9
Apajuí Salomógjai chicham umikbau
1 Salomón jega Tuke Pujuu emematku ijuntain jegamak ashimak, nuigtu nii pujusa inamjatnunashkam ashimak, tuja tikichin nii dutikatag tibau aidaunashkam ashí umikui.
2 Dutikamtai Tuke Pujuu yaunchuk Gabaógnum wantintukua dutiksag ataktushkam wantintukui.
3 Nunik chichajak:
“Ame segatmaum nunak antugkajame. Nuadui juju ame jega wi tuke pujustin jegamkaum nunak tuke kuitamkattajai.
4 Tuja amina apa David mina umigtak shiig takasua imatiksamek wi chicham umikta tibauwa nunú ashí betek umiakminig,
5 wi amina apa Davitan anagkuakun:
“ ‘Amina uchijum aidaunmayag makichik tuké Israel aents aidaun apuji atinai’ tiuwaitag nunak imatiksanuk amejai umiktatjai.
6 “Untsu ame, nuigtu amina uchijum wegantu agtina nunú mina chichameg umiktin agagbauwa nunú umitsuk tikich apajuímkugminig,
7 wi Israel aents aidaun nugka susauwaitag nuwi batsatjum nunak utsagtinaitjai. Tuja juju jega juna wi pujustinun etegkag nunashkam idaisattajai. Dutika ai tikich aents aidau Israel aents aidaunak dushikiagtinai.
8 Tuja juju jega juka tsaikam numi aidauk, kaya aidauk tuwasua weaku atinai. Dutika ai aents nuni nagkaemainak wainkag puyatuk tuke dushikis chichainak:
“ ‘¿Wagkag Tuke Pujuush Israel aents aidau nugkenash, juju jega nii pujustin jegamkamua nujaish imatikayawa?’ tiagtinai.
9 Tusa tiagtai, tikich aents ditan chichajuinak:
“ ‘Auk ditá muunji aajaku aina nunú Egipto nugkanum batsatun Tuke Pujuu jiija agkanmitkamaitak, nuna umigtsuk kajimatkiag tikichin apajuímainak idaisamu asa, suwimka suwak imatikae’, tiagtinai”, tiuwai.