8
Jesús cuatro mil aents ayugkamu
(Mt. 15.32-39)
1 Nunú tsawantinig ataktú kuashat aents tuwakú asag yumainji atsujuidau asagmatai, Jesús ni jintintaiji aidaun untsuká chichajak:
2 —Ju aents aina juna wait anentuinajai, wagki kampatum tsawan jui wijai batsatainawai; tujash yumainjig atsujuinawai,
3 wi yujumkan ayugtsuk jeen ishiakmak, jintá wekamá jaka iyaumain ainawai, ujumak atushtanmaya kaunkajush aina dui, tau.
4 Tutai jintintaiji aidau aiinak:
—¿Tuwiya jukiya yumainush sumainaita aents atsamunum pujag juniautish?
5 Tiagtai ditan iniak:
—¿Wajupa pagka ajutjamainawa?
Tama:
—Siete pag ajutjamui, tuidau.
6 Tiagtai aents nugkanum batsagtajum tusa ishiakui. Dutika siete pagkan juki Apajuin see tii, puujá ni jintintaiji aidaun tinabiu, dutikam ditashkam aentsun tinamkaju
7 Nuigtushkam ujumchik namak ajuidau, nuna Apajuin see tii tinamkagtitajum tusa tinabiuwai.
8 Nunik ashí shiig yuwawajui, nunikagmatai ampinkau aidaun siete chagkinnum aimjajui.
9 Nuna yuawajuk cuatro mil tumain aajakajui. Imana nuna akatek ishiakajui.
Fariseo aidau wainchatai iwainkagtukta tusa Jesús segamú
(Mt. 16.1-4; Lc. 12.54-56)
10 Nunik jintintaiji aidaujai barcanum chimpimjag Dalmanuta nugkanum weuwai.
11 Nui jegamtai fariseo aidau kautuawag Jesusjai tudaiyidau, nuninak pegkegchau anentaiyai dekapsagtatus nayaimpinmaya wainchatai iwainakti tusag segaidau.
12 Tusá segainam Jesús senchi mayati chichaak:
—¿Wagka ju aents aidaush wainchatai iwainakti tusash segamainawa? Dekas tajime makichik wainchataigkesh iwaintamak achagtatui.
13 Tusa ukuak barcanum egkemag, ataktú amain katigkui.
Fariseo aidau jintiamujig levaduraya numamtinai tibau
(Mt. 16.5-12)
14 Kajimatkiaju asag pag aidaunak jukichajui, ayatak makichik pag ajuidau barcanum egketu.
15 Nuniku ai Jesús ditan chichajak:
—Nijah, fariseo aidau nuigtú Herodesa levaduraji aina nujai kuitamamkatajum, tau.
16 Tutai ditak pempeentunikiag: “Nunak pag takukchag dui tujamji”, tuidau.
17 Nu tuinamun Jesús dekajua:
—¿Wagka pag atsawai tusagmesh jiyaniagme? ¿Atumek dekamainchauk nuigtush antumainchau dekapeajum? ¿Ekek utujimsa anentaimjum?
18 ¿Jiimesh ajutjamainaigkik wainmatsjum nuigtush antutaigmish ajutjamainaig antasjum? ¿Nuniau asagmek aneaktsujum?
19 Wi cinco pagkan puujan cinco mil aents ayugkamash ¿ampinjau aidaush wajupa chagkina aimjamiugme?
Tama dita aiinak:
—Doce, tiaju.
20 Tiagtai:
—Wi siete pagkan cuatro mil aents ayugkamash ¿ampinjau aidaush wajupa chagkina aimjamiugme?
Tama dita aiinak:
—Siete, tiajui.
21 Tiagtai ni ayaak:
—¿Dutikauwaitkugmek antumainchau dekapeajum?
Betsaidanmaya aents wainmachun Jesús etsagagbau
22 Nunik Betsaida jegawajui, nunikmatai wainmachun itajuawag, antinjukta tusa segaidau.
23 Tama Jesuschakam wainmachun uwegnum egkesá juki yaakat yaijan ukumtiki jiin usuktua, uwejin nuna jiin patati, machikish wainmawash tusa iniau.
24 Tama wainmachushkam pagkai niimak:
—Aents aidaunak numia nuninun wainjai; tujash weedaun wainjai, tau.
25 Tutai Jesús wainmachu jiin ataktú uwejin patatiu, dutikam paan wainmakui, nunik atushtanmayanash shiig wainu.
26 Nunikmatai jeen awemak:
—Yaakat yaija awigkesh wayawaipa, tiuwai.
Pedro Jesusan amek Cristuitme tibau
(Mt. 16.13-20; Lc. 9.18-22)
27 Nuna dutika, Jesús jintintaiji aidaujai weajui yaakat yaig aidau Cesarea nugkanum Filipo yaaktamamua nui. Nunik jintá wesa jintintaiji aidaun iniak:
—¿Aents aidaush minash yayai tujutuinawa?, tau.
28 Tutai dita aiinak:
—Ujumak aents: “Juan Yamijatnai” tuinai, tikich chichaidau: “Auk Eliasai” taush ainawai, tikich tuidau: “Profeta aajakajua nuiyaskaitai” tujamainawai, tuidau.
29 Tiagtai ni ayaak:
—¿Tujash atumesh, minash yayai tujutjume? tau.
Tutai Pedro ayaak:
—Amek Cristuitme, tiu.
30 Tujash Jesusak mina pachittsagmek makichkish tiigpajum, tiuwai.
Jesús ni maam atinji etsegkamu
(Mt. 16.21-23; Lc. 9.22)
31 Tusa Jesús nagkama jintinkagtak:
Aentsmaga akiinauwa duka kuashat waittsattawai nuigtú judío apuji aidau, sacerdote apuji aidaush, maestro chicham umiktinun jintinkagtin aidaujai dakituinak maawagtatui, dutikamash kampatum tsawan asa nantaktatui, tau.
32 Tusa paan etsegtai, Pedro akanak juki kakaakan chichagtan nagkabauwai.
33 Tujash Jesús ayampattsag, jintintaiji aidaun diis Pedron jiyaak:
—¡Wetá Iwanchih, ukugkita! Amek Apajuinu aina duka anentaimtatsme, aentsú anentaimtajig anentaime, tiuwai.
Mina jintintaig atatus wakegauk waitiakush nemagtukti tibau
(Mt. 16.24-28; Lc. 9.23-27)
34 Nunik Jesusak jintintaiji aidaun nuigtú tikich aents aidaunashkam untsuká chichajak:
—Makichik aentskesh mina jintintaig atatus wakegauk, niinunak idaiyak, waitiakush nemagtukti.
35 Wagki ashí aents ju nugka jui pujutan imá senchi wakegak, mina nemagtuk waittan dakitauk uwemjashtin ainawai; tujash mina nemagtak nuigtú yamajam chichaman etsejuinak waituidauk uwemjatnai.
36 ¿Wajinma yaimainaita aentsnash ashí nugka juiyan niinu emakush, wakanin megkaemaina nuish?
37 Nuniachkush aentsush ¿wajupa wakaninash akikmatmainaita?
38 Wagki mina pachitus etsegtan datsanjuju tuja mina chichamjunash aents betek umichu weantu aina nuna nuigtú aents tudaugtin aidau ujatnash datsanjau aidaunak, Aentsmaga akiinau Apají imanjiya nujai ángel pegkejam aidaujai minitna dui datsanjatnai.