103
Ashí mina senchigjai Apajuínak ememattajai
David kantamamu
1 Ashí mina anentaigjai
Tuke Pujuun emematkun
pegkegnum chichagtinaitjai;
niina daaji pegkegma nuna
pachisan ashí mina senchigjai
pegkegnum chichagtinaitjai.
2 Ashí mina wakanjujai
Tuke Pujuun emematkun
pegkegnum chichagtinaitjai;
tuja nii mina yainkauwa nunak
makichkish kajimatkishtinaitjai.
3 Niyai mina tudaujun tsagkugtauk;
nigki wi jaaku pujaish etsaentinuk.
4 Tuja jamainnum jeganta aish,
niyai mina uwemtijinuk.
Tuja nigki niina anejattaijiya nuna
mina anentaijui suja duka.
5 Niig ashí pegkeg aina nuna sujawai.
Tuja wi múuntuch wajasan pujaish,
nii minak ataktu senchimtijua
ukukui yakí nanamama iman etawai.
6 Tuke Pujuuk, pegkegma iman asa,
aents waituidaunash yaigka
agkanmitkawai.
7 Moisés Israel aents aidaujai
dutikatnun, tuja dita umikagtinun
aatus Apajuí jintintuauwai.
8 Tuke Pujuuk kakagchauch
wait anenkagtinai;
wamak kajechui,
tuja anentak wajasui.
9 Apajuík jiyajatu pujuchui;
tuja kajegkagtukbaujish tukek achauwai.
10 Ii pegkegchau takamtaijin
shiig kuashat suwimak jumain ajinig,
imatikagkesh amaschauwai.
11 Niina umijin aidaunak Apajuík
nayaim múun nagkatkachua nuni
nagkaemas aneawai.
12 Etsa jiintaijiya nuna
etsa akaetaijiya nujai
atushat akankauwa numamtuk,
iina tudaujinak atushat datupajui.
13 Tuke Pujuuk niina umijuina nunak,
makichik múun uchijin shiig anentus
kuitamama imatikas kuitamui.
14 Wagki iish wajiyai najanamuitji
nunak nii dekawai;
iik nugka yukukuntujai najanamuitji,
nuna nii shiig dekawai.
15 Aentsu pujutjiya duka
dupajai betekmamtinai;
dupa tsapai yagkujuwama numamtuk wajawai.
16 Tuja yagkugnak dase dasentak umpui utsauwame,
dutikamu asamtai, ataktu awagkik wainchataiyai.
17 Untsu Tuke Pujuu anenkega duka
niina umijin aidaunmak
megkaekashtinun tuke atinai.
Nuadui, nuna uchiji wegantu aidaunash,
18 tuja ditajai chicham umikbauwa nuna
betek umidaun, nuigtu diez chicham umiktin
agagbaun kajimattsuk umidaun
aatus tuke yaigtinai.
19 Tuke Pujuun pujusa inamtaijiya duka
nayaimpinum awai;
nuwi ekemas ashí nugkanum inamui.
20 ¡Nayaimpinmaya aents ángel senchigtin,
Apajuí chichame umijin,
tuja nii inapakui umiktasajum
batsamin aidautijum
Tuke Pujuu ememattajum!
21 ¡Atum niina suntaji aidautijum nii takajin,
tuja nii inapamu betek umijin aidautijum
Tuke Pujuu ememattajum!
22 ¡Tuja Apajuí najankamu
ashí nugkanum batsamin aidautijum
Tuke Pujuu ememattajum!
Tuja wishakam ashí mina wakanjujai
Tuke Pujuun ememattajai.