26
Jesús maami tusa chicham umigkamu
(Mr. 14.1-2; Lc. 22.1-6; Jn. 11.45-57)
1 Jesús nuna ashí chichaká ashimak ni jintintaiji aidaun chichajak:
2 —Atumek dekagme, jimag tsawan asa fiesta Pascua atata duka, nuanui Aentsmaga akiinauwa nunak, achigtinme tusag sujukagtatui, tiuwai.
3 Tuja nunú tsawantinig sacerdote apuji aidau, judío apuji aidaujai sumo sacerdote Caifasa jeen agaajin ijunjajui.
4 Nunikag chichaman umikajui, Jesús tsanumjuja achiká maami tusag.
5 Tujash fiesta aigkik dutikachagmi, yaaktanum pampandayamu ai, tiajui.
Betanianmaya nuwa Jesusan kugkuinui buuken nijakbau
(Mr. 14.3-9; Jn. 12.1-8)
6 Jesús Betanianum, Simón lepragtin tutai jeen pujai,
7 nuwa tajuauwai makichik botella alabastro najanamunum kugkuin aimkamu shiig akik wajaknun takusá, nunik Jesús mesanum eketun buuknum ukatjauwai.
8 Nunú dutikamun ni jintintaiji aidau wainkag kajekajui, nunikag:
¿Wagka wainkash wasujua?
9 Dekas akik sujuka ujunauch aidau yaimainajama, tuidau.
10 Jesús nuna antuk ditan chichajak:
—¿Wagka ju nuwash kajejagme? Mina jutija junak pegkejan takaak aikae,
11 ujunauch aidauk tuke atumjai batsamiagtatui, tujash wika atumjaig pujushtatjai.
12 Ju nuwa mina iyashjui kugkuinun ukatjuka junak, wi ukuntsatnun umigtak jutijawai.
13 Dekas tajime, yamajam chichama juna etsejuinak ashí nugkanum yujainakush, ju nuwa mina jutija juna pachis tuke etsejiagtin ainawai, tiuwai.
Judas Jesusa sujuktatus kuichik jukimu
(Mr. 14.10-11; Lc. 22.3-6)
14 Doce aina nuiya, Judas Iscariote daagtin sacerdote apuji aidaujai chichastatus weuwai.
15 Nunik:
—¿Wajupa sujumainaitjume, wi Jesusan atumiin sujakuish?, tau.
Tutai treinta kuichkin susaju.
16 Nui nagkamas ni yupichu sujumainjin egatu.
Jesús inagnaku Pascuatin yuwamu
(Mr. 14.12-25; Lc. 22.7-23; Jn. 13.21-30; 1 Co. 11.23-26)
17 Pag levaduragtuchu yuwaku fiestamtai nagkamak tsawagmatai, ni jintintaiji aidau Jesusan jegaantag iniinak:
—¿Pascua yuatnush tuwí umiktinme tusamea wakegame?, tuidau.
18 Tama ni ayaak:
—Yaakat wetajum, nunikjum atum aents wainjum nunú jegajuajum: “Maestro chichaak: Mina tsawanjuk namputchí wajaschae, nuniau asamtai niina jeen mina jintintaig aidaujai Pascuan fiestamatjai tujamae” titajum, tiu.
19 Tiajam jintintaiji aidaushkam Jesús tibaunak imatiksag Pascua yuwatnunak umikajui.
20 Kiyagmatai Jesús ni jintintaiji doce aina nujai mesanum jegantá ekeemsau.
21 Nui yuwamunum Jesús chichaak:
—Dekas tajime, atum ainajum juiyag makichik minak sujutkattawai, tau.
22 Tutai shiig senchi wake besemag dekapjag, makí makichik iniinak:
¿Apuh, wikaitag? wajaidau.
23 Tiagtai Jesús ayaak:
—Wijai nu platonmag uchutua yuwa nu, minak sujutkattawai.
24 Dekaskenmag Aentsmaga akiinauwa duka, ni pachisa agagbauwa nunisag wetatui; tujash ¡wait anentajai ya sujuktatua nunak! Duka dekas akiinmainchaunas akiinawabiataih, tau.
25 Tutai Judas niina sujukua nu chichaak:
¿Maestroh, wikaitag?, tau.
Tutai ni ayaak:
—Ame tame duka dekaske, tiuwai.
26 Yuwinak pekagbaunum, Jesús pagkan juki Apajuin see tii, puuká, jintintaiji aidaun suwak:
Ju yuwatajum, juka mina iyashjun iwainawai;
27 tusa, copa juki Apajuin see tii, suwak:
—Ju copa juiya ashí atum uwagtajum;
28 wagki juka mina numpajui, yamajam chicham apaamunum kuashat aents tudaujin tsagkugnagti tabaunum ukaejatta nuuwai.
29 Dekas tajime, yamai nagkamsanuk ju uva yumijinak awenanuk uwagchattajai, atak tsawan uminkui mina Apajú inamtain ataktú atumjai ijunkun yamagman uwagtin asan.
Pedro Jesusnak wainchaujai tusa uukbau
(Mr. 14.26-31; Lc. 22.31-34; Jn. 13.36-38)
30 Nuna timatai himno kantamawag Olivosan mujajin weajui.
31 Nunik Jesús ditan chichajak:
—Jujú kashia juik, ashí atum aidautigmek minak ukugkittagme, wagki agagbauwa nui: “Pastoron maattajai, dutikam uwig ijunag batsatuk pampagkagtinai” tawa nunisag.
32 Tujash ataktú nantakin, atumek Galilea wegatsjuminig wiyá emkan wetatjai, tiuwai.
33 Tutai Pedro ayaak:
—Ashí tikich aidau ukugmainakuish, wika aminak tuke ukukchattajame, tau.
34 Tutai Jesús ayaak:
—Dekas tajame, jujú kashia juik atash shinatsaig, kampatumá: “Wainchaujai” tujuttatme, tiuwai.
35 Tama Pedro ayaak:
—Amijai jakata tau asan, wainchaujai tichattajame, tau.
Nuna tutai ashí niina jintintaiji aidaushkam dutiksag tiajui.
Jesús Getsemaní pujusá Apajuí ausamu
(Mr. 14.32-42; Lc. 22.39-46)
36 Nunik Jesusak ditajai ijunag Getsemaní tutainum jegaa, jintintaiji aidaun chichajak:
—Jui ekeemsatajum, nuniagmin wi awi wenu Apajuin ausatjai.
37 Tusa Pedron nuigtú Zebedeo uchijin mai juki wesa wake besetan nagkamauwai, nuniak shiig senchi anentaimak waitiau.
38 Nunik Jesús chichaak:
—Senchi wake besemag dekapeakun jamain dekapeajai, atumek jui batsamsajum wijai betekak iwá batsamtajum, tiuwai.
39 Tusa machik kuwaesag, tikishmag nugkan nijayin intaa pujus, Apajuin aujak: “Mina Apajuh, nunimainaitkuig, wi waitmainaitag duka agkanmitkajuata. Tujash wi wakegamu achati, ame wakegamu atí”, tiuwai.
40 Nuna ti ni jintintaiji batsakbaunum wakitkiu, nunikmá kajigká batsatun wainak Pedron chichajak:
¿Atumek wijaig makichik horakesh iwamainchauk dekapeajum?
41 Kají batsamtsuk Apajuí ausatajum, pegkegchaunum iyawaijum; dekaskenmag atumi wakanmik uminas awai, tujash iyashia nuuwai kakaakchauk.
42 Tusa ataktú wakitki Apajuin aujak:
Mina Apajuh, wi waitmainaitag nuna waittsuk nagkaemainchauwaitkuig, ame wakegamu dutikata, tau.
43 Nuna tusa ataktú tanta diikmá, kajigkag batsatun wainkauwai, kaji senchi mainamu asag.
44 Nunik diisá ukuak kampatuma jui wakitki Apajuin aujak, ni tibaujinak dutiksag auju.
45 Nunik ataktú jintintaiji aidau jegantun:
—¿Atumek ayamkugmek kají batsatjum? Yamaik horak jegawai, Aentsmaga akiinauwa nuna tudaugtin aidaunum sujukagtata nu.
46 Nantagtajum weagmi, mina sujuta duka tikiju minawai, tiuwai.
Jesús achiká jukimu
(Mr. 14.43-52; Lc. 22.47-53; Jn. 18.2-11)
47 Tusa Jesús eke chichaak wajai, Judas doce aina nuiya, kuashat aents espada, numi aidaun takuinaku sacerdote apuji nuigtú judío apuji aidau ishiakbaujai tajuntau.
48 Judas Jesusan sujukua nu: “Wi kugkuastatag nu atatui, nu achiktajum”,
49 tiu asa Jesusan jegantun:
¡Maestro pujamek! takug kugkuasu.
50 Tutai Jesús ayaak:
Kumpajuh, ¿wagka miname? Taunak jegaantag Jesusan achikajui.
51 Nuna dutikiagtai Jesusa jintintaiji aina nuiya espadajin ukuini juakug, sumo sacerdote inake kuwishin tsupigkauwai.
52 Dutikamtai Jesús chichajak:
Espadajum jukim awajata, ashí aents espadajai magkagtauk, espadajai maam agtinai.
53 ¿Dekatsmek, wi mina Apajun segamak yamaiya juik doce nagkaesau legión ángel aidaun ishitjumaina duka?
54 Tujash nu nunitaish, ¿wajuk uminmaina ainawa Agagbau aina nui aatus nuniktinai tibauwa dusha?
55 Tusa Jesús aents tuwakun chichajak:
—¿Wagka kasa achiktasa utugmaina imanikjumesh espada, numi aidau takusjumesh achigkatasagmesh minitjagme? Wi kashí kashinig jega Apajuí ememattainum atumin jintinnujim nuniakuish, jutikagmek achigkachu ainagme.
56 Tujash ashí ju juniajum juka, profeta aidau agagbau aina nunú uminu asamtai juniagme.
Nuna taig, ashí niina jintintai aidauk pisainak ukukiajui.
Jesús apu aidau batsatbaunum ejentamu
(Mr. 14.53-65; Lc. 22.54-55, 63-71; Jn. 18.12-14, 19-24)
57 Jesusan achikag jukiaju aina nu, Caifás sumo sacerdote jeen ejegawajui, maestro chicham umiktinun jintinkagtin aidau nuigtú tikich apu aidaujai ijunag batsatbaunum.
58 Tujash Pedrok ikaag pataetus wea weakua sumo sacerdote agaajin jegauwai. Nunik wayá achijatin aidaujai ekeemsau, wajuk inagnakagtig tusa diistatus.
59 Sacerdote apuji aidau, ashí apu chichaman inagnau aidaujai egatuidau, Jesusan tsanumjujag maatnume tusa sujukagtatus;
60 tujash ejetichaju kuashat aents wainak tsanumjuinakush. Nuninai inagnamunum jimag aents tsanumjugtin taawaju,
61 nunikag:
Ju aents chichaak: “Wika jega Apajuí ememattaiya juna tegakan, kampatum tsawantai ataktú jegamainaitjai timayi”, tuidau.
62 Tiagtai sumo sacerdote wajakí iniak:
—¿Wagka machikish aimtsume? ¿Nunash wajinbauna tujamainawa? tau.
63 Tamashkam Jesusak chichaachu. Nunitai sumo sacerdote chichajak:
—Apajuí iwaakua nuna daajin tajame, ame dekas Cristo, Apajuí Uchijiyaitkumek dekas ujajatkata, tau.
64 Nu tama Jesús ayaak:
—Duka ame tiume, nuigtushkam tajime, yamai nagkamsajum Aentsmaga akiinauwa nu Apajuí ashí senchigtina nuna untsujin eketu tsawan uminkamtai, nayaimpinmaya yujagminum pachitkau minau waitkatnaitjume, tiuwai.
65 Nuna tutai sumo sacerdote ni nugkuagbaujin japikí ichigká chichaak:
—¡Apajuin pegkegchaun chichagkae! ¿Nuigtush ya etsegtukti tusaya atsumaji? ¡Yamaik atumshakam Apajuin pegkegchau chichagka nu antukugme!
66 ¿Atumesh wajuk anentaimtagme?, tau.
Tutai dita aiinak:
—Aanka mantamnamainai, tiajui.
67 Tiagtai yapinum usukinak ijuidau: Nuniai tikich aidauk yapinum awatuinak:
68 —Cristo dekakia, ¿ya awapime?, tuidau.
Pedro Jesusnak wainchaujai tusa uukbau
(Mr. 14.66-72; Lc. 22.54-62; Jn. 18.15-25)
69 Pedro jegá agaajin ekeemtatman, makichik nuwa inak jegantun chichajak:
—Amesh Jesús galileanmayaya nujaimpap wekaemume, tau.
70 Tujash nigka ashí aents aidaun eemtin uwau, nuniak:
—Dekatsjai, wají takumes tame, tiuwai.
71 Nuna tusa waitinum jiintatman tikich nuwa inak wainak, nui aents ijunun ujaak:
—Ju Jesús nazaretnumiaya nujai wekaenuwejama, tau.
72 Tujash Pedrok ataktushkam:
—¡Dekas tajai, wika au aentsnak wainchaujai!, tau.
73 Machik asag aents nui batsatu Pedron jegaantag:
—Dekaskenum amesh dita aina awiyayapitme, ame chichamjuminig dekagme, tuidau.
74 Tama Jesusan pegkegchaun chichajak nuigtú Apajuí adaiyas:
—¡Wika au aentsnak wainchaujai! tau.
Taig atash shinukui,
75 nunikmatai Pedroshkam adeaju Jesús chichajak: “Atash eke shinatsaig kampatumá ugtuktinaitme” tibauwa nuna. Nunik nuiya jiinki senchi kajeká buutiuwai.