18
Elías wakitki apu Acab pujamunum jegamu
1 Kampatum mijan nagkaemakiu ai, makichik tsawantai Tuke Pujuu Elíasan chichajak: “¡Yumin yutumtijattajai, dutikatin asamtai apu Acab pujamunum wetá!” tiuwai.
2 Tusa tima Elías weuwai. Nunik apu Acab pujamunum jegauwai. Tuja nunú tsawantinig yaakat samarianmaya aidauk yumain atsau asamtai, shiig senchi nujantai waituidau.
3 Imanik waituidau asag Elíasak eke jegatsaig, Acab niina wajiji aidaun kuitamin Abdías Tuke Pujuun eme anentus emematujakua nuna untsukui.
4 Tuja nunú tsawantin Jezabel Tuke Pujuu aentsji profeta aina nunú kajegtajum tusa suntag aidaun inajui. Dutiktai Abdías cien profeta Apajuí takajin aidaun ijumjauwai. Dutika cincuenta, cincuenta akanak jimag waanum uumkatajum tusa ishiakui. Dutika ishiakam imau uumak batsatun yujumkan ejetua ayujujakui.
5 Tuja Abdías apu Acab pujamunum jegamtai, nii chichajak:
“Juju nugkanum entsa aidau, namak aidau ayá nuni wemi. Nunika nuwi wekaesa namputchawame caballo aidau, burro aidau ayugmain chijichi atsawash egakmi. Dutika egachkuik kuntin jinaamtai tagkugtuchu juwaktatji”, tiuwai.
6 Nuna tusag, nunú nugkanum dita yujastag tibaunum shiyakajui. Tuja Acab tikich yantamnum wetai, untsu Abdías tikich yantamnum weuwai.
7 Nunik wekama Elías minaujai Abdías igkunikui. Nunik niina emtin tsuntsuma pujus chichajak:
“¡Mina Apujuh! ¿Ame Elíaschaukaitam?” tau.
8 Tama nii ayaak:
“Ehe, witjai. Weme amina apujum Acab, Elías tae tusam ujakta”, tiuwai.
9 Tusa tama Abdías ayaak:
“Wi apu Acabpan jegajua ujaig, minak mantumainai.
10 Apu Acab amina egapak ashí nugkanum aents ishiakbau aidau yujawai. Dutikamu waketug kaunawag wainkachji tusa ujainam, dekas wainkachuitkumek Tuke Pujuu daajin tajai tita tusa imatjawai. Nunak ame Tuke Pujuu Apajuí ame emematnaitam nuna daajin dekaskenum tajame.
11 ¿Imania nunash wi jegajuan Elías juwi pujawai tusan ujaktag?
12 Wi apu ujaktasan amejai pujag nuna ukukin wegai, Apajuí Wakani egkemtugmag wi dekashbaunum etamtatui. Tuja wi Acabpan ujaka ai, nii amina waipaktakama waipakchag mina mantumainai. Wi amina inakmetag nunak datsauch asanuk Tuke Pujuun umignaitjai.
13 Tuja Jezabel profeta aidaun kajegtag takui, wi ayamjukuitag duka ¿amek dekachukaitam? Tusa chichaman umikmatai, wi profeta aidaun cien ijumjan, cincuenta cincuenta akankan jimag waanum utsawabiajai. Dutikan nuwi batsatun yutain suyajai.
14 Nunin aish ¿wagka yamaish minash, apujum wejim Elías juwi pujawai tusa ujakta tusamesh tujutme? Atsa amina waipakcha maati tusa ¿tujuttsumek?” tiuwai.
15 Tutai Elías ayaak: “Tuke Pujuu Apajuí ashí senchigtina nuna daajin tajame. Yamaikiuch apu Acabjai chichastasan wetatjai”, tiuwai.
16 Tusa tima Abdías Acabpan ujaktatus weuwai. Dutika ujakam Acab Elíasjai igkunik chichastatus weuwai.
17 Nunik jegaa Elíasan chichajak:
“¿Amekaitam Israel aents aidau utugchat apugtusam waitkam nunú?” tiuwai.
18 Tusa tama nii ayaak:
“Wika Israel aents aidaunak utugchatan apujtusnuk waitkatsjai. Auk ame amina pataim aidaujai Tuke Pujuu chichame umiktajum tibauwa nunú idaikujum, Baal emematu yujau asajum, Israel aents aidauk waitkagme.
19 Untsu takumek ashí Israel aents aidau, Baala chichamen etsejin cuatrocientos aidau, nuigtu Astarté chichamen etsejin cuatrocientos aatus aina nuna Jezabel ayuju pujuja nunú muja Carmelo tutaya nuwi ashí ijunjatnume tusam tita”, tiuwai.
Elías Baala profetaji aidaujai
20 Tusa tima Acab ashí Israel aents aidaun Baala profetaji aidaujai muja Carmelonum ijumjauwai.
21 Dutikamtai Elías ashí tuwaka ijunbaunum jeganta ditan chichajak:
“¿Atumesh ima Apajuík umigchau jimag anentaintin ainajum dusha wajutiya yapajinattagme? Wi Tuke Pujuun umijag nunú dekas Apajuíyaitkuig nii umigkatajum. Untsu dekas Baal Apajuíyaitkuig nii umigkatajum”, tiuwai. Tusa tamash aents aidauk makichkish aimtsuk ijunu.
22 Nuna tusa ataktu awagki chichaak:
“Tuke Pujuu chichamen etsegtin iwakuk ima wikiuchitjai. Untsu Baala profetaji aina duka cuatrocientos cincuenta ainawai.
23 Tuja jimag toro tsakat sukagtustajum, nuna dita makichik etegka jukiag maa asajag jii ikapagtin ijumjamunum patagtinme. Tujash eke jiinak ekemakainmegka. Dutikawagmatai wishakam tikich toro tsakatan asajan jii ikapagtin ijumjamunum patagtajai, tuja wishakam jiinak ikapagchattajai.
24 Nunú ashí uminkamtai atum aidautijum atumi apajuíji untsuktajum. Tuja wishakam Tuke Pujuun untsuktajai. Tusa untsuam nuna antujuk jii kegaun ajuag ekemaktata nunú dekas atatui Apajuíya duka”, tiuwai.
25 Nuna tusa Elías Baala chichamen etsejin aidaun chichajak:
“Atumek kuashat ainajum nuadui jimag toro tsakat puja nunú diisjum etegka jukijum atumea umiktajum. Dutikajum atumi apajuíjum untsuktajum. Tujash eke jii ijumjamua duka ekemakaigpa”, tiuwai.
26 Tusa tima, betek umikajui. Dutika umikag kashikmas nagkamas Baalan untsú batsatu. Imatuinak: “¡Apawa Baala aijatkata!” tusag kuntin patasa apetainum nuna tentea ijunas peepet tsekenau. Tujash makichkish ayachu.
27 Imaniagtai etsa tutupit ai, Elías ditan tuke aneas dushikiak: “Senchi untsumkatajum, auk dekas niyai apajuík. Tsawanji atsugmas aigmatsutai. Nuniachkush wakenmas wematai. Atsa nuniachkush tikich nugkanmas wematai. ¡Namputchawame kanag shintachu asa aniatsuash, ishintagtajum!” tau.
28 Tuja ditak tuke untsuma batsatu. Imatuidau asag, dita apajuíjin emematuinakug tuke nunin asag, kuchiyai tsupimakag numpak wajasag batsatu.
29 Etsa tajiag tegamtaishkam, imaanjaujai betek tsekenak untsuma batsatu. Imani batsataig kuntin apeatin tsawan jegauwai. Tujash imatuidaun ayauk makichkish antukachui. Wagki ditan aimainuk makichkish atsau asa.
30 Nunikmatai Elías ashí aents aidaun chichajak: “Wi wajag juwi kaunatajum”, tiuwai.
Tusa tima ashí jegantajui. Nunikagmatai Tuke Pujuu emematku kuntin maa patasa apetai yaunchuk najanamu aajaku tsaikbaun ataktu iwajauwai.
31 Nuna najankug Apajuí Jacopan Israel atatme tiuwa nuna uchiji doce aajakua imatiksag doce kaya aidaun yajuakui.
32 Dutika nunú kaya aidaun ekenag Apajuí emematku kuntin patasa apeatnun najanauwai. Dutika, nuna tentea tainiuwai veinte kilo trigo chimpimainun.
33 Dutika nuwi chigkimi patag nuadui toro tsakatan asaag nuwi pataajui.
34 Dutika chichaak:
“Ipak usumat ichinkanum yumi aimkatajum, dutikajum kuntin asaaja patagbauwa nunú chigkim patagbauwa nujai kampatuma ukatkatajum”, tiuwai. Tusa tima imatiksag dutikau ainawai.
35 Dutikamu asa nunú yumi saegak kuntin patasa apetai najanamunum nuna yantamen nugka taimunmak ashí piyajui.
36 Tuja kuntinu neje ashí apetai tsawan jegamtai Elías nuwi jeganta chichaak: “Tuke Pujuu Apajuín Abraham, Isaac, Israel aents aidau emematin aina nunuwah, dekas amek Israel aents aidaun ememattayaitam nuna yamai dekatnume. Tuja wika amina inakem asan, ame inatjamin jutikag nunashkam dekatnume.
37 ¡Tuke Pujuuwah ayu tujutta. Amek ditan Apajuíji asam aigkata, nuna wainkag ataktu amina umigtamainak, ame dita untsuam nuna shiig dekatnume!” tiuwai.
38 Tusa inagnaig Tuke Pujuu awemamu nayaimpinmaya jii iyajui. Nunik iyaag nunú kuntin maa asaja patagbaunak chigkimjai ijumag apeauwai. Dutikak kayanashkam apea yuku emauwai. Dutikak nugka taimunum yumi piyajunak buku emauwai.
39 Nuna wainkag aents aidauk ishamkag tsuntsumawag nijayin nugka antig pujusag chichainak: “¡Tuke Pujuuk dekas iina Apajuíjiyai, Tuke Pujuuk dekas iina Apajuíjiyai!” wajaidau.
40 Imatiagtai Elías ditan chichajak: “¡Baala profetaji aina nunú achiktajum! ¡Makichkish tupikakig uwemjainmegka!” tiuwai. Tusa tima Israel aents aidau aintug achikajui. Dutikawagmatai muja segaunum entsa Quisón tutainum yajuak emauwai, nuwi ejegawag kajegkajui.
Elías Apajuí segamu
yumi yutugti tusa
41 Dutika ijinawagmatai Elías apu Acabpan chichajak: “Wamak weme yujumak yuwata, yumi uutun antajai”, tiuwai.
42 Tusa tima Acab yujumka yuwatatus weuwai.
Tujash Elíasak muja Carmelo tutainum yakí wakauwai. Nunik nuwi tikishmag tsuntsuma yapin tikishin antig pujusui.
43 Nunik pujus niina inaken chichajak:
“Weme nayantsanmanini niimsata”, tiuwai. Tusa tima wee diisui, nunik wakitki taa chichaak:
“Atsawai wainkachjai”, tiuwai. Tujash Elías chichajak:
“Sieteya imania wakitkita”, tiuwai.
44 Tusa tima sieteya nuna wee taa chichaak:
“¡Nayantsanmaya yujagkim piipich uwegjai betek yakí wau wainnawai!” tiuwai. Timatai Elías niina chichajak:
“Weme Acab ujakta, carrojin juki, eke yumi yutatsaig weti, yumi senchi yutak epenkai”, tiuwai.
45 Tusa tima, weji Acabpan ujakui. Dutika ujakam carrojin egkema yaakat Jezreelnum weuwai. Nuniai nayaimpinmak dasesegmat yujagkim suwe wajasui. Nunik shiig senchi yutujui.
46 Tuja Elíasak Tuke Pujuu senchimtikamu asa, niina jáanchjin akachumtaiyai jigka shiig senchi tupikaki, apu Acab yaakat Jezreel jegatsaig niiya jegauwai.