16
Agar tu Ismael
Itzun bantz yi tele'n tiemp quinin tzun jal tal Sarai yi txkel Abram na qui'c talbil i'. Poro at tzun jun mos i' yi najlij scyuch', yi aj Egipto i', nin yi bi' i' i'tz Agar. Bene'n tzun tlol Sarai tetz Abram:
—Qui nin ntak' Ryos ama'l swetz tan chijale'n wal, cha'stzun te na cu' inwutz teru' ta' tan cyok'bel quibu' tu inmos Agar, nin yil jal chinitxajilu' tuch' ba'n tzun tz'octz chi k'ajbil wal.
Nintzun cu'-tz swutz Abram yi xtxumu'n Sarai. Ej nintzun saj tcy'al Sarai yi mosa'tz tetz Abram. Yi baje'n yi xtxolbila's ya'stzun yi nsken el lajujix yob yi chinajle'nix Canaán.
Itzun yi chiwitbej quib Abram tu Agar nintzun tekaj pwokil jun ni'. Poro yi tele'n xtxum Agar tetz yi ẍe'n tane'n i', nintzun oc tan xbajtzije'n Sarai yi patrón. Ma Sarai nintzun taltz tetz Abram:
—Aẍ aj paj yi na tzan Agar tan telse'n ink'ej wech na in te'nin nnak'on tzatz tan toque'n tetz awuxkel, ma jalu' tantu' yi sjalok tal, na tocsaj tib nim tzinwutz. Nin qui'c wetz inxac swutz i'. Ma jalu' cho'n sak swutz Ryos na'j scyetz aj paj skaxo'l tzawuch', aẍ pelo' atz nka in tzun wetz, stzun Sarai tetz Abram.
—Yi amos cho'n at jak aca'wl, banaj bin awajbil te'j, stzun Abram bantz.
Yi tbital Sarai yi yol Abram nintzun xe'tijtz tan jisle'n nin tan buchle'n Agar, jalen cu'n yi tele'n ojkujtz.
Itzun te yi tele'n ojkuj Agar, cho'n tzun noje'n quen i' swutz jun ángel tetz Ryos le jun ama'l yi tz'inunin tu', xlaj jun tal bo'm, cy'anl tetz yi be' yi na opon jalen Shur. Nintzun ben jakol yi ángel tetz:
—¡Agar! Aẍ jun c'oloj mos Sarai, ¿Na ncẍsaje't, nin na' ncẍbene't? stzun ángel Ryos tetz Agar.
—Ojke'n bin mimbane'ltzaj wetz swutz wutzile'n na' Sarai yi impatrón.
Bene'n tzun tlol yi ángel tetz Ryos tetz:
—Quilo'k, ba'n ẍpakxijt tuch' yi apatrón nin nque'n c'ulutxum jak' ca'wl i'. Nin ba'n tzaban cyakil yi mbil tal i' tzatz.
10 Ej ncha'tz tal yi ángel tetz Ryos tetz:
“Ẍchipuc'unk cyakil yi e' axonl wa'n,
nin cya'l nin jun nink xcye' tan cyajle'n.
11 Bintzij nin, eka'n pwokil jun ni' awa'n.
Ej nin xicy sbne' yi awal.
Nin yil tz'ul itz'ok ba'n tz'oc bi' awa'n tetz Ismael.*
Ya'stzun bi' sbne'-tz na ja opon to'k yi atzi' yi akul swutz Ryos.
12 Chin macle'n nin sbne' yi awal.
Ni'cu'n sbne' tu jun txuc yi chin smaron nin.
Stz'oyintzink scye'j cyakil wunak.
Ej nin cyakil wunak ẍchoyintzink te'j i'.
Yi e' xonl i' ẍchijunaje' quib scyuch' e' titz'un.
Ej nin cho'n ẍcha'tok jalen lilen tzi'n,” stzun ángel bantz.
13 Ej nin tantu' yi ja chijilon Agar tu Kataj nin jalt junt bi' Ryos ta'n. Ej nin i'tz: “Yi Ryos yi na ko' til.” Na nin tal i'-tz “Ja chin til Ryos, poro qui nin nchinquim ta'n, na itz'ine't.” 14 Cha'stzun te toque'n bi' yi jun a'a'tz ta'n tetz: “A' tetz yi jun yi itz', nin yi na ko' til.” Yi jun a'a'tz cho'n at xo'l Cades tu Bered. 15 Ej itzun bantz yi tule'n yos tu Agar, nintzun oc tk'ol Abram yi bi' yi ni' tetz Ismael. 16 At tzun Abram tul jun mutx' tu kak yob yi titz'e'n Ismael.
* 16:11 “Ismael” na elepont “na tbit Ryos” le hebrey. 16:14 Gn 24:62; 25:11. 16:15 Gl 4:22.