17
Yumi kayanmaya jiikbau
(Nm. 20.1-13)
Israel aents aidau uwejush Sin tutainum batsatu ashí jiinag diipas jintá kanui kanuinakua Tuke Pujuu chichamen antujus Refidim nugkanum jegawag aakmajag batsamsajui. Tujash yumi dita umumainuk atsujakui. Nuadui Moisésan jegajuawag chichajuinak:
“¡Yumi sukagtusta uwajagmi!” tusa imatjuidau.
Tusa imatjam Moisés ditan chichajak:
“¿Wagka minash segatjume? ¿Wagka Tuke Pujuu senchigtuchua nunin chichagkugmesh ekajeagme?” tau.
Tujash Israel aents aidauk senchi kitamaidau asag Moisésan kajejuk chichajuinak:
“¿Wagka Egipto batsamsatnume tutsukesh jiijatjamiume? ¿Uchiji aidaujaí, tagkuji aidaujaí kitakai jinaati tusamek jiijatjamium?” wajaidau.
Imatiagtai Moisés Tuke Pujuun segaak:
“¿Utugkattaja juju aents imatjutuina nunash? ¡Jukea akug kayai tuku tukujuinakua mantuawagtatui!” tau.
Tama Tuke Pujuu Moisésan ayaak:
“Israel aents aidau ashí yajuaka weakum ditá apuji múun aina nunú ujumak jukim emka wetá. Nuniakum ame namak awatiuwaitam nunú ushujutaijum jukita. Tuja wika muja Horebnum* kaya awa nuwi dakastatjame, nuwi taam ¡nunú kaya awatta! dutikamin yumi jiinkittawai. Nunikmatai ashí aents aidau uwagtinme”, tiuwai.
Tusa tima Moisés Israel aentsu apuji múun aidau wainainamunum kayan awatiuwai. Tuja Israel aents aidau yumi atsutai Tuke Pujuu emtin kajekag Moisésan pegkegchaun chichagkaju asagmatai, nuna nugka daajin adaikauwai “Meribá”. Tuja nuigtushkam adaikauwai “Masá”. Nunak Israel aents aidau chichainak: ¿Dekas Tuke Pujuush jutijaish pujawash? tusag utujimkaju asagmatai tuu adaikauwai.
Israel aents aidau Amalec aents aidaujai maaniamu
Israel aents Refidim batsatun Amalec aents aidau ditajai maaniawagtatus shimutkajui. Nuniagtai Moisés Josuén chichajak:
“¡Aents aidau etegjam Amalec aents aidaujai kashin maaniata! Nuniamin wi mujanum wakan ushujutain Apajuí sujusbauwa nuna takusan pujuttajai”, tiuwai.
10 Tusa tima nuna betek umiak, Amalec aents aidaujai maaniatatus jiintukiuwai. Nuniai Moisés, Aarón, nuigtu Hur aatus muja titijin wakajui. 11 Nuwi waka batsamas Moisés uwejen yakí takutai, Israel aents aidauk Amalec aents aidaun depetuidau, untsu uwejen awaktai, Amalec aents aidau Israel aents aidaun depetuinau. 12 Moisés niina kuntuji yawetai awakeau asamtai, kaya jukiag apujtusam nuwi ekemsauwai. Nunikmatai Aarón, Hurjai Moisésa kuntujin mai takujiag emetjuawajui. Dutikam nunisag pujai, etsashkam akaikiuwai. 13 Nuadui Josué niina aentsji aidaujai Amalec aents aidaun depetuk amukui.
14 Dutikamtai Tuke Pujuu Moisésan chichajak:
“¡Juju maaniamua juu pachisam papiinum agagta, ajumaish kajimatkishtin ati! Tuja Josué ujakta, Amalec aents aina nunak wi ashí ijinan emegkagtatjai”, tiuwai.
15 Tusa tima Moisés nuwi kaya yajuak ijumag altaran najana nuna daajin “Tuke Pujuu Nisi” adaikauwai. Nunak “Tuke Pujuuwai, bandera jiikbaujai betekmamtin depetmata sukagtinuk” taku tawai. 16 Nuna tusa:
“¡Tuke Pujuuwa nuna depetmataig jutiyai awai, nuadui Tuke Pujuu Amalec aents aidaunak ijinattawai, dutikak ditá uchiji wegantu aidaunashkam ijinatnai!” tiuwai Moisés.
* 17:6 Muja “Horeb” tawa nunak muja “Sinaín” taku tawai. 17:7 “Meribá” tawa duka hebreo chichamnumak “chichamjukbau” taku tawai. 17:7 “Masá” tawa duka hebreo chichamnumak “utujimkamu” taku tawai.