45
Ciro takastinun Apajuí takatan susau
Tuke Pujuu Ciron apu adayak,
aents tikich nugka múun aidaunum
apu senchigtin batsata nuna depetuk,
maanitaiji aidaunak atanjati tusa yayaak,
egkesa awekajakui.
Tuja yaakat peeja apakbau aina nunash
tujintsuk utua shiwag aidaun ijinati tawai.
Nuadui Apajuí niina chichajak:
“Ame weamunmak wi emkan wetatjai,
tuja muja aidaunak yumpuajan paka emaktatjai,
waiti jiju bronce najanamu aina nunak tsaiktatjai,
tuja jiju hierro waiti batsatkamua nunashkam tsaiktatjai.
Tuja waji pegkeg aidau
makichkish wainmainchau uukbau awa nuna,
wi amastatjai.
Nunú wainkam, Tuke Pujuu Israel aents aidau
Apajuíjinuk ima wikitag nunú dekattame.
Wi aminak untsukmajame.
Israel aents Jacob wegantu aidau,
mina inakeg aina nunú aneamunum,
amek minak dekagtsuminig wi aminak etegkamjame,
dutikan apu emamjame tikich apu aina nuna
nagkaesau ati tusan, nuadui aents aidaush
ame tabaun antugtamkagtatui.
Witjai Tuke Pujuunuk,
tikich mina nagkaetasuk atsawai,
amek minak dekagtsuminig wi aminak
kuitamkattajame depetmakti tusan.
Ashí tikich nugkanum batsamin aidaush
tikich Apajuí mina nagkaetasuk atsa nuna
dekaatnume tau asan nunak dutikattajai.
Witjai Tuke Pujuunuk, tikich mina
nagkaetasuk makichkish atsawai.
Witjai tsaaptinun suwejai najanaunuk,
tsawan pegkeg atinnash,
tsawan pegkegchau atinnashkam,
ashí nunak wi dutikajai.”
Apajuí ashí senchigtin
“Ashí nugkanmaya aidauk
ima pegkeg takat aina nunak takagtatui,
duka Tuke Pujuu jegashik nayaimpinmayan
akakea numamtuk atatui.
Aatus aents aidau pegkejan takainak uwemtan jukiagtinai.”
Pinig duwe juki najanamua duka,
aentsjai betekak, niina najanauwa nuna chichagkug:
“Amek najantak dekatsme” tusag jiyanimaitsui,
tuja tsakusai pegkejan dakumak najannunak: “¿Waji takame?” tusag tsakusak iniatsui.
10 Tuja uchi yama akiinauwa duka
niina apajinak dukujijaig: “¿Wagka minash akiintuabiugme?”
tusag jiyamaitsui.
11 Apajuí pegkejam, Tuke Pujuu, Israel aents aidaun
najanauwa nunú chichaak:
“Atumek minak makichkish inatmain ainatsjume,
mina aentsug aidaunash wisha itugkatnaitja
nuna ujatkati tusagmek wakemaitsugme,
tuja wi dutikamujua dushakam jutik dutikata
tusagmek jintinjumain ainatsjume.
12 Wi nugkanak najanan,
nuwi aents aidaun batsasuitjai,
tuja nayaimpinash múun agkajun najanan,
nuwi agkajunum etsanjatin aidaun najankauwaitjai.
13 Wi apu Cironak etegkajai,
dutikau asan wi niinak Jerusalén mina yaaktajua nuna
ataktu jegamag yaaktamkati tusan yaigtatjai.
Nuadui Israel aents aidau achija yajuakam
Babilonia nugkanum batsata nuna jiigtatui,
dutika jiija agkanmitkakush, akikmaktajum tusag
makichkish kuichkinak segashtatui”,
tusa Tuke Pujuu ashí senchigtina nunú juna aatus tawai.
14 Tuke Pujuu Israel aents aidaun chichajak:
“Egiptunmaya aents ajakan ajakbau,
tuja etiopíanmaya aents waji sujin aidau,
Sabá aents esajam aina dushakam,
ashí ditak ima atum tabaunak umigtabiagtatui.
Ditak atumi wainka inaku waitkatai agtatui.
Imanik waituinak atumi emtin tikishmag pujusag
chichainak:
‘Dekas Apajuík ima atumjaig pujawai,
tikich Apajuík makichkish atsawai.’
15 Amek dekas wainmainchauwaitme,
tuja ametme Israel aents aidau ayamjukam uwemtiknumek.
16 Wainka apajuímtai aidaun dakumak najanin aina duka datsagkag
wainak juwakagtatui.
17 Tuja Israel aents aina nunak
Tuke Pujuu tuke batsamsatnun uwemtijatnai.
Nuadui ditak wainka inaku waitkatai,
dushiktaig achagtinai.”
 
18 Tuke Pujuu Apajuí nayaimpin, nugkan najana,
juwi aents aidau batsamsatnume tusa
umikua nunú chichaak:
“Witjai Tuke Pujuunuk, tikichik makichkish atsawai.
19 Wika aents aidau antachbaunum suwenum uumka
pujusnuk chichatsjai.
Tuja Israel aents aidaun susashtinaitkunuk,
segattajum amastajime tusanuk anagkuatsjai.
Wika Apajuí dekasken pegkejan chichauwaitjai.”
Wainka apajuímtai aidaun atsaneak Tuke Pujuu chichakbau
20 “Ashí nugkanum batsatutijum
juwi kaunajum ijunjajum, antuktajum.
Atumek anentainkachu ainajume, wainka
apajuímtai numi dakumka najanamu makichkish
atumin uwemtijamainchau emematjume.
21 Tuja wainka apajuímtai dakumka najanamu
emematjum dusha pegkejash aniajum nunú
pempeentunikjum ininistajum.
¿Yaita juju waji aidau nagkaemagtinun pachis emtika etsegkaush?
Makichik aentskesh juju waji nagkaemaina nuna pachis etsegkauk atsawai.
Witjai Tuke Pujuuk juju waji nagkaemaina juniktinun yaunchuk emtikan etsegkaunuk.
Tikich Apajuí mina nagkaetasuk makichkish atsawai.
Apajuí pegkejam uwemtikagtinuk tikichik atsawai.
 
22 “Tikich nugkanum atushat batsatutigmesh
minai minitajum, wi uwemtan amastajime,
witjai Apajuínuk tikich mina nagkaetasuk atsawai.
23 Wika dekas umiktinjun tumamjai,
mina shiwag aina nunak ijinatnaitjai,
duka dekas imanisag uminkatnai.
Tuja mina emtijui aents aidauk
tikishmag batsamsag emematjuinak:
‘Dekas ametme jutii Apajuíjimek’, tujutiagtin ainawai.
24 Tusa chichainak:
‘Pegkeg takata duka ima Tuke Pujuuwaig awai,
tuja ima nigki senchigtinuk’ tujutiagtinai.
Aents mina chichamjun umitan dakitujaku aina duka
datsagkag wainak juwakagtinai.
25 Ashí Israel aents aidauk wi yayamu asag,
minak umigtuinak ima pegkeg takata nunak takagtinai”,
tawai Tuke Pujuu, tiuwai Isaías.