32
Makichik aents apu wajas pegkegnum inamjatin
1 Makichik aents apu atinai
pegkegnak inamjatin,
tuja nuna atuwe aidaushkam
shiig takasagtin ainawai.
2 Aents aidauk shiwag jeteamash,
tuja utugchatnum jegainakush,
tuja pegkegchau takainak waitkainamash,
nunú apu aidau shiig takaidau asagmatai,
ditai yunumak ayamjumaktin ainawai.
3 Nuadui Israel aents aidauk
wainmachu wainmamaina numamtuk
Apajuínak pan wainkagtinai.
Nuninak Apajuí chichamesh wajintua
nuna puyatjus antuktatus wakeyagtinai.
4 Nuadui waugtutsuk emamkemas takasagtatui,
nuninak dekaskea nuna shiig antumainun chichagtatui.
5 Aents pegkegchau, tsanumin aina duka
eme anentsa diyam achagtinai.
6 Wagki aents pegkegchauwa duka
ima pegkegchaunak chichawai;
tuja niina anentainish ayatak pegkegchau takatnak anentaimui;
nuniak magkagtuta nuna wekaetawai,
tuja Apajuínash tsanumjuinak pegkegchaun
chichajuinawai;
nunidau asag aents nujantai waitiaunash,
tuja kitakai waitiaunashkam ajampenatsui.
7 Aents waitjin aina nuna ayamjumataijig ishamainai;
tuja pegkegchau takastinun niina anentain umiawai;
Nunin asag ujudauch aidau chichamjumak,
ayamjumamainchaunak tsanumjug,
apunum sujuk waitkainawai.
8 Untsu aents pegkeg aidauk tikichnash yaigtatus wakenai,
nuadui niina pegkegjinig shiig anentam atinai.
Jerusalégnumia nuwa aidau chichagkamu
9 Atum nuwa daki batsamtin
puyatmamchau aidautijum,
wi titatjim nunú antuktajum.
10 Atumek yamaik puyatmamtsugme,
tujash kuashat tsawan atsuk, yumain atsakui,
tuja uva juuka yumainkesh atsakui,
makichik mijan nuigtu ewaekajum waitiakjum kujaittagme.
11 Nuwa aidautijum puyatmamtsuk
shiig aneasa batsatutigmek puyatakjum kujaitajum;
tuja atum pachimakas pujautigmek sapigmakjum kujaitajum.
Nuniakjum jáanch pegkeg
nugkuagjum duka awika ukuakjum,
wake besemag pujaku nugkutai nugkugtajum.
12 Atumdau trigo ajakbau, uva ajakbau aidaujai
shiig kuashat pegkeg ayá
duka imankek achattawai.
Nuadui wake besemag dekapeakjum
detsepem ijutajum.
13 Mina nugkag múunta nuwig jagki aidau
ashí tsapak akijuattawai,
tuja jega pegkejuch aidau yaaktanum ayá nuwi batsamsajum,
shiig anee batsatjum duka ashí tsaikam megkaejattawai.
14 Tuja apu pujusa inamtaijishkam ukukim
itajak juwaktatui;
yaakat muunchakam ukukim agkan juwaktatui.
Tuja kumpin jiikbau aidaushkam,
yaakat tentea peejamu aidaush, ashí ukukim agkan juwagtatui.
Nunikmatai ikamia burro aidau,
baka aidau nuwi batsamsagtinai.
15 Tujash Apajuí ashí waji aidaun
najankauwa nuna senchiji ataktu tajutjamattawai,
nuniak uwegshunak nugka pegkeg
ajak ajakmamain awajsattawai,
untsu nugka pegkeja duka yaunchuk aajakua
nuna nagkaesau shiig pegkeg wajastatui.
16 Nunikmatai juju nugka múunta juwig
ashí yantamnum pegkeja duke takamu atatui.
17 Tuja pegkeg takamua nunuwai atakesh maanitsuk agkan,
kajinmamsa pujutan sukagta duka.
18 Nuadui mina aentsug aidauk waitkascham
agkan dita jeen puyatkas shiig batsamsagtinai.
19 Bicha kakegak ikaman ijinau akuish,
tuja yaakat tsaikbau akuish,
20 ¡atumek yumi ayaunum ajakmajum,
nunú yuwakjum pujustinaitjume,
tuja burro aidaush, baka aidaush
chijichi ayaun yuwinak agkan batsatkui,
shiig aneasjum pujustinaitjume!