13
1 Uchi shiig anentaimkauwa duka
niina apaji chichamen umignai,
untsu uchi anentainkachua duka
apaji chichamenak antugtsui.
2 Maki makichik aentsuk nii pegkeg chichakbaujinian pegkejan juwawai,
untsu aents chichaman betek umichu aina duka
dita pegkegchaujin suwimkan juwinawai.
3 Shiig anentaimag chichauk
niina pujutjin kuitamak nuniawai,
untsu wainak chichá wekaguk kuashat utugchatan igkuawai.
4 Aents dakia duka
nii wakegamujin jukitag takush juwatsui,
untsu aents takauwa nudauk
kuashat waji ajawai.
5 Aents pegkegchau takatan
tupanjauk waitjutnak dakitawai.
Untsu aents pegkegchaun takauk
eme anentsa diishtai,
datsan chichajam auwai.
6 Shiig anentaimsa pujamua nunú
aentsnak pegkeg emawai,
untsu aents pegkegchaun takau aina
nunak niina pegkegchaujig bakuawai.
7 Awai aents makichkish wajigtuchuitak
wiakuch atajai tusa wakegau,
tuja antsag kuashat wajigtin aidaushkam
wajigtuchuapi tujuttinme tusa uumush ainawai.
8 Aents wiakcha duka achikmak,
mantuawainum tusa ishamkagtak
niina kuichkijin ashí akikmak uwemainai,
untsu ujunauchik achigkachagtimpash
tusa anentaimkug waitiatsui.
9 Aents pegkegchau takatan
tupanjau aina duka tsaaptin pegkeg winchamtinama iman ainawai,
untsu aents pegkegchauwa duka
jii kajinkaujai betekai.
10 Ememata duka ima maanitnak inimui;
untsu unuimata nunú
aents chichama antuk umin aina nuwi awai.
11 Yupichuch wiakchameamua duka
wamak amugak megkaewai;
tuja aents shiig takak,
diipas wiakchamea duka kuashat ikauwai.
12 Tuja ii wakegamu uminchakuig,
wake besemag dekapnawai.
Untsu ii atsumamu betek uminkuig,
shiig aneamu ajutkagtawai.
13 Aents chichaman umiachuk
suwimkan jukitnai;
untsu chichaman umiauk akiam atinai.
14 Aents shiig anentaimkau
jintinkagtamua duka pujutan sukagtawai,
nuadui jamainun uwemtikagtawai.
15 Shiig jintinkagtauk shiig anentam auwai,
untsu shiig jintinkagtachuk
pegkegchaunum jegantinai.
16 Aents yacha shiig anentaimkauwa duka
shiig anentaimag takawai,
untsu aents anentainkachua duka
nii dekachbaujiya nuna iwaintumawai.
17 Aents chichaman betek etsegchauwa
duka utugchatan apujui,
untsu chichaman shiig
betek etsegna nunú
aentsnak shiig anemtikawai.
18 Aents chichagkatatama dakitauk,
waittanum, datsannum pujutnai;
untsu chichaman antuk umiauk,
eme anentam atinai.
19 Ii wakegamu uminkuig shiig aneenui;
tuja aents anentainkachu aina duka
pegkegchau takat idaitanak atsanenatsui.
20 Aents yacha aidaujai tsaniauk,
niishkam yacha atinai,
untsu aents shiig anentainkachu aina nujai tsaniauk, pegkegchaunum jegatnai.