2
Ana kantamamu
1 Ana kantamak aatus Apajuín tiuwai:
“Tuke Pujuuwah, wika aminí shiig aneajai,
wagki ame senchimtijau asamin.
Yamaik mina shiwag aidaujaish
ainikan tudaimain wajasjai,
wagki ame yainkau asamin.
¡Yamaik shiig aneasan pujujai!
2 ¡Tuke Pujuuwah,
ame pegkegmaitam imanuk tikichik atsawai!
¡Ame jutii Apajuíji asam kuitamkagtam, imatikas
kuitamkagtauk tikichik makichkish atsawai!
¡Amina nagkaetamsauk tikichik atsawai!
3 Makichkish ememasag chichamain ainatsui.
Tuja ima nigki eme anenmamuk makichkish atsuti.
Tuke Pujuuwai ashí yacha duka.
Tuja Tuke Pujuuwai maki makichik aents
pegkegchau takasbaujin diijus suwimkan suwa duka.
4 Apajuíyai aents senchigtin aina nuna
senchigtuchu emak,
aents senchigtuchu aina nuna senchimtiknuk.
5 “Yaunchuk yumainji kuashat ajujakbauk,
yamai makichik pag yuwatag
tabaunum takak waituinawai.
Tuja yaunchuk nujantai waitujaku aidau,
yamai waituinatsui.
Nuwa uchigmachu aajakushkam,
nuwa uchigbau aidaun
nagkaesau sieteya imagnia uchigmainawai.
Untsu yaunchuk uchiji kuashat ajujakagbauk,
uchigmamainchau wajasaje.
6 Tuke Pujuuwai pujutan sukagtinuk.
Ima nigki jakati tusashkam tukagtauk.
Nunika jaka ajin iina patayi aidau
ukumatainum ukugmasagmataish,
ataktu inantamki pujutan amastina nunú.
7 “Tuke Pujuuwa nunuwai ujuuna ekagtinuk.
Tuke Pujuuwai wiakuch ekagtinuk.
Nii amasbaun atanjamkish,
nigki ataktushkam imatiksag sukagtinai.
8 Nii aents ujunauchin wiakchamtiknai.
Tuja aents yumainji atsugbaun,
egaka yuu wekagun juki,
aents eme anentai aidaujai betek emauwai,
dutika nunú aents
eme anentsa diitai aidaun ekemtain ekentsatatus.
Tuke Pujuuwai ashí nugka aina nuna najanak,
nugka patami asatnunashkam umikua duka.
9 Tuke Pujuuk ya niina shiig umijua nuna kuitamui.
Untsu aents pegkegchau aidauk jinuinawai,
nunikag suwimkanum shimuinawai.
Wagki makichik aentsuk niina senchijinigkik
ayamjumamaitsui.
10 Tuke Pujuuk nayaimpinum pujus niina shiwaaji
aidaun chaagpin ajuntug ijinattawai.
Ashí aents nugkanum batsata nunak
Tuke Pujuu dita takasbaujin diijus
suwimkan susattawai.
Untsu apu atinun nii etegkamunak
aan nagkaemas senchigtin emattawai”, tiuwai.
11 Tusa kantama inagnakmatai, Elcaná Anajai niina jeen yaakat Ramá wakitkiuwai. Tuja uchik Tuke Pujuun takagsatatus sacerdote Elíjai juwakui.
Elí uchiji aidau pegkegchaun takamsagbau
12 Elí uchiji aidauk pegkegchau aidau asag, Tuke Pujuunak ajantus diijakchau ainawai.
13 Nunidau asag makichik aentskesh Apajuín emematak kuntinun maa apeamun antukajag dita inaken akupejaku ainawai. Dutikamu nunú tenedor múun wajaknun takaku jegawag ajantsuk kuntinun neje yama najaunak,
14 nunú tenedorai iju jiijag yajumaidau. Dutikainak Israel aents aidau yaakat Siló jegawag Apajuín ememattag tuidaunak waitkaidau.
15 Tuja kuntinu wiyajin eke apeatatus pujugtatmanash sacerdote inake jegantun chichajak: “¡Sacerdotenu neje atinuk uduu mina sujusta wi jukin inagtuatjai, wagki sacerdotek neje inajuamunak dakitawai!” tau.
16 Tusa tama aents ayaak: “Jasta, dekatkauk kuntinu wiyajin apeatjai. Dutikamtai ame wakegamu jukita.” Tama nii chichajak: “¡Tutsuk yamaikiuch sujusta! ¡Sujachkuminig wiki atankittagme!” tau.
17 Elí uchiji aidauk shiig pegkegchau Tuke Pujuunash umijujakchau ainawai. Nunin asag Tuke Pujuu anentag suwamunash ajaantus diitsuk dita wakegamun takajaku ainawai.
18 Untsu uchi Samuelak Tuke Pujuunak shiig umijujakui.
Nuniau asa nigka sacerdote nugkutai lino apagbau efod tutain nugkujakui.
19 Tuja maki makichik mijantin niina dukuji apajijai Apajuí jee pegkegmanum jegawag kuntinun maa apeenak Apajuín ememattatus weakug niina uchiji Samuel nugkugtin jáanch apagbaujin juki wejakui.
20 Nuniau asamtai Elí, Elcanán Anajai pegkegnum yumigkiak: “Juju uchin Ana Tuke Pujuun anentag susa duwi, Tuke Pujuu Anayai nuni kuashat uchijum aidaun amastí”, tiuwai.
Tusa tima dita jeen waketjajui.
21 Nuadui Anak Tuke Pujuu pegkegnum yumigkiamu asa, kampatum uchi aishmagkun, jimag nuwan aatus uchigmakui. Tuja Samuelak Tuke Pujuu kuitabau asa, nuwig niina takajak pujusa tsakau.
22 Tuja Elík múuntuch aajakui, tujash niina uchiji aidau Israel aents aidaun waitkainawai tabaun ashí dekauwai. Tuja Apajuíjai chichatai jega pegkejam jegamkamua nuna waitijin nuwa aidau kuitamin aina nujaishkam kanuinawai tabaun dekauwai.
23 Nunik dekaa ditan chichajak:
“Atum pegkegchau takainamun ashí aents aidau ujatkaje. ¿Wagka dusha anísh batsatjume?
24 Mina uchig aidauwah, atum aniajum duka shiig pegkegchauwai. Atum aniakjum tikich aents Tuke Pujuun nemajin aidau bakuagme, wagki atum pegkegchau dutikamun tikich aents aidau nuna augmatu yujaidaun antukjai.
25 Makichik aents tikichin kajejaunak, Apajuí diisa ayamjumainai. Untsu aents Tuke Pujuun kajejaun ayamjumainuk makichkish atsawai”, tiuwai.
Tusa tamash, ditak apaji chichamenak antugkachajui, wagki Tuke Pujuu ditanak jinaati tibau asag.
26 Untsu Samuelak nuni senchi muumpau. Nunitai Tuke Pujuu shiig anentau, tuja aents aidaushkam shiig anentuidau.
27 Tuja nunú tsawantin Apajuí chichame etsejin Elín ijagsatatus jegajuauwai. Nunik jegajua chichajak:
“Amina apachjum aidau Egipto nugkanum faraógka inaku waitkatai batsatun wi mina senchijun ditan iwaintukuitag nuna dekati Tuke Pujuu tujamui.
28 Israel aents aina nuwiyan Leví wegantu aidaun etegkauwaitjai mina sacerdoteg agtinme tusan. Dutika ai mina emematjuinak kuntinu maawag nuna nejen ashí apeatnume, tuja kugkuin incienson apeatnume, jáanch sacerdote nugkutainashkam nugkugtinme tusan. Tuja Israel aents aidau anentag sujusbau aidaun mina emematjuinak apeena nunashkam yuwatnume tusan amina apachjum aajaku aina nuna tiuwaitjai.
29 Nunin aish, ¿wagka wi dutikatajum timawa nunú dutiktsukesh dakitjagmesh idaisaugme? Amek amina uchijum aidau mina nagkaetasu puyatjau asam, Israel aents aidau mina anentag sujuinamua nunú jukim ayu ayugkawam uduekume.
30 “Dutikau asamin Tuke Pujuu Israel aents aidaun Apajuíji mina takagtin atinme tusa tujabiuwa nunú chichaak: ‘Wi atumnak mina takagtustinme tusan etegkauwaitjime. Tujash duka yamaik makichkish uminkashtatui. Wika mina eme anenjuina nuna eme anentatjai. Untsu mina dakitjuina nunak wishakam dutiksanuk dakitjattajai.
31 Amina uchijum aina duka yamai nagkamsag sacerdote achagtatui. Nuadui ame wegantu aina duka múuntuch wetsuk datsaitak jinawagtatui.
32 Untsu amek tikich Israel aents aina nuna wi yayaakui nunú diisam ame waitiakum dita kajegtinaitme.
33 Tuja ame wegantu aina nuwiyan sacerdote atinme tusan wi ujumak apusamu akushkam, duka wainmachujai betek tikich aidau takagtai nuna diisag kajenak wake besemag dekapenak buutiagtinai. Tuja ame wegantu aidauk múuntuch wetsuk datsaitak jinawagtatui.
34 “ ‘Tuja amina uchijum aidau Hofní, Fineesjai makichik tsawantaik mai jakattawai. Nunikmatai dekaattame dekaskeap tujutne tusam.
35 “ ‘Nuadui tikich wegantunmayan wi kajittsa anentamujun, tuja mina chichamjun betek umiktinun, sacerdote atinun makichik etegkattajai. Dutikan niina uchiji wegantu aidaunash megkaejainum tusan kuitamkattajai. Nuadui ditak wamak jinutsuk kuashat tsawan batsatu asa apu wi etegkamua nunú tabaun umigkatnume titatjai.
36 “ ‘Nuadui ame wegantu jinaachu aidauk nunú sacerdoten jegajuawag ujumak kuichkin, yutaijai segainak tikishmatiagtinai. Nuninak, minash takat sujusta wisha takasan yumainun sumapaktajai wajagtinai’, tujamui Apajuí”, tusa tiuwai.