65
Apajuín shiwagbaunak nii suwimkan suwawai
1 Apajuí chichaak:
“Aents makichkish mina segatchau aajabia
nunú mina kautjuinawai;
tuja aents mina egatkachu aajabia nunú
yamai mina waituinawai.
Mina emematjuchu aajabia nuna chichagkun:
‘Juwi pujajai’, tibaijai.
2 Aents intimkiu aidau
wijai shiwagmagainak,
dita wakegamun pegkegchaun taka yujau aina
nunú segatainakui yaigtasan tuke dakabiajai.
3 Nunú aents aidauk mina igkuntuawag
tuke inastuinawai.
Dita aidauk apajuímtai dakumka najanamun
emematuinak,
kuntinu maawag ikam yujasag, kaya pataja
najanamunum nuwi patainiag apé yujau aajabi.
Nuigtushkam ladrillo najanamunum kugkuin incienson
apé yujau ainawai.
4 Nunú aents aidauk ukumatainum pekamá yujayanume,
nuninak waanum uumak batsamas tsawampa
batsamianume.
Nunú aents aidauk Apajuí dakitamun
kuchi nejen yuyanume,
nuigtush dakumkamu emematku kuntin
maamu aidau painkamun yumiji ollanmak tsumain aajabi.
5 Nunú aents aidau chichainak:
‘Antijatkaigpa iik Apajuí etegjamu asa
pegkejam ainaji’, tuinawai.
Nunú aents aina duka jii tuke,
tsawantai keeka aama numamtin ainawai.
Jii bukuituji dujin amajama
numamtuk minak waitkajuinawai”, tiuwai.
Nayaim yamajam nugka yamagmajai
17 Apajuí chichaak:
“Antuktajum nijah, wi yamajam nayaimpin,
nugka yamagmajai najanattajai.
Tuja yama nagkamchak nayaim
nugkajai aajakua nunak kajimatkiagtinai.
Makichkish nunak tuke adeagchagtinai.
18 Wi nuna yamagman najanatin asamtai,
ajumaish tuké shiig aneastin atajum.
Wi yamajam Jerusalégkan shiig pegkejan
najanattajai;
dutikamtai nuwi aents aidauk shiig aneasag batsamsagtinai.
19 Tuja wishakam Jerusalégkan diisan
shiig aneastatjai;
nuniakun mina aentsug aina nuwishkam
shiig aneastatjai.
Jerusalégnumak jaku buutbaush atsutnai.
20 Nunú nugkanmak uchi akiina jaka megkaguk atsutnai,
tuja múunchishkam tsawanjin shiig ejetsuk
jauk atsutnai.
Tuja makichik aentskesh cien mijan ajamu jauk
múuntuch achatnai, datsauch atinai.
Tuja cien mijanan ejetsu duka suwimak asamtai nuniktinai.
21 Aents aidauk nunú yaaktanum jegamag batsamas,
trigon, uvan ajakmakag nuna nejen juukag yuwagtinai.
22 Dita jegamkamunmak tikich
akiinag batsamsachagtinai,
tuja dita ajakmamujinash atankiajag yujuachagtinai.
Mina aentsug aidauk numijai betek
kuashat tsawan iwaku pujusagtinai;
Wi etejamu aina duka dita takasbaujinian
jukiag shiig batsamsagtinai.
23 Dita aidauk Apajuí pegkegnum yumigjamu asag
wainak takainakug waittsachagtinai,
tuja dita uchiji aidaushkam
tsawan jegatsaigkik jakachagtinai.
Nunú uchi aidau wegantu aidaushkam
ditajai betek pegkegnum yumigjamu agtinai.
24 Eke dita untsujuinatsaig,
wiyá ditanak aiktinaitjai;
tuja eke chichakag ashimainatsaig,
wiyá ditanak antugkatnaitjai.
25 Lobo uwig tsakatjai jimagtuk yuwawagtinai.
Leónkak bueyejai betek chijichin yutinai.
Untsu dapi nugka yukukuntun yutinai.
Tuke Pujuu chichaak:
‘Jerusalégnumak tikichin pegkegchau awagbauk
makichkish atsutnai’ ”, tiuwai.