69
Waitiaku pujusa Apajuí segamu
David kantamamu
1 Apajuíjuh, kuashat waitiakun
atsanmainchau dekapeajai,
wait aneasam yainkata.
2 Kucha amutnunum tepeajai,
wajai emetumainkesh atsugtawai.
Dekas namaka kunajin akaejai,
namak chichijam asa ajektawai.
3 Untsu untsumkawan sagagjai;
mina suweg dajautawai.
¡Apajuín daka dakakuan jiijuish yawegjai!
4 Mina shiwaajuk intash kuashta
nuna nagkaesau ainawai,
utugchat atsugtaig kajegtuinak,
mantuatag tuinawai.
Tuja makichkish kasamkachu aig,
kasamkamujum awagkita tusa imatjutuinawai.
5 Apajuíjuh, ame dekame wika pegkegchau ayajai;
nuadui mina tudaugnak ugmaitsugme.
6 Tuke Pujuu Apajuí ashí senchigtinuh,
¡aminí kajinmamas anentaimin aina nunú,
wainak mina pegkegchaujui
datsaama yujainum idaisaipa!
Israel aents aidaun Apajuíjiyah,
aents amina egapau aina nunú
mina pegkegchaujui datsaama
yujainum kuitamkata.
7 Amina umiju asan
kajegtuinakuish katsuntajai.
Datsanjui mina yapijuk nimpawai.
8 ¡Mina yatsuchig aidaush,
tikich aents itugmaina dutijuinawai!
9 Amina jemin akasmatkun senchi waitiajai.
Tuja amina pegkegchaun chichagtamainakui,
nuna antakun kajeajai.
10 Buutkun yujumkan yutsuk
ijagmaan pujai, dushiktuinakuish katsuntajai.
11 Jakamunum nugkutain
nugkuai, dushiktuinakuish katsuntajai.
12 Ashí aents aidauk
pegkegchaun chichagtuinawai.
Tuja nampen aidaushkam
tuke aneas dushiktuinak kantamjutuinawai.
13 Tujash Tuke Pujuuwah,
wika amina segajame,
¡wait aneasam yainkata!
Amek anenkaitme, tuke kuitamkagtinaitme,
iman asam minash uwemtijugta.
14 Tsakusnum tepean tepag nunú
eke jatsaig jiigkita,
tuja mina kajegtuina dusha agkanmitkajuata.
Tuja namak chichijam ajapjuattak
awajta nunú uwemtijugta.
15 ¡Namak chichijam
ajekjati tusamek idaitusaipa!
Tuja wainchi ishamaina nunú
yutua emegkakti tusamesh idaitusaipa.
16 ¡Tuke Pujuuwah,
amek pegkeg, anentak wajasuitme,
iman asam minash aigkata!
Amek wait anenkagtinaitam
iman asam minash antugtukta.
17 ¡Juju amina inakem
segapa nunú antugtsuk idaisaipa!
¡Utugchat ishamain ajutui, wamak yainkata!
18 ¡Juwi taam, shiwag aidau
waitkajuina nunú ayamjutkata!
19 Amek mina dushiktuinak
inastuina duka shiig dekame.
Tuja mina shiwaajush ya ainawa
dushakam amek dekame.
20 Ima imatjutuinakua ipimtukiaje,
nuadui shiig aneasa pujumainchau
kakaagchamin dekapeajai.
Yaki wait anenjug
anentaijun ichichtujainta tusan,
egaknush wainkachmaijai.
21 Yapajaish, yutainum jatain egketjiagmayi,
tuja kitamaish chujuinun sujiagmayi.
22 Nuadui dita jiistamaina nunú
yutaiji aina nunú aatus ditan pempeentuki
utugchatan apujtusti.
23 ¡Tuja wainmachu,
kakaumainchau emakta!
24 Dutikakum ame kajekbauwai
makichkish idaitsuk ashí ijinata.
25 Dutikawamin dita jee aina duka
agkan juwajagtatui,
tuja nunú jega aidaunmak
makichkish pujuschatnume.
26 Wagki ame mina suwimak sujusamin
waitiaish, ditak minak diigtsuk
ayá dushiktuinak, nuni senchi waitkajuinawai.
27 Nuadui ameshkam
pegkegchaunmak ikata.
¡Tuja makichkish dita tudaujig tsagkujaipa!
28 ¡Aents tuke pujusagtin aina nuna daaji
papiinum agatkamua nuwi, dita daaji ayá
duka ashí esakatjata!
Tuja aents amina umigtamin aidaun
daaji agatkamua nuwig,
dita daajig makichkish agatjaipa.
29 Apajuíyah, wi jakun wake besemag
dushikiam pujag nunú minash
wait aneasam yainkam uwemtijugta.
30 ¡Apajuín see tusan kantamtain kantamkun,
shiig aneasan ashí iwainakan
niina daajin ememattatjai!
31 Nunú dekas, kuntin aidau
maa apeamun nagkaesau
Tuke Pujuunak shiig awagmaktatui.
32 Tuja aents Apajuín segau aidau
wake besemag batsatuk,
nuna wainkag shiig aneasagtatui;
nuninak ichichmamjagtatui.
33 Wagki Tuke Pujuuk aents waitiak
wake besemag pujus sumaunak antujui;
tuja niina aentsji aidau achikam batsamas
waitiagtaish, dakitjag idaitsui.
34 Nugka, nayaim, nayants aidautigmesh
Apajuí ememattajum,
tuja ashí nuwi batsamin aidautigmeshkam
Apajuí ememattajum.
35 Apajuí Jerusalégnak kuitamkattawai,
dutikak Judá wegantu aidaun
yaaktaji aidau tsaikbau aina nunak
ataktu iwagkattawai.
Dutikamtai niina aentsji aidau
nuwi batsamsagtinai.
36 Nunú nugkak niina aentsji aidaun
uchiji wegantu aidaunu atinai.
Tuja nunú nugkanmak Apajuín aneen aidau
shiig batsamsagtinai.