8
Apajuí imanjiya nunú aentsu pujutjijai
David kantamamu
1 Tuke Pujuuwah, ametme iina apuji,
ashí tikich aidau nagkaesau muunmek.
¡Amina daagmek
ashí nugkanum antunawai!
¡Amina imanjumek nayaim
múunta nuna nagkaesauwai!
2 Amina shiwaajum kajegtamainak
mantamatag tinu aina duka,
uchi tsakat aidau,
uchi muntsu muntsuaku aidaujai
shiig pegkegchin kantamaina duwi
amina senchijum iwaintukam itatmikajume.
3 Ame nayaim najanamua
nuna diisan, tuja nantu,
yaya aidaujai ame najankamu aidau
nayaimpinum ayá nunashkam wainkun
4 anentaimsan:
¡Aents aidautik pegkegmakesh ainatsji!
¡Tikima wainkauch ainaji!
Nunin ajinish ¿wagka tujash
puyatkagtusmesh kuitamkagtame?
5 Aentsuk ángelchawashit tumain najanauwaitme.
Nuadui apu kuitamaina
imatiksam kuitamam duka dutikame.
6 Tuja ashí ame najankamu aina duka
ashí nii idaitusuitme, dutikakum
tikich ame najankamu aina
nuna nagkaesau emam apusauwaitme.
7 Dutikam uwig aidau
buey aidau, kuntin ikamia aidau,
8 chigki yakí nanamin aidau,
namak nayantsanmaya aidau,
tuja tikich kuntin aidau
nayantsanum ayá duka
ashí nii idaitusuitme.
9 Tuke Pujuuwah, ametme iina apujimek,
ametme ashí tikich aidaun
nagkaesau dekas muunmek.
¡Amina daagminak
ashí nugkanum dekainawai!