9
Jesús aents wekaechau etsagagbau
(Mr. 2.1-12; Lc. 5.17-26)
1 Nuna dutika ukuak, Jesús barcanum egkemag, amain katigká niina yaaktajin jegauwai.
2 Nunikmatai aents wekaechaun camillanum pataidiag ejetiaju; dutikawagmatai Jesús dita dekaskeapi tuinamujin wainak, jaun chichajak:
—Uchijuh, shiig aneasta, ame tudaujum aidauk tsagkugnaje, tau.
3 Nuna tutai ujumak maestro chicham umiktinun jintinkagtin aidau anentaimsag: “Juka Apajuin pegkegchaun chichajak tu wekaewai”, tuidau.
4 Tu anentaimaidaun Jesús dekau asa ditan chichajak:
—¿Wagka anentaiminish pegkegchaush anentaimjume?
5 ¿Tuwaita imá yupichuch tumainush, tudaujum aidauk tsagkugnaje taja dukaih, atsa nantakim wetá tumainaitag dukaih?
6 Tujash Aentsmaga akiinauwa nu, ju nugka juish tudau aidaunash tsagkugkagtumaina nu dekaatajum. Tusa wekaechaun chichajak:
—Nantaktá nunikam camillajum jukim jeemin wakitkita, tiuwai.
7 Tama niishkam nantakí jeen weuwai.
8 Nuna wainkag aents aidauk ishamkaju, nunikag Apajuin emematiaju, niina senchijin ashí aents aidaunum iwainaku asamtai.
Jesús Mateo untsukbau
(Mr. 2.13-17; Lc. 5.27-32)
9 Nuna dutika Jesús wekamá Mateon wainkauwai, kuichik apunu atinun akikmagtai yajumak ekeemtatman, nunik:
—Mateo, wegajai mina jintintaig aminum, tau.
Tama Mateoshkam ayú tusa wajakug Jesusjai weuwai.
10 Jesús yujumkan yuwak jintintaiji aidaujai Mateo jeen eketai, apu romanmaya kuichkiji atinun ijumin aidau, nuigtú tikich aents tudaugtin aidaujai kuashat kaunawag Jesús eketbaunum jegaantag pekaamsaju.
11 Nuna wainkag fariseo aidau Jesusa jintintaiji aidaun iniinak:
—¿Wagka atumi jintinjamnush apú kuichkiji atinun ijumin aidau, nuigtú aents tudau aidaujaish ijunjash yuawa? tuidau.
12 Nu tabaun Jesús antuk ayaak:
—Jamamtuchu aidauk ampijatnunak atsumatsui, jau aidau atsumawai.
13 Wetajum nunikjum ju chichamash wajina takua tawa nu unuimagtajum: “Wait anenkagtin atajum tusan wakegajai, anentag itaajum nunak dakitajai”, tawa nu. Wika aents pegkejan takau aidau untsuktasan minichuitjai, aents tudaugtin aidaunum tauwaitjai.
Ayuno pachisa iniimsamu
(Mr. 2.18-20; Lc. 5.33-35)
14 Juagká jintintaiji aidau Jesusan jegaantag, iniinak:
—¿Wagka jutiik, fariseo aidaujaig kuashtá ayuno takau agmag nuniajinish, amina jintintaijum aidaush ayunonash takainatsua? tuidau.
15 Tama Jesús ayaak:
—¿Nuwenbaunum ipaamu aidaush wake besemag batsamainkaih, nu nuwenu ditajai pujaigkish? Tujash tsawan jegattawai nuwena nunú juwam atata nu, nunikmatai ipaamu aidauk ayunó wajakagtatui.
16 “Makichik aentskesh jaanch yamagman tsupikag jaanch mamujunmag adujtuchu ainawai, yamajam asa waketak jaanch mamujua nuna nuní nagkaemas ichiimain asamtai.
17 Antsag vino yamagmak duwap apagbau ajutnumag yajashtaiyai, dutikamak ichiimain asamtai, nunik vinok ukaegag, duwapshakam ichiinak ajapnamainai. Nuadui vino yamagmak duwap yamagmanum yajataiyai, nunin asa mai pegkejak amainai”, tiuwai.
Jairo nawanji nuigtú nuwa Jesusa jaanchjin antigkua nu
(Mr. 5.21-43; Lc. 8.40-56)
18 Jesús nuna pachis chichagkagtai judío aidau apuji tajua, niina eemtin tikishmag chichajak:
—Mina nawantug yamá jakae; tujash ame minim uwegmin antinjukta, dutikam aneantatui, tau.
19 Tama Jesuschakam ni jintintaiji aidaujai weajui.
20 Nuniamunum nuwa doce mijadai numpan puwak waitú pujú Jesusan wainak ukunum juwatki adijkauwai, nunik Jesusa jaanchji wenin antigkui,
21 wagki ni anentaimsag: “Imá jaanchjinakesh antiaknuk tsagagtatjapi”, tau asa.
22 Dutika antigkam Jesús ayampá nuwan wainak:
—Nawantah, shiig aneasta, ame dekaskeapi tabaugmia nu etsaentamjae, tiuwai.
Nu tsawanta nuaduik nuwak tsagajui.
23 Nunik Jesús judío aidau apujiya nuna jeen jegakmá pigkuin umpuin aidau nuigtú kuashat aents pampaa batsamtatman wainkau,
24 nunik chichajak:
—Jiinjatajum, nuwauchik jakache ayatak kanaje, tau.
Tutai dushikidau.
25 Tujash ashí aents jiinjagmatai wayá, nuwauchin uwegnum achiká inantam, niishkam nantakiuwai.
26 Nu dutikamua nunak ashí nu nugkanum etsejug dapampajajui.
Jesús jimag aents wainmachu etsagagbau
27 Nuna dutika Jesús jiinki wetatman, jimag aents wainmachu pataetukag, untsumkag:
—¡Davita uchijiyah, jutiish wait anenkagtugta! wajaidau.
28 Nunik Jesús jegá wayamtai, wainmachu aidaush jegantajam, ditan iniak:
—¿Dekaskeap etsaentumainaita tujutjumek? tau. Tama ditashkam:
—Ehé Apuh, tuidau.
29 Tiagtai Jesús ditá jiin antintak:
—Atum dekaskeapi tajum nunisag uminkati, tiuwai.
30 Tamawaik wainmakajui. Nunikmatai Jesús shiig ujaak:
—Makichik aentskesh ujakaigpa, tiuwai.
31 Tujash ditak jiinjag weenak, ashí aents nu nugkanum batsamin aidaunak ujá ujakua weajui.
Aents chichachun Jesús etsagagbau
32 Nunú wainmachu jiinki weenaig, aents iwanch egkemtuamu asa chichachun, Jesusan itajuawajui.
33 Dutikam iwanchin jigkiuwai, nunikmatai chichachushkam chichakú. Dutikamtai aents aidauk anentai jegachaju, nunikag:
—Israel aidautik makichkish jutikamuk wainchataiyai, tuidau.
34 Tujash fariseo aidauk:
—Juka iwanch aidau apujiya nuna senchijin iwanch aidaunak jiyawai, tuidau.
Jesús aents aidau wait anentsá diyamu
35 Jesusak wekagajakui ashí yaakat aidaunum nuigtú yaakat yaijuch aidaunmashkam, makí makichik ditá ijuntaiji aina nui jintinkagtak. Nuniak yamajam chicham Apajuí inamjatnujin pachis etsejak ashí jatai jau aidaunash tuja najaimagtin aidaunashkam etsagau.
36 Aents imanik tuwaidaun wainak, wait anenjauwai, wagki pimpikiag nuigtú pampagkag uwig pastorji atsugbau wajukmaina nunidau asagmatai.
37 Nuniak ni jintintaiji aidaun:
—Dekaskenmag juumainuk kuashtai, tujash takau aidau ujumke,
38 nuadui nunú ajak juuktinun Apujiya nu segatajum, nuwi takastin aidaun ishiakti tusajum, tiuwai.