124
Apajuík tuke yaijatui
David Jerusalén wakatatus wesa shiig aneak kantamamu
Ashí Israel aents aidautigmek,
Tuke Pujuu iina yaimpakchau akuish,
wajukauk ainji, tumamtajum.
 
Tuke Pujuu iina yaimpakchau ataik,
aents aidau jetepagmaya nuaduik,
ashí ijipamain awajtamkajui,
senchi kajegtamkaju asag.
Dutijamawagmatai namak dujajak tajaka
ajapama numamtuk ajapeam amain wajakuitji.
Namak chichijam tajaka ajapama
numamtuk ajapjamain awajtamkajui.
 
¡Tuke Pujuuk tuke pegkegnum chichagtai ati,
wagki shiwaaji ijinatnume
tusa idaitamsachu asamtai!
Aents chigkin achiktatus detuamunum
chigki nemak tsujimak wegama numamtuk,
iishkam shiwag achigmak
mantamatag tujamainakui, pisaja uwemjabiaji.
Tuke Pujuu nayaimpin nugkajai
najanauwa nunuwai ayamkagtinuk.