16
Apajuí mina sujusua nuna nagkaesau pegkejak atsawai
David agagbau
1 Chah, Tuke Pujuuwah, kuitamjukta,
wika aminí ejamatnak egajai.
2 Wi amina chichagkun:
“Ametme mina apug
pegkegnum yainnumek,
tikich amea ibauk atsawai.”
3 Ame chichagtakum:
“Mina aentsug nugka batsata nunú
minak umigtuidau asag
shiig awajtuinawai.
4 Untsu tikich aents aidau apajuíchun apajuímainak niina umijuina duka
senchi waittsagtinai”, tame.
Nuadui wika nunak
tuké etsagjashtinaitjai.
Tuja nunú apajuímtai aina
nunak makichkish emematchattajai.
Nuna daajinakesh makichkish adaikashtinaitjai.
5 Tuke Pujuuwah,
ametme mina ashí sujinmek.
Ame sujame kuashat pegkeg aidau,
mina pujutjua duka aminí awai.
6 Nugka shiig pegkeg aidau
makichkish wi anentaimtujakchamu ajutui,
Apajuí anagtuamu wi jukitin ajuta duka
dekas shiig pegkejai.
7 Tuke Pujuunak shiig pegkegnum chichagtinaitjai,
nii minak pegkegnum jintinjau asamtai.
Dekas mina iyashjunash jintinjutui,
dutijak kashishkam esetawai.
8 Tuke Pujuu mina Apajuíjua duka
tuke wijai ijutkau pujawai.
Wika niini emetuman wajau asamtai, makichkish ajunjashtin ainawai.
9 Wika shiig aneasan dakunkut pujajai,
ima niyaig kajintsa anentaimsan pujuttajai.
10 Apajuíjuh, amek minak
jakati tusamek idaituschattame,
tuja ¡pegkegmaitak ukumatainum ukusam
kaugti tusamesh idaituschattame!
11 Jinta pujutnum ekagtina nunú
ame iwaintugkattame.
Ame pujamugmia nuwig
shiig dakujamu awai.
Aminí awai dakujut tuke atina nunú.