37
Apajuíyaig kajitmamsa anentaimat
David kantamamu
1 Aents pegkegchaun pujutji diigsam kajekaipa,
tuja aents pegkegchau aidau
atsumkas pujuinakui, nunú diisam kajegkagtukaipa.
2 Wagki nunú aents aina duka
dupa tsupikam wamak kagaja megkagama
numamtin ainawai.
3 Tuke Pujuuwaig kajinmamsam anentaimsata,
nuniakum ima pegkeja duke takasta.
Nuniamin Apajuí yaimpasmatai,
juju nugkanum pujusa takakum
shiig yuwa pujusminum.
4 Tuke Pujuu shiig anentsam aneeta,
nii umiktatui ame senchi wakegamunak.
5 Amina pujutjumek Tuke Pujuu idaitusta,
dutikakum niyai kajinmamsam pujusta,
nuniamin nii yaimpaktatui.
6 Ame shiig pujamugmea nunú,
tuja amina takatjum pegkeja dushakam
etsa tajimak shiig etsantama iman atinai.
7 Tuke Pujuu emtin wainka chichá wekaetsuk
takamtak pujusta;
nuniakum dakasta nii yaimpakti.
Tuja aents pegkegchau aidau
shiig atsumkas pujuinakui,
nunú diisam kajegkagtukaipa.
8 Tuja kajeta duka idaisata,
kajeka jiyanita dushakam ukukta,
kajekaipa, wagki kajeamua duka utugchatan itawai.
9 Aents pegkegchau aina duka ijina utsaam agtinai.
Untsu aents aidau Apajuín umijuinak
niinig anentaimas kajinas batsata nunú
Tuke Pujuu nugkan anagkagtuawa nuna jukiagtinai.
10 Aents pegkegchaun takau aidauk,
dukap atsuk megkaejattawai;
nunikagmatai wainkatasa egaakmesh
makichkish wainkashtinaitme.
11 Untsu aents ememachu aina nunú nugka pegkegnum wayawag,
tutit chicham atsamunum shiig pujusagtinai.
12 Untsu aents pegkegchauwa duka
aents pegkejan kajejak
pegkegchau awajkatatus egatui.
13 Tujash Apajuík nunú aents aidaunak dushikiawai,
wagki dita megkaejatnuk tsawan jegau asamtai.
14 Aents pegkegchau aina duka
ujudauch aidaun, ememachu aidaun,
pujutji pegkeg aidaun aatus maawagtatus
puyagjin akentaijijai uminawai.
15 Tujash ditak, dita puyagjinig maam agtatui,
untsu akentaiji aina duka
kupija utsantam agtatui.
16 Aents pegkegma duka
wajiji kuashat achataish,
aents wiakuch pegkegchaun
nagkaesau shiig pujawai.
17 Wagki Tuke Pujuuk
aents pegkegchau aidaun ijinak,
aents pegkeg aidaun kuitamkattawai.
18 Apajuík aents tudaugtuchu aidaun kuitamui,
tuja ditak ajumaish tuke atina nuna jukiagtinai.
19 Tsawan waitiamu jegataish,
ditak waittsachagtinai,
tuja nujan tepeamtaish,
dita yuwatnuk kuashat ajiagtinai.
20 Aents pegkegchau aina duka
dupa kagakujai betek keekagtinai.
Tuja Apajuín shiwaaji aidaushkam
jii bukuiti megkagama numamtuk
megkaejatin ainawai.
21 Aents pegkegchauwa duka
tsagkatjukta takui tsagkatkamash akikmachui;
untsu aents pegkeja duka
tsagkatkamak nuni ewagas akikmawai.
22 Apajuí pegkegnum yumigsamu aina nunú
nugka pegkegnum pujusagtinai;
untsu nii pegkegchaunum
yumigjamu aina duka, ijina utsam agtinai.
23 Tuke Pujuuk aentsu pujutjin diijus
nii wakegamujai betek pegkeg ataik,
shiig pujusti tusa yayawai.
24 Tuja nunú aentsuk
pegkegchaunum iyakush,
nunisagkek megkaekashtinai,
wagki nigka Tuke Pujuu achiakbau asa.
25 Wi datsa asan pujuyag duwikish,
tuja yamai múuntuch wajasan pujag duwish,
makichkish waintsujai aents pegkeg aidau
Apajuí kajimatki idaisamu asag waituidaunak,
tuja dita uchiji aidaukesh
yumain atsujam waituinak
sumá yujaunak makichkish waintsujai.
26 Aents pegkeg aina duka
ashí tsawantai wait anenkagtinai,
nuniau asa tsagkatkagtinai;
tuja niina uchiji aidaushkam
pegkegnum chichajam agtinai.
27 Pegkegchau takata duka tupanjata,
nunikam pegkeja duke takasta,
nuniakum ame pujustinun Apajuí anagtabauwa
nuwi tuke pujustinaitme.
28 Wagki Tuke Pujuuk
shiig takamua nuna wakegawai;
nuadui niina umijuidaunak kajimatkig idaitsui;
untsu pegkegchau aidaunak
dita uchiji aidaujai ashí ijinui.
29 Nugkan Apajuí anagkagtuawa nuwig
aents niina umijin aidau tuke pujusagtinai.
30 Aents pegkejak shiig anentaimas chichawai;
nuniak tuke pegkeja nunak chichawai.
31 Nuniau asa niina anentainishkam
Apajuí jintintuamua nunak tuke aneakui;
¡nuadui niig makichkish pegkegchaunmak
iyaumaitsui!
32 Aents pegkegchauwa duka
aents pegkejan tsanumjug,
maatnume tusa sujuktatus wekaetawai.
33 Tujash Tuke Pujuuk aents pegkegchauwa nunú
maati tusag idaisashtatui;
tuja nuigtushkam tsanumjujagmatai,
achikag waitkastinme tusagkesh idaisashtatui.
34 Tuja amek Tuke Pujuuwai kajinmamsam pujusta,
nuniakum niina chichame umigkata;
wagki nii aminak tikich aidaun nagkaesau etamtatui,
dutijama nugkan anagtabauwa nuna amastinai.
¡Nuwi pujusam aents pegkegchau aidau
jinuidau wainkatnaitme!
35 Aents pegkegchauwa nunú
numi múun wajaama numamtuk
ememas wajaun wainkabiajai.
36 Tujash wajukayawas, megkaekabi,
wainkatasan egaknush wainkachmaijai.
37 Aents shiig anentaimkauwa nunú diista,
nunú aentsuk tutit chicham atsaunum agkan pujustinai.
38 Untsu aents antumtikmainchau
intimkiu aina duka
ashí ijina utsaam agtinai;
nuadui ditak jinatnujin dakainawai.
39 Tuke Pujuuk aents pegkeg aidaun
yaigka uwemtiknai,
tuja tsawan waitiamu jegataish,
nii ejaka kuitamui.
40 Tuja ditanak Tuke Pujuu ayamjuk agkanmitkawai,
wagki niyai kajinmamas
anentaimaidau asagmatai.