3
Israel aents aidaun apuji pegkegchau aidau chicham akuptukbau
1 ¡Israel aents aidaun apuji aidautijum
juju yamai antuktajum!
¿Atumchaukaitjum shiig takastinme tusa
etegkamu aidautijum?
2 Tujash atumek pegkeja nunú kajejakjum,
pegkegchauwa nunú takagme.
Nuniau asajum mina aentsug aina nuna neje
ichiaja yajutkajum ayatak ukunchik emajum ukuajume.
3 Tuja atumek mina aentsug aidauk iwakuk yuwagme,
dutikakjum duwape ichinjajum,
neje ollanum painkatasa akaaja ukunchi tsupigtayama imatikagme.
4 Makichik tsawantai Tuke Pujuu untsuktinaitjume,
tujash niig aigmakchagtinai.
Atumek tikima pegkegchau ainajum duwi
Apajuí atumnak uumjutpakagtinai.
Profeta waitan etsejin aidau
5 Mina aentsug aidauk profeta waita etsejin aidau
tsanumainak, utugchatak atsuttawai tuina
nuna antujuinak pegkegchaunum yujawai,
nunú profeta aidauk ya ditan yujumkan ajampeawa
nuna shiig anentuinak,
yujumkan ajampenatsu nunak kajejuinawai.
6 Nuadui wi wajina dutikatag taja nunak
ataktuk ditanak ujakchagtinaitjai.
Ajumaish ditanak makichkish dekamtikashtinaitjai,
nuadui ditak wajig nagkaemaktinaita
nunak makichkish etsegkashtin ainawai.
7 Nuadui nunú profeta aidauk,
anentaimas dekamin aidaujai shiig datsantan juwakagtinai.
Wagki Apajuí jintinchamush wajinak etsegkatnume nuninak
wainak chichá yuja nunak itatjatnai.
8 Untsu minaig Tuke Pujuu Wakani pujau asa,
nunú minak senchimtijawai.
Nuadui wika Apajuík dekas
shiig betek imatikas takawai tajai.
Tuja nuigtushkam Israel aents aidauk
pegkegchau intimkiu ainawai tajai.
Jerusalén tsaikbau
9 Apajuí chichaak:
“Israel aents aidaun apuji aidautijum antuktajum.
Atumek tsanumtsuk shiig takata duka dakitajume,
tuja chicham umiktina dushakam yapajiajum takagme.
10 Jerusalégnumak,
tuja mina jegag pegkegma nuwishkam,
pegkegchau takat, tuja magkagtut aina duka
makichkish mijamtsuk tuke imani awai.
11 Apu chichama epegkin aidauk ya kuichkin akikmawa nuna yainawai,
tuja sacerdote aidaushkam kuichkin akigkatnume tusa jintinkagtuinawai.
Profeta aidaushkam kuichik akiam chichaman etsejuinawai,
nuninak: ‘Tuke Pujuu jutijaig pujawai,
nuadui suwimkanak amaschattawai’, tuinawai.
12 Atumi pegkegchaujin mina jegag pegkegma duka tsainkattawai,
tuja atumi pegkegchaujin Jerusalégkak tsaikam aents atsau bashiak asattawai.
Tuja muja pegkejam Siógkak dupa ijiam asattawai”, tawai.