34
Israel aents aidaun apuji pegkegchau aajaku aidau
1 Nuigtu Tuke Pujuu chichagtak:
2 “Aentsu uchijiyah, Israel aents aidaun apuji aina nunú juna apu Tuke Pujuu tawai: ¡Chah, apu Israel aents aidaun uwigjai betek kuitamin aina nunak wait anentuinajai! ¡Dita aidauk nunú uwijan shiig kuitamtsuk ima ditanunak anenmama batsatui!
3 Atumek uwija muntsuji ijugbau umagme, tuja nuna uje najanamush nugkuagme, nuigtush uwig duwejam aidau maagme; dutikayatkujum uwig aidauk kuitamtsugme.
4 “Atumek uwig kakakchau aidaush kuitamtsugme, tuja jakuishkam ampiatsjume, nawen kuwimjukmataish pempenjagmesh kuitamtsugme, tuja wagakmataish ejakjumek ataktu awakeatsjume, tuja megkaekamtaish egatsjume, duka dutiktsuk ayatak asutiakjum senchi waitkagme.
5 Mina uwig aidauk kuitamain atsugsam, ditak batsatu asa pisaja megkaejae, nunik wainak yujaun kuntin kajen aidau yuwinawai.
6 Uwig aidauk ashí muja aidaunum tuja nain aidaunum pisaje, nuninak ashí nugkan pampamtuk megkaejae, nunik megkaejamtaish, nuna egaka awakjatatus puyatjauk makichkish atsawai.
7 “¡Uwija kuitamin aidauwah, wi taja nunú shiig antuktajum!
8 Mina uwig aidaun kuitamainuk atsau asamtai, kuntin ikamia kajen aidau amuke. Uwija kuitamkagtinun adaijamu aidauk uwignak kuitamainatsui. Ditak anenmamainak uwig aidaunak pachikchaje. Witjai apu Tuke Pujuunuk, nunak dekaskenum tajai.
9 Nuadui wi chichaman tajim nunú uwija kuitamin aidautijum shiig antuktajum:
10 Uwija kuitamin aidauwah, wika yamaik atumnak shiwagmajime, mina uwig aidau kuitamkatajum tiuwaitjim dusha betekash umikujum nuna dekajuattajime. Dutikakun mina uwig aidaun apuji ainajum nunak jiiktatjime. Nunak dutikattajime ima atumek anenmamkujum mina uwig aidau yuu batsamijum tusan. Dutikan mina uwig aina nunak ataktu yajuakan ijumjattajai, tawai tusam ujakta.”
Uwijan shiig kuitamin
11 “Tuja mina uwig aidaunak tikich kuitamkatnume tusanuk idaisashtatjai, ima wiki kuitamkattajai. Witjai apu Tuke Pujuunuk, nunak dekas dutikattajai.
12 Aents uwigji megkaejamtai puyatjuwama imatiksan mina uwig aidaunak puyatjittajai, nuadui yujagkim suwe wajasmatai ishamainak pisaja megkaeja nunak ataktu yajuakan ikaunmattajai.
13 Tikich nugkanum achija yajuakbau batsata nuna ataktu awakjan, dita nugke ashí batsamtukbauwa nuwi ikaunmattajai. Dutikan dita nugken muja aidau, entsa aidau ayá nuwi ashí yajuaka iwajan chijichi pegkeg aidaun ayujawagtatjai.
14 Israel aents aidau nugken muja aina nuwi yajuakan iwagtatjai, nuwiya dupa shiig pegkeg aina nuna yuwatnume tusan. Dutika ai nuwiyan pegkeg dupa aidaun shiig yuwawag ayamjagtatui.
15 Wi dita yuwatnunak susattajai, dutikakun ayamtiksagtatjai. Nunak dekas wi umiktinjun tajai.
16 Uwig megkaeja nuna egakan tikich jintanum yujaunash yajuaka ikaunman nawen ichiinkau akuish, shiig dijajan ijijuan kuitamkattajai, tuja duwejam wajiu aidaunash kuitamkattajai, dutikakun kakaakchau aidaunashkam shiig kuitamkattajai.
17 “Atum mina uwig aidautigmin wi tajim nunú antuktajum: Atum ainajum anuiyag uwig múun, tuja uwig tsakatuch, uwig kakaakchau, uwig wajiu, tuja chivokesh akuishkam ashí betek ijumsan kuitamkattajai.
18 Atum ainajum anuiya chijichi pegkejan yuwinakush shiijak aneenatsui, ayatak tikich chijichi ayaunash najak tsaika ukuinawai. Yumi pegkejan saawin umuinawai, nuninayatak tikich saawi wajas aunak wajatug ukusmak ukuinawai.
19 Mina uwig kakaakchau aidauk atum chijichi najakbaun yuwawagtatui, tuja yuminashkam atum ukusmakbaun uwajagtatui.
20 Nuadui wi juna tajime: Wika aents wajiunash kakakchaujai betek diisan suwimkan susattajai. Nunak dekas dutikatnujun tajai.
21 Atum wajiu aidautijum uwig kakakchau aidau depetkajum kachugmin ijua ijuakuajum tupikamtikjume.
22 Tujash mina uwig aina nunak wi ayamjukagtatjai. Ataktu kasajuinak waitkastinme tusanuk idaisashtatjai. Mina uwig aina nuwish yakita shiig takaush, tuja shiig takachush nunak wi diistatjai.
23 Mina inakeg David mina umigtujakua nunú uwijan kuitamkati tusan ataktu untsuktatjai.
24 Witjai Tuke Pujuunuk. Wi dita Apajuíji atatjai, untsu dita apujig David atatui. Witjai Tuke Pujuunuk, nunak dekas uminkatnun tajai.
25 Agkan pujusagtinme tusan wi ditajai chichaman umiktatjai. Tuja kuntin ikamia kajen aina nunak yaja ishiaktatjai, dutika ai mina uwig aidau agkan batsamsatnume, nuninak ikamash agkan kanitnume tusan.
26 “Mina uwig aidaunak midau muja pegkegma nuna yantamen batsastatjai, tuja ditanak wi yaigtatjai, dutikakun yuminashkam nunú tsawantin yutugti tibaunak imatiksanuk yutumtijattajai.
27 Numi aidaush nejeagtinai, tuja ajakmamash shiig tsapai kuashat nejetnai, nuadui ditak dita nugken shiig batsamsagtinai. Mina aentsug aidaun waitkaina nuna suwimkan suwakun agkanmitkawaja ai, wi dita Apajuíjiyaitag nuna shiig dekawagtinai.
28 Aents Israel wegantuchu tikich nugkanmaya aidauk, Israel aents aidaunak ataktu dita inataiji emakag waitkaschagtinai. Tuja kuntin kajen aidaukesh ditanak yuwachagtinai. Nuadui ditak makichkish ishamkagtutsuk agkan shiig batsamsagtinai.
29 Dita nugkenak pegkeg, ajak aidaush shiig tsapau awajsattajai. Nuadui ditak nujantaik waittsachagtinai, tuja tikich nugkanmaya aidaush ataktu awagkiajag dushikjachagtinai, wagki shiig batsatu asagmatai.
30 Nuadui wi Tuke Pujuu, dita Apajuíjin ditajai pujag nuna dekawagtinai. Witjai apu Tuke Pujuunuk, nunak dekas tajai.
31 Atumek mina uwijujai betek ainagme. Witjai atumin Apajuígminuk”, tiuwai Tuke Pujuu.