102
Oración tetz jun yi na sotz c'u'l
1 Wajcaw, tbite'u' yi intzi' inkul na na chinẍch'in swutzu'.
2 Quil tewu' yi wutzu' tzinwutz.
Nin yil tz'ul e'chk sotzaj c'u'lal tzinwutz, nink tbitu' yil cu' inwutz teru'.
3 Na or ne'l cu'n swutz.
Cho'n wutane'n chi na ban sib yi jalcu'n na xit cu'n tib, ma yi imbakil nternin na chitxukne', na tzan chilo'one'n.
4 Qui'ct walor yi walma'.
Cho'n cunin tane'n chi na skej jun wi' xtze'.
Nin qui't na chinwan tan paj.
5 Nin tan paj bis o'kl yi atin cu'nt jalt nin imbakil eka'nche' wa'n.
6 Inchuc atin. Cho'n cu'n wutane'n chi tane'n jun tucruj yi ẍchuc at le e'chk ama'l tz'inunin tu', nin yi cho'n at yi soc tulak e'chk ama'l kale qui'cle't jun tuch'.
7 Qui't na oc inwatl.
Nin cho'n wutane'n chi tane'n jun ch'u'l yi ẍchuc at wi ẍchejbil ca'l.
8 Cyakil nin k'ej na chitzan yi e' incontr tan imbuchle'n.
Nin na xcon imbi' cya'n tan tak'le'n caws jun.
9 Qui't na chinwan tan paj bis.
Nin tan paj o'kl, at na bant cu'n na ben ta'al inwutz le wuc'a'.
10 Wajcaw, cyakil yi e'chk takle'na'tz yi ja ul tzinwutz, i'tz tan paj yi nsaj colp wi'u' swe'j.
Ntin ntak'u' ink'ej, nin ilu' te'n mma'jt tan telse'n junt tir.
11 Yi ank'i'n yi ak'ij tanu' swetz tzone'j wuxtx'otx' jalcu'n na icy' chi na ban mujil sbak'.
Nin chinquimok chan chi na ban jun xtze' yi jalcu'n na skej.
12 Poro yi teru' Wajcaw, ilenin atu' sbne' opon tunintz.
Nin ilenin sna'wsok yi bi'u'.
13 Wajcaw, xcyeke'nu'. Elk k'ajabu' te yi tnumilu' yi at wi'wtz Sión.
Na ja jepon yi tiemp tan tele'n k'ajabu' te'j, nin tan cuyulu' paj.
14 Na cyakil yi e' ẍchakumu' yi najlche' le yi jun tnuma'tz na chipek' te'j.
Poro na chibisun, na cu'nak xit.
15 Poro cyakil yi e'chk nación scyuch' chireyil, chocopon tan tak'le'n k'eju' ilu' Wajcaw,
16 yil tz'ul tzaju' tan banle'n ba'n tetz yi jun tnuma'tz yi at wi'wtz Sión nin yil lajluchax yi k'eju'.
17 Chocopon tan tak'le'n k'eju' yil quil nin yi na tbitu' chi'oración, nin yi qui't slamu' yi ẍchinu' tan tbite'n yi cyajbil yi e' yi cya'l jun na pek' tan quich'eye'n.
18 Lok cyaj tz'iba'n yi xtxolbile'j tan quibital yi e' yi xomche' tzaj, yi e' yi txe'n chitz'ij, bantz cyoque'n tan tak'le'n chik'ajsbil teru'.
19 Yi Kataj ja xmayin tzaj i' jalen tzi'n tcya'j le yi tetz ama'l yi chin xan nin.
20 Na ja tbit i' chitzi' chikul yi e' yi ate' pres bantz cyele'n liwr yi e' yi ja wi't ak'lij chicaws tan chiquime'n.
21 Ya'stzun tulej i' bantz cyoque'n cyakil wunak bene'n tzi'n wi munt tan tak'le'n chik'ajsbil tetz i' le ama'l Sión, yi i'tz Jerusalén.
22 Na, chu'l cyakil yi e' wunak lakak nación tan c'u'laje'n Kataj.
23 Ma yi in wetz, ja wi't el inwalor ta'n.
Wech na ana' na chinnicy'an tu yi ank'i'n yi ak'ij ta'n swetz.
24 Poro nin waltz tetz:
“Ilu' inRyosil. Quil chin tcy'aj nin chanu'.
Na ana' na chinnicy'an tu yi ank'i'n yi ak'ij tanu' swetz.”
Yi ilu' teru' qui'c quimbilu' sbne' opon tunintz.
25 Ilu' cu'san yi wuxtx'otx' tentz, nin ilu' bnol tetz yi tcya'j.
26 Yi e'chk takle'na'tze'j, sotzok tera'tz.
Poro yi ilu' teru', quil sotzu'.
Tz'a'toku' tetz ben k'ej ben sak.
Sbu'yink yi wuxtx'otx' tu yi tcya'j chi na bu'yin jun be'ch ketz.
27 Na yi wuxtx'otx' tu yi tcya'j ni'cu'n tu jun be'chok yi na el te pe'm.
Chelepon cye'tz te pe'm, nin sbnixok ac'aj tcya'j tu ac'aj wuxtx'otx'.
Poro yi ilu' teru', iẍnin atu'-tz.
Qui'c quimbilu' tetz ben k'ej ben sak.
28 Tz'ocoponu' tan chiq'uicy'le'n yi chixonl yi e' ẍchakumu' tan qui chixobe'n tetz jun, na yi ilu' teru' tz'ocoponu' tan chiquiwse'n.