41
Israel aents aidaunak wi agkanmitkatnaitjai tusa Apajuí tibau
1 Apajuí chichaak:
“Yaakat múun nayantsanum ijus ayá nuwi
batsamin aidautijum takamtak pujusjum antugtuktajum.
Tuja nugka muunnum batsamin aidautigmesh
ishamkagtutsuk kaunatajum.
Nunikagmin atumesh shiijash batsatjum nunú ijunja dekaami.
Nunika atumesh wajukatagmeki
nunú chicham umikmi.
2 Etsa minitaiya nuwiya apu
tuke depetma nunash ¿ya dutiknaita?
Anú apu tikich nugkanmaya aidaun depetuk
ijinatnume tusan umiaunuk witjai.
Nuadui nunú apu suntaji aidau, puyagjai,
nagkijai aatus shaa dekeaja tsaitiama numamtuk
tsaikag ijinatnume,
dutikawag chijichi kagakun dase umpui dapampaak
utsauwama numamtuk emegkagtinme tusan idaijai.
Dutikakun dita apuji aidaushkam suntaji amutam
sapijin ditai yunumjatnume tusan idaijai.
3 Shiwaajin pataetakush ishamain atsaunum,
agkan shiig wamak nanaakas shimatai tumain
shimitnume tusash ¿ya dutiknaita?
4 Witjai nuna dutikaunuk.
Yama nagkamchakun nugkan nayaimpijai
najanawaitag duwi nagkamsan,
yaunchuk waji nagkaemajua nunak,
tuja yamai nagkaema nunashkam,
wi dutiknaitjai.
Witjai Tuke Pujuu dekas Apajuínuk.
5 Wi dutikamunak yaakat nayantsanum
ijus batsamin aidauk wainin ainawai.
Nuna wainainak senchi sapigmainawai.
Nugkashkam ashí yantamnum uujui.
Aents tikich nugkanmaya aidau ijunjagtatus
ashí kaunawag mininawai.
6 “Maki makichik aents dakumak najanin aidauk
niina kumpajinak ima niinakek idaitsui,
yayawai dutikak anentain ichichtawai.
7 Dakumak najanin aina duka patakumtain,
nugkutain orojai najanin aina nuna chichajuinak:
‘Pegkeg najanme, idaitsuk takasta’, tuinawai.
Tuja martillowai takau aidauk,
jiju awatug ikag najanin aidaun chichajuinak:
‘Achija umikum duka pegkejai’, tuinawai.
Nuna tusag dakumka najanamu iyajai tusag
clavowai achiawag ukuinawai.”
8 Apajuí chichaak:
“Jacob wegantu Israel aents aidauwah, antuktajum:
Atumek mina inakeg, wi etejamu ainagme.
Atumek mina kumpag Abraham aajakua
nunú wegantu ainagme.
9 Tuja tikich nugkanum achija yajuakam
atushat batsatutigmin wi agkanmitkauwaitjime,
dutikan mina takagtustajum tusan chichagkun:
‘Atumek mina inakeg ainagme’, tiuwaitjime.
Wi atumnak etegkauwaitjime,
nuadui atumnak dakitjankesh idaisachjime.
10 Ishamkagtukaigpa, wi atumjaig pujajai.
Ishamkagtukaigpa, witjai atumi Apajuíjinuk.
Wi atumnak senchimtikajime,
wi atumnak yayajime,
mina uweg senchigtin depetmauwa duwi
ayamjukan kuitamjime.
11 “Amina kajegtamin aidaunak, wi inatsaktinaitjai.
Dutika ai ememamujinak kajimatkiagtinai.
Atumjai maanidaushkam ashí ijinawajam megkaejattawai.
12 Nunik megkaejamtai, wainkatasajum
egakjumesh wainkashtinaitjume,
wagki amejai maaniatag tinu aidauk
ashí amukam megkaejatnai.
13 Tujash aminak wi achiakjame.
Wi atumin chichagkun: ‘Ishamkagtukaigpa,
wi atumnak yayajime’ tiuwaitjime”, tawai Apajuí.
14 Tuja Apajuí ataktu awagki chichaak:
“Jacob wegantu Israel aents aidautigmek,
piipich kakakchau ainakjumesh,
ishamkagtukaigpa, wi atumnak yayajime.
Witjai Israel aents aidau Apajuíji pegkegmanuk,
wi atumnak agkanmitkauwaitjime.
15 Antuktajum nijah: Atum ainajum anuiyan,
makichik trigo akatain yamagman,
naín batsatkan najanattajai.
Dutikamtai nujai muja aidau tsaikam
yukukuntu awajsattagme.
Tuja nain aina dushakam tsaiktatjume,
dutikawagmin chijichi kagaku tuwasua weaku atatui.
16 Nunú yakí takui nagkimjumin, dase umpui utsagtinai.
Tuja trigo akagbau, dukee utsankam
wampuji juwakun dase shiig senchi dasentak
utsauwama numamtuk,
atumi shiwaajum aidaun dapampaak utsagtatui.
Dutikamtai Israel aents aidaun Apajuíji
pegkegma nuwi shiig aneasam pujuttame,
nuniakum ima niyaig eme anenmamtatme.
17 “Aents ujudauch kuichkigtinchau,
wajigtuchu wekagas yumi egá egakua
wainkacha kitamak umumain atsujam,
suweuchijin jujug wekaetatui.
Tujash wi niinak yaigtinaitjai,
witjai Tuke Pujuu Israel aents aidau Apajuíjinuk,
nuadui ditanak kajimatkinuk idaisashtinaitjai.
18 Muja uwegshunum entsa ayau awajsatnaitjai,
tuja nugka ségaju paka aidaunmashkam
yumi pukuni kuashat jiiniagtinai.
Nuadui yumi kuashat ayau asamtai,
dupa shiig tsapak aama iman uwegshunak emaktatjai.
19 Uwegshunmak setug aidaun,
numi acacia aidaun, arrayan aidaun,
nuigtu olivo aidaun tsapapitkatnaitjai;
untsu nugka bukunum, numi pino aidaun,
abeto aidaun, nuigtu cipre aidaun tsapapitkatnaitjai.
20 Nuna ashí aents aidau wainkatnume,
nuninak puyatjus unuimagtinme,
wi Tuke Pujuun mina senchigjai dutikag nuna.
Witjai Israel aents aidaun Apajuíji pegkegmanuk,
wi nunak najanauwaitjai”, tiuwai.
Apajuí tikich apajuímtai aidaun atsaneamu
21 Jacob wegantu Israel aents aidaun Apajuíji chichaak:
“Apajuímtai dakumka najanamu aidautijum kaunajum,
chichamjumaktajum, nuniakjum atumi takatjum ayamjuktajum.
22 Kaunatajum,
nunikjum atakea duwi atin etsegkatajum,
dutikakjum yaunchuk waji nagkaemajua nunú
shiig ujajatkatajum, iish shiig antukagmi
atakea duish wajig nagkaemagtinaita nunú,
tuja dusha dekas uminkatpash nunú diismi.
23 Atakea duish waji nagkaemagtatua nunú tukagtitajum.
Atum dekas Apajuíyaitkugmek nunú iwainaktajum.
¡Atum dutikmain pegkeg aidau,
tuja pegkegchaukesh,
nuniachkush ishamain iina uwaktamain
aidaukesh iwainaktajum!
24 ¡Atumek shiig wainkauch ainagme,
nuadui makichkish iwainamaitsugme!
¡Atumin kajintsa anentaimauwa duka
pegkegchau shiig wainkayai!
25 “Makichik aentsun etsa minitaiya nuwiyan jiikjai,
dutikan niina daajin untsuka ai nujinmanini minawai.
Nunú aentsua nunú tikich apu aidaunak tsakus
najamaina numamtuk najaktatui,
tuja ichinka najanin duwen nawen najama
numamtuk najak ukuktatui.
26 Junak emtikan eke nagkaematsaig wi ashí ujajime.
Dakumka najanamu apajuímtai aina duka
wi etsejag nunak, wi taatsaigkik yaunchkek
makichkish etsegchau ainawai;
Dita chichamuk makichkish antugchatayai.
27 Junak makichkish etsegchatain wi Jerusalégnumia aidaun ujakuitjai.
Tuja aents achija yajuakbau tikich nugkanum batsata duka,
dukap atsuk waketjattawai tusa etsegkatnun
wi makichik aentsun akatjan Jerusalén awemajai.
28 Ashí diyajai, tujash makichik apajuímtai
dakumka najanamukesh wantintsui;
chichaman etsegmainkesh makichkish wantintsui.
Tuja wi ditan iniasagmag nuna aigmainkesh
makichkish wantintsui.
29 ¡Ditak shiig wainak ainawai!
Dita dutikmainuk makichkish atsawai.
Ditak dakumka najanamu waa ainawai.”