3
Oseasa nuwe ekagbau aajakua nujai pachisa augmattsamu
1 Tuke Pujuu ataktu chichagtak:
“Oseasah, amina nuwemek wainak takamin asa,
amina kumpagmijai pakijina pujawai.
Nunin aigkish kajegtsuk ataktu aneeta.
Tuja Israel aents aidaushkam dakumka najanamu aidaun ataktu waketjukiag emematuinak
anentag torta susamu aidaun yuu batsatui.
Nunin ainaig wika ditanak aneajai”, tujutmayi.
2 Tusa tujutmatai, mina duwajun awagkitasan niina pakijin quince kuichik plata najanamun akikmaijai, dutikan nuigtu cebadan trescientos treinta kilo susabiajai.
3 Dutikan mina duwajun chichagkun:
“Yamaik mina duwag wajasu asam,
pegkegchau takamtsuk pujusta.
Nuniakminig wishakam pegkegchaunak takamjuschattagme.
Untsu ujumak tsawan tsanigkaik kanagchattaji”, tibaijai.
4 Numamtuk Israel aents aidauk kuashat tsawan apugtuchu batsamsagtinai, tuja Apajuínash anenjakesh susachagtinai, Apajuísh ditanash wajina dutikatnume tusag wakegawa nunakesh dekachagtinai, tuja sacerdote aidaush atsutnai, dita jenish dakumka najanamu emematmainuk makichkish atsutnai.
5 Nunú nagkaemakmatai Israel aents aidauk awake anentaimjag Tuke Pujuuwai ataktu waketjagtinai. Nunikag nunú tsawan umintai, ataktu Tuke Pujuun eme anentus umijuinak, nii yaimpakti tusag segagtinai. Nuninak dita apuji Davitan ataktu egakagtinai.