Pujutan wakannumiajai pachis jintiamu
Proverbios
Yama nagkamchaku agagbau
1
(1.1-7)
Chicham pegkeg yachametai jintinkagtamu
1 Juju ainawai apu Salomón, Davita uchiji, Israel aents aidaun apuji aajakua nunú tibau.
2 Juna tiuwa nunak:
Niina aentsji Israel wegantu aidau
yacha shiig anentaimkau atinme,
nuninak dekas chicham pegkeg aina
nuna dekau atinme.
3 Nuninak jintiamu antuka jutan,
wainak chichashtan, shiig takatan,
imagnisa emetmamja pujutan,
4 tuja datsauch imanis jintiag
anentaimchau aidaun
jintintua wajiu aneaku emak,
shiig anentaimsa eseja pujutan unuinagtatus agajui.
5 Aents yacha shiig anentaimkauwa duka
juju jintiamua nunak shiig antawai,
nunik nuni kuashat unuimatan
shiig anentaimtajai juwawai.
6 Wagki niig aents yacha
shiig anentaimkau aidau
tuja dita apachji augmattsamu,
etsegbaun, tuja adivinanza
jintiamu aidaun aatus
antuka unuimagtag tau asa.
7 Yachameta duka Tuke Pujuu
eme anentsa umigbauwa nuwi nagkamnawai.
Tuja aents pegkegchau aidauk
unuimat pegkeg jintiamua nunak dakitawai.
Datsa aidau chichagbau
8 Uchuchih,
amina apa chichame antugkata,
tuja amina duku jintinjabaush
kajimatki idaisaipa.
9 Nii jintinjabauwa duka
amina nugkutaijum pegkeg nugkuaju,
tuja atsejutai corona atsejaku
amainaitam nujai betekai.
10 Uchuchih,
aents pegkegchau aidau
tsanupagtag tuinakuish antugkaipa.
11 Tuja dita tujamiajaintaih:
“Juwi taata nunikamin
jutijai ijunja tuke aneasa
ii wakegamu umiktasa
aents utugchatji atsugbau
nagkaebaukesh maami,
12 dutikaku aents shiig anentaimkau
aina dushakam dutiksaik maami.
Dutikawaja nugka tai initak yutua ukukiagmi.
13 Dutika waji aidau yajuaka
wiakchameawagmi.
¡Nuniaku iina jenig
waji kasamkamu aidau
yajuaka aimkagmi!
14 Nuadui taata nunikamin
kasamkattag nunú akandaika
yajuakmi”, tujamainakuish,
15 ¡amek uchuchi ditajaig wepa!
Tuja dita pegkegchaun
takaina duka amek tupanjata.
16 Wagki ditak pegkegchaun
takastatus waugtuinawai;
¡Aentsun maatasashkam waugtuinawai!
17 Pishak achiktasa,
pan wainmain apujtusmak,
pishakak nuna wainu asa
duka nagkaemamaitsui.
18 Tujash nunú aents aidauk
dita jamainnak dekainayatak
pempeentumakiag umigmamainawai.
19 Nuadui aents magkagtin aina
duka wiakuch wetajai tukama,
dita pegkegchau takamtin
¡ditashkam dutiksaik maam ainawai!
Unuimat Apajuínmaya jukitajum tusa ipaamamu
20 Unuimatak antugtuktinme tusa
jinta aidaunum untsumainawai.
21 Unuimata duka yaakta waitijin,
tuja tuwig ima senchi aents aidaush
tuwawa nuwi aatus untsumainak:
22 “Datsauch imanis jintiag
anentaimchau aidauwah,
atumesh ¿wajutiya dushikagtutash,
kajegkagtutash idaisattagme?
Tuja unuimat dakitajum dusha
¿wajutiya idaisattagme?
¿Wajutiya unuimagtatjume?
23 Wi tajim nunú antuktajum,
nuniakjumin wi atumnak
mina wakanjun amastatjime,
dutikakun mina anentaimtajun
dekamtikattajime.
24 Wi atumnak untsuajime,
tuja wi ipaajime kaunatajum tusan,
tujash atumek mina antugtutak dakitagme.
25 Nuniau asajum, mina chichamjuk
kajimatkijum idaisaugme,
tuja wi atumin jintinbau
antuka unuimatchakam dakitagme.
26 ¡Nuadui wishakam
atum waitiakjuminish,
tuja sapigmakjuminish
ayatak dushittajai!
27 Tuja sapigmamu, waitut,
wake besemag pujamu,
waugkamin anentaibau aatus,
dase wainchijai betek
iyaak nugká ayaunak
ashí tsaiyama imanik minitjamkui,
28 waitiakjum untsugkugminish,
wika aikchatnaitjime.
Egatkugmesh waitkashtinaitjume,
untsugkugmesh ayam achattagme.
29 Wagki atumek unuimat
pegkeja duka dakitau asajum,
Apajuí umigtashkam dakitagme.
30 Nuniau asajum, mina chichameg
antuka jutak dakitagme,
tuja wi atumin nunikaigpajum
tusan tajim dushakam dakitagme.
31 ¡Nuadui atumek nunú umiakjum waittsattagme!
¡Tuja atum wakegamu
taka takakuajum pimpiktatjume!
32 Aents shiig emetug
anentaimkachu aina nunak
nii dekachbaujiya duke pempeentuki maawai.
Tuja aents pegkegchau aina nunak
nii wakejus pegkegchaun taka duke
pempeentuki maawai.
33 Untsu mina chichamjun umigtauk
makichkish ishamkagtutsuk
agkan shiig pujustinai.”