2
David Judá wegantu aidaun apuji wajasbau
Saúl Jonatágjai jakamtai, David ditan eme anentus kantamjuawa nunú nagkaemakmatai pujus Tuke Pujuun iniak:
“¿Tuke Pujuuwah, wi mina aentsug aidaujai filisteo nugken pujag nunash, Judá wegantu aidaun yaaktajinish pujumainchaukaitag?” tau.
Tutai Tuke Pujuu ayaak:
“Ehe, wemainaitme” tiuwai.
Tama David iniak:
“Tujash ¿tuu yaaktanum wemainaitja?” tau.
Tutai Tuke Pujuu ayaak:
“Yaakat Hebrón wetá”, tiuwai.
Tusa tima David niina nuwe jimag: Ahinóam yaakat Jezreelnumia aajakua nuna, Abigail waje Nabala nuwe yaakat Carmel pujujakua nujai mai juki weuwai. Nunik wegak nuigtushkam niina kumpaji suntag aidaun patayi aidaujaí yajuakui. Nunik yaakat Hebrón jegawag, nuna yantamen tikich yaakat ayaunum nuwi batsamsauwai.
Nuwi pujuttaman Judá wegantu aidau ujumak kautuawag, aceiten juki Davitan buuknum nijakag apu adaikajui. Davitak Judá wegantu aajakui.
Apu adaikam pujai, Galaad nugkanum yaakat Jabes batsamin aidau Saúla iyashin juki ukusaje tabaun dekauwai. Nunik dekaa ujumak aents chichama etsejin aidaun akateg ishiakui. Nunú jegawag chichama etsejuinak:
“Aatus apu David tawai: ‘Atumek Saúl wait anentuidau asajum niina iyashi jukijum ukusu asagmin, Tuke Pujuu pegkegnum yumigsatnume. Nunú dutikaujum duka dekas shiig pegkeg aikaugme. Atumek dekas pegkeg ainagme. Nuigtushkam Tuke Pujuu wait anenjamak makichkish kajimatjamtsuk kuitamjamkatnume tajai. Tuja wishakam atum pegkeg dutikau asagmin shiig kuitamkattajime. Nuadui ichichmamjajum wajiu wajastajum, wagki atumi apuji Saúl jakau ataish Judá wegantu aidau mina apu adaitukaju asamtai, wi yamaik atumi apujig atatjai’ tujamui”, tiuwai.