15
Jesús Pilatowai ejegamu
(Mt. 27.1-2, 11-14; Lc. 23.1-5; Jn. 18.28-38)
1 Tsawamunum, sacerdote apuji aidau, judío apuji aidau, maestro chicham umiktinun jintinkagtin aidau nuigtú apu chichama inagnau aidaujai ijunjag chichasag, Jesusan jigkajag jukiag Pilaton ejetuawajui.
2 Dutikawagmatai Pilato iniak:
—¿Amekaitam Rey judío aidaunu?, tau.
Tama ni ayaak:
—Duka ame tujutme, tiuwai.
3 Tujash sacerdote apuji aidauk kuashat wajiin pachisag etsegtuidau asagmatai,
4 Pilato ataktú iniak:
—¿Amek machikish aimtsumek? Diisia kuashat wajiin pachis tsanumjutpaina nu, tau.
5 Tujash Jesusak nu tamashkam aimchau, nunitai Pilato anentai jegagchau.
6 Tuja fiestatinig aents achikbau aina nuiyan makichik jiisagké au, aents aidau ya jiinkiti tusaya segabiagtatua nuna.
7 Nuanui Barrabás daagtin, apu dakituinaku pampandayamunum ni kumpajijai aentsun mau asamtai achikam cárcel egketu.
8 Nuniamunum kuashat aents kaunkag, makichik aents tuke akupdauwe dutiksaik akupnakti tusag Pilaton segaidau.
9 Tama Pilato ditan chichajak:
—¿Wakegagmek judío aina nuna Reyjin akupkati tusagmesh?, tiuwai.
10 Nunak sacerdote apuji aidau tuke aneas kajejuinak sujukaja nuna dekau asa tiuwai.
11 Tujash sacerdote apuji aidau aents tuwaká ijunun akatjajui, Pilato dekas Barrabasan jiiktí titajum tusag.
12 Tiagtai Pilato ataktú ayaak:
—¿Judío aidau Reyji tajum junash utugkati tajume?, tau.
13 Tutai untsumkag:
—¡Achinjati!, tiajui.
14 Tiagtai Pilato ayaak:
—¿Tujash jusha wají pegkegchauna takasé?, tau.
Tujash nuní senchi untsumkag:
—¡Achigtá! awajuidau.
15 Imatiagtai Pilatoshkam aents aidaun shiig awajkata tau asa, Barrabasan jiikiu; dutikak Jesusnak asutiawagmatai achigtajum tusa inamjauwai.
16 Dutikamtai suntag aidau jukiag jega apu pujusá inamtaijin ejegawagmatai, ashí suntag aidau ijuntujaju.
17 Dutikawag jaanch kapantu nentetkaun anugjag, atsejutai jagki najanamun atsemitkakag,
18 eme anentsá kumpamji tusag dushikinak:
—¡Juuwai Rey judío aidaunuk! awajaidau.
19 Imatjuinak tagkanai buuknum awatuidau, usuktanash usukidau, nuninak emematji tusag tikishmatuidau.
20 Dutikainak dushí dushikinakua jaanch kapantu nentetkaunak awituk jujuinak, ni nugkutaijinak anugjag juki emajui achijagtatus.
Jesús achigbau
(Mt. 27.32-44; Lc. 23.26-43; Jn. 19.17-27)
21 Makichik aents cirenenmaya, Simón daagtin Alejandro, Rufo aina nuna apají, ajajinia wakettatman inajajui cruzan yanaktí tusag.
22 Dutika Jesusnak Gólgota tutainum ejentag, (“Gólgota” tawa duka “Buuké sakamtai” taku tawai);
23 vino mirrajai pachimjamun susajui; tujash nigka uwagchauwai.
24 Dutika achijag, suntag aidauk Jesusa jaanchjinak, yana kayají jiintukne nuna diisag akandaikajui.
25 Jesusnak kashikmas a las nueve ai achijajui.
26 Dutikainak wajuk asamtaiya achijaje nuna pachisag: “REY JUDÍO AIDAUNU” tusag agatjajui.
27 Nuigtushkam jimag kasan niijai achijajui, makichkia nuna untsujin awajainak, tikichia nunak menajin awajawajui.
28 Aatus uminkauwai agagbaunum chichaak:
“Pegkegchau takau aidaujai betek dutikam atinai”, tawa nunú.
29 Tuja nui aents nagkaemaidauk, buuken pegainak pegkegchau chichajuinak:
—¡Waj!, ame jega Apajuí ememattai tegakam kampatum tsawantai ataktú jegamnumjamah,
30 cruznum nematsuk akaikim, amek uwemjakia, awajuidau.
31 Dutiksag sacerdote apuji aidau, maestro chicham umiktinun jintinkagtin aidaujai dushikinak:
—Tikich aidaunak uwemtiknuwe, tujash nigkig uwemain dekapeatsui.
32 Cristo, Israela Reyjiya nunú yamai cruznum deta nuna akaikiti nunikmatai wainká dekaskeapi tiagmi, awajuidau.
Nunisag niijai achijam detaidaush pegkegchaun chichajuidau.
Jesús jakamu
(Mt. 27.45-56; Lc. 23.44-49; Jn. 19.28-30)
33 Etsa tutupit wajasú ai nagkamas a las tres wegaish ashí nugkanum suwe wajas asauwai.
34 Nuniamunum a las tres wegai Jesús senchi untsumak: “Eloí, Eloí, ¿lemá sabactani?” tiu. Nunak: “Mina Apajuijuh, mina Apajuijuh, ¿wagka idaitusume?” taku tiuwai.
35 Tuja ujumak aents nui ijunaidau nuna antukag:
—Antukjua, Eliasa untsuana, tuidau.
36 Nuniai makichik tupikaki, esponjan vino chujuau pujaunum uchupig, tagkannum aapi Jesús uwagti tusa susau, dutika:
—Elías juna kuwaktatus minishtimpash nuniau wainkagmi, tau.
37 Tujash Jesusak senchi untsumak jakauwai.
38 Nunikmatai jega Apajuí ememattainum jaanch ejaamuk, yakiin nagkamnas ichiinak nugkaan jegaak jimaituk kanakui.
39 Tuja capitán Jesús achigbaunum diyaak wajau, senchi untsumak jakamtai wainak, chichaak:
—Dekaskenum ju aentsuk Apajuí Uchijí aajakui, tau.
40 Nuigtushkam ujumak nuwa ikaag ijunas diidau, nu aina nuiyag María magdalanmaya, tikich María José nuigtú Santiago ekeuwa nuna dukují, Salomé aatus ijunu,
41 Jesús Galilea pujusmatai, nemajus yujasag yaijakú aina nu; nuigtú kuashat nuwa Jesusjai Jerusalén kaunawajua dushakam.
Jesús ukusbau
(Mt. 27.57-61; Lc. 23.50-56; Jn. 19.38-42)
42 Kintabaunum, tsawan ayamtai nagkamnatin asamtai uminbaunum,
43 José arimateanmaya, apu chichaman inagnau aina nuiya eme anentsá diitai, niishkam Apajuí inamjatnun dakau asa, ajankas Pilaton jegajua Jesusa iyashin segauwai.
44 Tusá segam Pilatok anentai jegachu jakae tutai. Nunik capitanin untsuká iniasui, wajupa yaunchkea jakame tusa.
45 Tutai capitán jakame tusa ujakam, Josen Jesusa iyashinak jukita tiuwai.
46 Dutikam makichik sabanan sumak, Jesusa iyashin kuwakí juki pempeajui; dutika ukumatai kaya tai umikbaunum egkea, kaya muuntan apapetug waajin epeni ukukiuwai.
47 Nui ukuamun María magdalanmaya nuigtú María Josen dukujiya nujai wainkajui.