52
Jerusalégnumia aents aidaunak agkanmitkattajai tusa Apajuí tibau
1 Jerusalégnumia aidautijum aneaku niimkau pujustajum,
Jerusalén yaakat pegkegma nuwi batsatutigmek wajiu wajastajum,
nuniakjum shiig iwagmamkatajum,
wagki Apajuín umigchau aents pegkegchau aina duka
ataktu awagkig atumnak jetepakchagtatui.
2 Jerusalégnumia aidautijum
nugká pushugkajum batsatjum duka,
datsaamtsuk wajakjum jáanchjum pegakjum yantsaptuktajum,
nunikjum apu niina inamtaijin ekemaina numamtuk ekemsatajum.
Tuja datsauch aidautigmesh, achija yajuakam
batsabaijum nunisjumek yamaikish batsamtsuk,
agkanmagatajum.
3 Tuja Apajuí chichaak:
“Atumin achipag yajupakajua nunak minak akigkachu ainawai.
Nuadui wishakam atumin awakeaknuk makichkish akikmakchattajai.
4 Yaunchuk mina aentsug aidau Egipto nugkanum shiyakag
nugkenchau inaku waitkatai batsamajaku ainawai.
Tuja tikich tsawantinchakam makichkish
utugchatji atsujunak asirianmaya aents aidau
senchi waitkasaju ainawai.
5 Tujash yamaish ¿wagka imatikash waitkainawah?
Mina aentsug aina nunak utugchatji atsujunak
Babilonia nugkanum yajuakaje.
Dutikawag nuna apuji aidau waitkainak
ememas chichainak kashi kashinig kajemtijuinawai.
6 Tujash tsawan jegattawai,
mina aentsug aidau mina shiig waitkagtina nunú.
Nunik waitkag adeajagtinai, wi ditan chichagkun:
‘Witjai apunuk’ tiuwaitag nuna”, tiuwai Apajuí.
7 Aents mujanmaya akaiki wekagas yamajam chichaman
agkanmaetan uwemtajai pachis etsejak wekagas,
Jerusalégnumia aents aidaun chichajak:
“Atumin Apajuíjiyai dekas apuk”,
tusa etseja duka shiig anentam auwai.
8 Atumi suntajum jinta niimin aidau
Tuke Pujuu Jerusalégnum wakitki midaun wainkag
shiig aneenak untsumaina nunú ¡antuktajum!
9 ¡Jerusalégnumia aidauwah,
Tuke Pujuu niina aentsji aidaun wait anentug
Jerusalégnashkam agkanmitka duwi
nii eme anentsajum kantamtai shiig aneasjum
senchi kantamatajum!
10 Ashí aents tikich nugkanmaya aidaush
wainainamunum Tuke Pujuu niina senchijin iwainake.
Tuja Apajuí iina uwemtijamja nunak ashí nugkanum dekawagtinai.
11 ¡Babilonia nugkanum batsatjum duka
jiinjajum ukuktajum!
¡Tuja Tuke Pujuu jeen takastin waji aidau
ikaunmatnutigmek kuitamamkatajum,
pegkegchau takasaigpa!
12 Tujash wainkajum waugtukaigpa,
tuja uumkagmekesh tupikakigpa,
atumi aintamuk atsawai.
Tuke Pujuu, Israelan Apajuíjiya nunú atumnak
kuitamjamainawai.
Tuke Pujuun inakeg waitiakush nii yayasam depetmawai
13 Mina inakjuk ashí depetmaktinai,
nuadui tikich aidaun nagkaesau eme anentam atinai.
14 Kuashat aents aidau niina yapin diigsag puyatkagtinai,
wagki yapi emestujam aents niimtinchau
wajasu asamtai.
15 Tuja aents tikich nugkanmaya aidaushkam
senchi puyatkagtinai.
Tuja apu aidauk nuna wainkag makichkish chichakchagtinai,
wagki nunak yaunchkesh antushtain antuinak,
waintanashkam wainaidau asag.