau tikich apu wajastinai,
nunik diez apu aidaunmayan kampatum depetuk maatnai.
25 Nunú apuk Apajuí pegkegma nuna
pegkegchau chichagtinai.
Nuniak Apajuí aentsji aidaujai maanitnai.
Tuja Apajuí chichame umiktin agagbauwa nunashkam,
Apajuí emematku ijuntai tsawan etegjamu aidaunashkam
yapajiatag titinai.
Nuniak Apajuí aentsji aidaunak kampatum mijan
nuigtu jimaituk nii wagagki waitka pujugtinai.
26 Tujash nunú apua duka apu chichaman inagdau aidau
utugchatjin ejetim suwimkan jukitnai,
nunik ajumaish apu achatnun tuke megkaekatnai.
27 Nunikmatai Apajuí ashí senchigtina nuna
aentsji aidau apu wajasag
nugkanmaya apu aidaunak ashí inagtinai.
Dutikamtai dita aidau niina chichamen
umijuinak emematiagtinai.
Tuja nii inabaujig atakea duish tuke atinai.’
 
28 “Juna augmattsag nunuwai wi kajanum wainkamua duka. Nuna kajamjan puyatkan shiigchau yampia wajasmaijai, tujash nuna pachisnukesh tikichnak makichkish ujakchabiajai”, tiuwai Daniel.