9
Jesús doce jintintaiji aina nu ishiakbau
(Mt. 10.5-15; Mr. 6.7-13)
1 Jesús jintintaiji doce aina nuna ijumag ashí iwanch aidaunum jiimainun, nuigtú jata aidaunum etsaegkagtumainnash senchin susauwai.
2 Dutikak ishiakui Apajuí inama nuna pachis etsegkatnume nuninak jau aidaunash etsagagtinme tusa;
3 dutikak:
—Makichkish jukigpajum jintá weaku atsumainuk. Ushujutaigkesh, wají egkesá jutaigkesh, pagkesh, kuichkikesh, nuigtú nugkutaigmesh yachiagmek jukigpajum;
4 atum tu jeganma wayattagme nuig pujustajum nunikjum weakjum ukuktajum.
5 Tuja tuwí atumin jujamtan dakitjamiagtatua, nuniakuig nu yaaktanmag jiinkí ukuakjum, atumi dawemin yukukuntu awa nu pegagjum akaketkajum ukuktajum, dita suwimak jukitnuji iwaintakjum, tiu.
6 Tiajam ditashkam jiinjag ashí yaakat yaijuch aidaunum nagkaemainak yamajam chichama nuna etsejuinak, jau aidaunashkam etsagaidau.
Herodes Jesusan yakita tibau
(Mt. 14.1-12; Mr. 6.14-29)
7 Herodes tetrarca Jesús ashí dutikamua nuna antuku, nunik anentai jegachu, wagki ujumak aents aidau chichainak: “Juan maamua nu nantakne”, tuinai
8 tikich chichaidau: “Auk Eliasai” tuinai, tikich chichaidau: “Yaunchuk profeta aajakajua nuiya nantakne”, tuidau asagmatai.
9 Tujash Herodes chichaak:
—Wi inamja ai Juagká buuken tsupikagmayajama, ¿dusha ya amainaita tuinamun antujag dusha?
Tusa wainkatatus wakegau.
Jesús cinco mil aents ayugkamu
(Mt. 14.13-21; Mr. 6.30-44; Jn. 6.1-15)
10 Apóstol aidau Jesús ishiakbau waketug kaunawag, ashí dita dutikamujinak ujakaju. Dutikam ditan yajuak nugka agkantu yaakat Betsaida tutainum awa nui weajui.
11 Tujash aents aidau dekaawag shimutkaju; nunikag jegajuawajam Jesuschakam ditan shiig anentus jukiajui, dutika Apajuí inama nuna pachis ujainak, tsagagtatus atsumaidaunash etsagau.
12 Nuniai etsashkam akaegu asamtai, doce aina nunú jegaantag chichajuinak:
—Aents akatjam ishiakta, yaakat yaig aina nui nuigtú ajanum batsata nui wegag kanuinak dita yuwatnujinash egaktinme, wagki juig makichkish atsamunum batsatji, tuidau.
13 Tiagtai Jesús ayaak:
—Atum dita yuwatnuk susatajum, tau.
Tuinam dita aiinak:
—Atsugtamajamah, cinco pag, nuigtú jimag namaka duke ajutjamajamah, untsu jutii shiakaja ashí ju aents aidau yuatnuk sumamainchauwah, tuidau;
14 duka cinco mil aishmag tumain aajakajui. Tiagtai Jesús ni jintintaiji aidaun:
—Cincuenta, cincuenta kanagjum batsamsatajum titajum, tiu.
15 Tima ditashkam ashí dutiksag batsasaju.
16 Dutikawagmatai cinco pagkan nuigtú jimag namaka nuna juki, pagkai nayaimpin diis see tusa puug jintintaiji aidaun tinabiu, dita aentsun tinamkatnume, tusa.
17 Dutikawajam ashí shiig yuwawajui, nunikagmatai ampinjau aidaunak doce chagkinnum yajuakajui.
Pedro Jesusan amek Cristuitme tibau
(Mt. 16.13-20; Mr. 8.27-30)
18 Makichik tsawantai Jesús kanaká Apajuin aujak pujusá ni jintintaiji aidaush, nui pujuidau asamtai iniinak:
—¿Aents aidaush minash yayai tujutuinawa?, tau.
19 Tutai dita aiinak:
—Ujumak aents aidau, Juan Yamijatnai tuinai; tikich chichaidau auk Eliasai taush ainawai; nuniai tikich tuidau yaunchuk profeta aajakajua dutsu aneantatai tujamainawai, tuidau.
20 —Tiagtai Jesús ayaak: ¿Atumesh minash yayai tujutjume?, tau.
Tutai Pedro ayaak:
—Amek Cristo Apajuí awemamuitme, tiu.
21 Tujash Jesusak mina pachittsagmek makichkish tikichik tiigpajum, tiuwai.
22 —Aentsmaga akiinauwa duka kuashat waittsattawai nuigtú judío apuji aidau, sacerdote apuji aidaush, maestro chicham umiktinun jintinkagtin aidaushkam dakitjagtatui. Dutikau asag maawagtatui, tujash kampatum tsawan asa nantaktatui, tiuwai.
Mina jintintaig atatus wakegauk waitiakush nemagtukti tibau
(Mt. 16.24-28; Mr. 8.34-38)
23 Tusa ashí aents aidaun chichajak:
—Makichik aentskesh mina jintintaig atatus wakegauk, niinunak idaiyak kashí kashinig waitiakush nemagtukti.
24 Wagki aents ju nugka jui pujutan imá senchi wakegak, mina nemagtuk waittan dakitauk uwemjashtin ainawai; tujash mina nemagtak niina pujutjinash puyatjukchauk, uwemjatnai.
25 ¿Wajinma yaimainaita aentsnash ashí nugka juwiyan niinu emakush, wakanin nigki megkaemaina dusha?
26 Wagki mina pachitus etsegtan datsanjuju tuja mina chichamjunash datsanjau aidaunak, Aentsmaga akiinau Apají imanjiya nujai ángel pegkejam aidaujai minitna dui datsanjatnai.
27 Tujash dekas tajime, atum ainajum juwiyatijum ujumak eke jatsuk, Apajuí inabauji wainkatnutigmesh ajume, tiuwai.
Jesús yapajinamu
(Mt. 17.1-13; Mr. 9.1-13)
28 Nuna tii ocho tsawan tumain nagkaemakiu ai Jesús Pedron, Juagkan, nuigtú Jacobo juki mujanum wakauwai, Apajuí ausatatus.
29 Nunik Apajuin aujak pujai niina yapi yapajinauwai, jaanchjish puju winchamtin wajasui.
30 Nuniaig jimag aents Jesusan aujuidau, duka Moisés, Eliasjai aajakajui;
31 nunik tsaaptin winchamtin wajasbaunum wantinkaju, nunikag ni wakitkitnujin nuigtú Jesús Jerusalén waitkasa maam atinun pachis aujuidau.
32 Tuja Pedro ditajai ijunag yujaidaushkam, kaji depeteam kajigkú shintaukmá, Jesús tsawan wajas Moisés, Elías aatus ijuntatman wainkajui.
33 Nunik jimag aentsua nunú wegagmatai, Pedro Jesusan chichajak:
—Maestroh, jutiish maigkis jui batsatagtai; kampatum aak umikagmi, makichik aminu, makichik Moisesdau, nuigtú Eliasdau, tau; tujash nunak ni tabaunash dekachiatak, tiuwai.
34 Juna aatus Pedro chichai, yujagkim ditajai ijumag ijikui, dutika yujagkim ijikam ishamkajui.
35 Nuniai yujagminmaya chichaak: “Juuwai mina Uchig, wi etegkamu ni antugkatajum”, tabau antuekauwai.
36 Nunú chichaamu nagkanaig Jesús nigki wajaun wainkajui; tujash ditak takamtak juwakajui, nuigtush nunú tsawanta duik, makichkish tikich aidaunak dita wainkaja nunak ujakchajui.
Wakan pegkegchau uchin egkemtuamun Jesús etsagagbau
(Mt. 17.14-21; Mr. 9.14-29)
37 Nunik kashinia dui mujanmaya akaejagmatai, kuashat aents Jesusan igkugtatus minidau.
38 Nuniai tuwakbaunmaya makichik aents senchi jiiká chichaak:
—¡Maestroh, wait aneasam mina uchig makichkiuchia ju etsaentujata;
39 wakan pegkegchau egkemtakug pachiachbau untsumtiknuwe, imatikak kujamtiknuwe, dutikam saun wenin apauwe! ¡Nuigtush tunamitkag waitkas ipimpig ukuwe!
40 Imatikakui amina jintintaijum aidaun segamjai jiigtugkitnume tusan tujash tujinkagmae, tau.
41 Tama, Jesús ayaak:
—¡Aents dekaskeapi tuchau, pegkegchau aidauwah! ¿wajupá dukapea atumjaish pujumainaitja, wajupak katsunjatjime? jui uchijum itantá, tiuwai.
42 Tima uchishkam adiju, nuniai iwanch uchin nugká ajiaju, dutika waugmitkam senchi kujau; tujash Jesús wakan pegkegchaun jiyakú, dutikamtai uchik tsagaju, nunikmatai apajin susauwai.
43 Dutikamtai ashí aents aidauk anentai jegachaju Apajuí senchijiya nuna wainkag.
Jesús awentsag ni mantamnatnuji etsegkamu
(Mt. 17.22-23; Mr. 9.30-32)
Nunikag ashí aentsuk Jesús dutikamun wainkag puyatuk ijunainai, Jesús jintintaiji aidaun chichajak:
44 —Shiig antuktajum wi titatjim nu: Aentsmaga akiinauwa nunak, aents aidaunum sujukagtatui, tau.
45 Tujash ditak antuinachu wajina takua tawa nunak, eke Apajuí dekamtikchamu asag; nuigtush ajantuidau nunú pachisa iniitnak.
Yaki dekas imá wagakush atinaita tiagbau
(Mt. 18.1-5; Mr. 9.33-37)
46 Nunikag jintintaiji aina nu, dita aina nuiyash yaki imá wagakush atinaita tudayinau.
47 Jesús dita anentaibaujinak dekaju asa, uchin juki niiní ayaunas awajsau,
48 dutika chichaak:
—Makichik aentskesh ju uchia juna mina daajui juwauk, mina jujak dutikawai; nuigtú makichik aentskesh mina jujauk, mina awetiuwa nuna juwawai; wagki atum ainajum anuiya imanchauch anenmamaina nu imá wagaaku atinai, tiuwai.
Jutiin shiwagmatjamtsu duka jutiinu asa aniawai
(Mr. 9.38-41)
49 Tutai Juan ayaak: Maestroh, makichik wainkamji amina daagmin iwanchin jiyau; tujash jutiijai minitan dakitakui, amek aikawaipa timaji, tau.
50 Tutai Jesús ayaak:
—Duka tiigpajum, jutiin shiwagmatjamtsu duka, jutiinu asa nuniawai, tiuwai.
Jesús Jacobo jiyakbau
51 Jesús nayaim wakitkitnuji tsawan jegau asamtai, puyatkas Jerusalén wegau.
52 Nuniak chichama etsegkatin aidaun emtikak awemau, dutikam ditashkam wegag samarianmaya aents aidau batsamtaijin yaakat yaignum wayawaju ni kanagtinun umikagtatus.
53 Tujash samarianmaya aidauk dita jutanak dakitjaju, Jerusalén weenak tuidau asamtai.
54 Dutikainam Jacobo, Juagjai Jesusan chichajuinak:
—Apuh, ¿nayaimpinmaya jii iyak apeká ijinati tumainchaukaih?, tuidau.
55 Tujash Jesús ditan ayampattsag jiyakú.
56 Nunik tikich yaakat yaignum weajui.
Jesusa jintintaiji agtatus wakejukaju aidau
(Mt. 8.18-22)
57 Nunik jintá weenai, makichik aents Jesusan chichajak:
—Apuh, wisha ame tuwig wekaetam nuniakminish tuke amijaig wekaesatin atajai tajai, tau.
58 Tutai Jesús ayaak:
—Kujancham aidau waajig ajuinawai, antsag yakiya pishak aidaushkam pasugkeg ajuinawai; tujash Aentsmaga akiinauwa duka tepesá ayamainkesh atsujui, tiu.
59 Nuna tii Jesús tikich aentsun:
—Nemagtukta, tiuwai.
Tama:
—Apuh idaitusta, dekatkauk wenu mina apajun ukusan ukuakun nemagkatjame, tau.
60 Tutai Jesús ayaak:
Idaisata, wakanin jakau aina nu jakau aidaunak ukustinme; tujash amek weme Apajuí inama nu pachisam etsegkata, tiu.
61 Tikitchakam:
—Apuh nemagkatjame, tujash idaitusta, dekatkauk mina jegajui pataag aidaun akatjan ukuutajai, tau.
62 Tutai Jesús ayaak:
—Aents nugka tsayaak, nugka tsaitaijiya nuna bakajin nenaa tsayaak wekaeyatak, ukujin ayampatua dii wajamaina numamtuk wajauk, Apajuí inama nu pachisa etsegkata tamak amaitsui, tiuwai.