3
Ya Metabarang Ta Seatawa
1-2 A ikamuy hapa babay nga seatawa a timuluk kam hapa ta āttawa muy, te maski am aweda para la mangurug ta uhohug na Namaratu a mabalin ta mauli ya nonot da gafu ta kappya na tarabaku muy ikid na talaw muy ta Namaratu, maski awan ta mauhohug muy tekid.
3 A bakkan mina ta kaispot na huk muy ikid na barawasi muy ya pake pakolangan muy, te bakkan ta yen ya kakurugan na ispot.
4 Mapmappya hud la ta nonotan muy ya masippat ikid na magintak ta nonot muy, te ye-yen na ispot ya awan magdan, ikid na dayawan na Namaratu ewan.
5 Kumanen ya kaispot na popolu kiden babay nga nangikatalak ta Namaratu ta idi, te timuluk kid hapa ta āttawa da.
6 Ta kuman ni mina Sara en a timuluk hala ta atawa na en Abraham, te nekwenta na ta dafu na. A am mappya hapa ya tarabakun muy gafu ta awan ta burungan muy ta dulay a negitta kam hapa te mina Sara en.
7 A ikamuy hapa nga lālāki a nonotan muy ta pake makāfuy ya bari na āttawa muy ammi ta bari muy, a iddukan muy kid mantu, te mesipat kid hapa tekamuy ta magnayun na angat nga neatad na Namaratu tekamuy. A iddukan muy kid mina petta awan ta mangsalin ta pakimallak muy.
Ya Metabarang Ta Mazigatan
8 A ya mabidak hapa tekamuy ngamin a pagdadaggan muy ya nonot muy, ikid na magkaid-idduk kam ta kuman na magkabagis, a makipagrikna kam ta kahulun muy kidina, ikid na magkapaspasensa kam.
9 A awemuy la ibalat ya dulayen, te atadan muy hud la ta mappya, te yen ya gafu na nepangalap na Namaratu tekamuy petta maatadan kam hapa ta mappya.
10 Te ya uhohug na Namaratu ta lebru na en a
“Ya mayat matolay ikid na makagamid ta mappya a mappya ta awena maguhohug ta dulay ikid na awena magladdud,
11 am awa pagtalekudan na mina ya ngamin dulay, petta mangwa ta mappya.
A pake apagan na mina ya pakikappya na ta sakā tolay na kiden, petta yen la ya nonotan na,
12 te kumanen hapa ya taronan na Namaratu, a dangagan na hapa ya pakimallak na.
Ammi ta mangwa en ta dulay a pagporayān na hapa,” kunna.
13 A am malogon kam mantu nga mangwa ta mappya a itta hud sangaw mangigakkad tekamuy?
14 Ammi maski am angarigan ta mazigatan kam gafu ta mappya ya tarabakun muy a matalak kam mina, te pasinapān na kam na Namaratu ewan. A awemuy mantu italaw ya makitapil tekamuy, ikid na awemuy burungan ya kwan da tekamuy,
15 te mapmappya ta dana itug muy ikid na bikulan muy ya talaw muy ta dafu muyewan Hesus. A dana nakaparan kanan mina talo am itta sangaw ya mangibar ta gafu ta pangurug muy tentu, petta itta ya tabbag muy.
16 Ammi itan muy ta awemuy pasinapān ya dulay ta nonot muy, te malapat mina ya tabbag muy.
A isipat muy hapa ya alinnak na nonot, petta maski am padpadulayan da kam a awemuy la pasinapān ta nonot muy, te mas bali mamatan kid am maita da ya kappyanan na pangurug muy te Hesus.
17 A am uray na Namaratu ta mazigatan kam gafu ta mappya ya tarabakun muy a matalak kam la, te mapmappya haman yen ammi ta mazigatanen gafu ta tarabaku na en nga dulay.
18 Te intu mina pagnonotan muy i Hesusen tentu en nasi nga nangikaru ta liwat tam kiden. Te intu haman ya matunungen, ammi nazigatan haman gafu ta kadulay na kadwan, petta ikitam nga dulay ya padatangan na ta Namaratu ewan.
A ta nepangpapasi da tentu a nesipat hapa ya bari na en ta zigat ta kuman na ikamuy, te kagitta tam tolay haman. Ammi ta kabalin na pasi na en a natolay hala ta kuman na bari na en, ammi negitta ta Namaratu ewan.
19 A gafu ta pangabak na ta pasi a enna hapa nepasikkal ta anitu kiden nga nabalud ta agyan na sugiram.
20 A ya anitu kiden hapa a ikid hala ya anghel kiden nga nagsoysoy ta Namaratu ewan ta araw ni mina Nowe en, te sa nagdadorug kid na tolay kiden. A nabayag hapa ya nepagattam na Namaratu ta tolay kiden, te awena kid bit pa-gangan talo am itta ya magbabawi tekid. Te indagan na hapa ya kabalin na baporen nga nepapadday na te Nowe petta ahatan da mina ta paglayus na danumen. Ammi pake assang la ya simarok ta baporen, te walwalu la ya natolay ta kabalin na layusen.
21 A ya pakalasat na walu kiden ta layusen a yen hapa ya keangarigan na nepagzigut muy ta danum, te gafu ta pagzigut muyen a nesipat kam hapa ta pasi ni Hesus ikid na katolay na en petta mekerutan kam. Te am nabalin na nagzigut ya nedagga te Afu Hesus a bakkan ta bari na en ya nabaggawan am awa nonot na en gafu ta kari na en ta Namaratu ewan.
22 A gafu ta natolay hapa i Hesusen a ittan ta lugar na Namaratu ewan nga makipagturay hapa tentu, a timuluk hapa tentu ya ngamin kiden anghel ikid na magturay nga seppakapangwa.