LIBRO V
107
(Salmos 107—150)
Apajuíyai pimpiki wake besemag pujajinish yaijatnuk
1 Tuke Pujuu see titajum,
wagki niyai pegkejak,
niina anenkajig tuke auwai.
2 Iina shiwaaji aidau inaku
waitkatai batsatutin Tuke Pujuu
niina senchijijai jiigmag
agkanmitkagmabi titajum.
3 Dutijama etsa jiintai, etsa akaetai,
nujinum, tsumunum batsamin
aidautin yajupak ijupagmayi.
4 Tuja iina muunji aajakajua duka,
wainak megkagag uwegshunum yujajakui,
yaakat dita batsamainun
wainainachu asag.
5 Nuninak nujantai, kitakai
ashí jinawag yujagmayi.
6 Nunik waituinak Tuke Pujuun
yaijatkata tusag segagmayi,
nuna nii antujuk, dita
waitiamujin yaigka agkanmitkabi.
7 Dutika jintintua dita
shiig batsamsatnunum ejegawagmayi.
8 Nuadui Tuke Pujuu emematiagmi,
niina anenkajin iina ayamjutpak
ishamain wainchatai aidaun iwainajua,
nunú pachisaja.
9 Wagki Apajuíyai aents kitakai jaunash,
tuja nujantai jaunashkam suwa duka.
10 Tuja iina apachji aajakajua duka,
inaku waitkainam pimpikiag
wake besemag pujuagmayi.
11 Nunak Tuke Pujuun shiwagmainak,
chicham umiktinun susauwa nunash
uminachu asag nunikajui.
12 Nuadui Apajuí suwimak susam
shiig senchi waitujakajui,
dita yaimainuk makichkish
atsugsamu asa.
13 Nunik waituinak Tuke Pujuun
yaijatkata tusa segagmayi,
nuna Apajuí antujuk, dita
waitiamujin yaigka agkanmitkabi.
14 Dutika senchi inainaku waitkam batsatun
agkanmitkabi.
15 ¡Tuke Pujuu anenkega nunú see titajum,
wagki nii jutiin ayamjutpak
kuashat wainchatai ishamain
aidaun iwainajua nuadui!
16 ¡Waiti bronce najanamunash,
tuja jiju awajamu aidaujai,
Apajuí ashí tsaikui!
17 Tuja iina apachji aidauk anentainkachu asag,
dita pegkegchaujin jata achikam
senchi waitiagmayi.
18 Nunik jinuinak yujumkan tsumainak
yutsuk, nujantai ashí jinaa batsabi.
19 Nunik waituinak Tuke Pujuun
yaijatkata tusa segagmayi,
nuna Apajuí antujuk,
dita waitiamujin yaigka agkanmitkabi.
20 Ashí niina chichamenig etsagakmayi.
¡Aatus ashí jinaa batsatun uwemtikjabi!
21 Tuke Pujuun anenkega nunú see titajum,
wagki nii jutiin ayamjutpak,
kuashat wainchatai ishamain aidaun
iwainajua nuadui.
22 Apajuí yaimpakua nunú anentaimtusjum,
see takujum kuntin maa apeatajum,
dutikakjum nii dutikamuji pachisjum
shiig aneasjum senchi
untsumkajum etsegkatajum.
23 Iina apachji aajaku aina nunú
lanchanum nayants shiyaku aidauk,
nayantsa amain tikich nugkanum
wajiin sujak yujau ainawai.
24 Ibau nayants muunnum yujasag,
junak dekas Tuke Pujuuwap najanauwaita
tusa dekawajui.
25 Apajuí chichakmatai,
dase ishamain iyagmayi,
imaniak nayantsan shiig senchi
tsukatmitkabi.
26 Imatikak lanchanak
yaki ema ema ajuibi.
¡Imaniau asamtai,
ayamjumamainchau dekapiagmayi!
27 Nuninak nampekujai betek
winchainag tukumak iyainiagmayi.
Imaaninak lanchanum
yujatan yacha ainayatak
dutikmainchau dekapiagmayi.
28 Imanitai ishamainak
Tuke Pujuun segagmayi,
tusa segam antujuk yaigka uwemtijabi.
29 Dutikak dase ishamain wajak
nayantsan tsukatmitkaunak imijakmayi.
30 Nunik mijakmatai, shiig aneasagmayi,
tuja Apajuí ditanak yajuak
dita jegatag tibaunum ejegauwai.
31 ¡Tuke Pujuu anenkega nunú see titajum!
Wagki nii jutiin ayamjutpak,
kuashat wainchatai ishamain aidaun
iwainajua nuadui.
32 ¡Ashí aents aidautijum ijunjajum
Apajuí ememattajum!
Tuja Israel aents aidaun apuji
múun aidautigmesh ijunjajum
Apajuí ememattajum.
33 Apajuík namak múun aidaunash
ukuya uwejush emawai,
tuja yumi pukuni jiinunash
ukuya buku emawai.
34 Tuja nugka ajak shiig tsapaunash,
nuwiya aents aidau tudaujin
ajak tsapachu emawai.
35 Uwejush yumi atsaunash
kucha ain emawai,
dutikak nugka buku ataish,
yumi pukuni jiinin emawai.
36 Tuja aents nujantai waituidaunak
yajuak nuwi batsawai,
dutikam nuwi dita batsamsatnun
yaaktan najanainawai.
37 Nuwi batsamas uva ajakag
kuashat nejekun juuka yuwinawai.
38 Apajuí ditanak yayawai,
tuja dita tagkuji aidaunashkam
kuashat ikauntawai.
39 Untsu tikich aidauk
kuashat waitkainamu asag,
ujudauch ainawai.
40 Tuja Apajuík aents pegkegchau
waitkagkagtin aina nunak kajejawai.
Nuadui ditanak uwegshunum wainak yujas
jinaati tusa idaisauwai.
41 Tuja aents ujudauch
wake besemag pujaunash
nii agkanmitkawai.
Dutika nii uchijinak
tagkujai betek kuashat uyujtawai.
42 Nuna aents Apajuí umijin aidau
diisag shiig anenawai.
Untsu aents pegkegchau aidauk
datsaamainak ataktuk tumainchau
dekapenawai.
43 Aents shiig anentaimkauk juna anentaimas diisti.
Nuniak Tuke Pujuun anenkega nuna dekattawai.