148
Apajuí najankamu aidautigmek nii ememattajum
1 ¡Iina Apajuíji emematiagmi!
¡Nayaim aidautijum Tuke Pujuu ememattajum!
¡Yakí agkajunum Apajuí ememattajum!
2 ¡Atum Apajuí aentsji ángel aidautijum
Apajuí ememattajum!
¡Nayaimpinmaya suntag aidauwah,
Apajuí ememattajum!
3 ¡Etsa, nantu aidauwah,
Apajuí ememattajum!
¡Yaya aidautigmesh Apajuí ememattajum!
4 ¡Yumi yakiya aidautigmesh
Apajuí ememattajum!
¡Nayaim shiig múunta
dushakam Apajuín emematti!
5 Tuke Pujuu daaji ememattajum,
wagki nii chichakmatai,
ashí najaneakua nuadui.
6 Nii ashí umikui tuke asatnun;
dutika chichaman umikui atakesh yapajinashtinun.
7 ¡Nugkaya aidautigmesh,
tuja nayantsanum batsamin
kuntin múun aidautigmesh,
nayantsa initken batsamin aidaujaí
Tuke Pujuu ememattajum!
8 ¡Chaajip, bicha, nieve, yujagkim aidautigmesh,
tuja dase Apajuí dasenkati tima
ishamain dasentin aidautigmesh,
9 muja aidautigmesh, nain aidautigmesh,
tuja ashí setug aidautigmesh,
numi neje yujutai aidautigmesh
Apajuí ememattajum!
10 ¡Kuntin tagkumtai, kuntin tagkumchatai,
chigki aidau, kuntin japiinas yujau aidautigmesh,
11 tuja ashí nugka múun aidaun
apuji aidautigmesh, atumi aentsjum aidaujai,
apu ashí nugkanmaya aidautigmesh,
12 aishmag, nuwa,
datsa, múuntuch aidautigmesh,
13 ashí Tuke Pujuun daaji ememattajum,
wagki ima niina daajiya duke múuntak!
¡Niina imanjiya duka nayaimpin
nugkajai nagkaesau múuntai!
14 ¡Apajuí niina aentsji aidaunak senchimtikawai!
Nuadui niina aentsji Israel wegantu aidautik
nii emematuinaji.
¡Yajauwajah!
Apajuí ememattai ati.