110
Stk'e' Ryos k'ej yi kareyil
1 Yi wutzile'n Kataj Ryos, ja tal i' tetz Wajcaw: “C'olchen cu'n tzinxlaj, jalen cu'n yil cho'c yi e' acontr wa'n jak' awukan.”
2 Cho'n tz'ak'lok yi k'eju' tan cawu'n le tnum Sión, nin mben lo'on yi ca'wlu' jalen yil cho'c cyakil yi e' contru' jak' tkanu'.
3 Nin yil xcye'u' te cyakil yi e' contru'a'tz, ẍchijatxe' quib yi e' tanumu' jak' ca'wlu'. Na chu'l nil cyakil yi e' xicy tan ẍch'eye'nu' te yi oyintzi'. Nin yil chu'l, jopxok cyakil yi e'chk ju'wtz yi at Sión cyak'un chi na ban yi k'ab che'w yi na ul skil.
4 Ej nin ncha'tz at jun yol yi suki'nt tan Kajcaw kaRyosil yi qui'c rmeril yi qui'k tz'el cu'n i' te'j, i'tz:
“Yi aẍ awetz aẍ pale' tetz ben k'ej ben sak, na ni'cu'n amunl chi yi munl Melquisedec.”
5 Ma yi Kajcaw yi kaRyosil xomok tzawe'j tul oyintzi'. Nin yil saj colp wi' i' scye'j yi e' rey ẍche'lk cu'n ta'n swutz.
6 Stk'e' i' chicaws yi e'chk nación, nin chin tenaji'n nin ẍchibne' alma' ta'n. Nin ẍche' cambaje' i' cyakil yi rey yi ate' bene'n tzi'n wi munt.
7 Ej nin te yi na xon Kajcaw tul oyintzi'a'tz, sbajk yi tal a' ta'n yi na xon lakak e'chk siwun. Nin tan yi tal a'a'tz sjalokt walor i' tan chibiyle'n cu'n mas yi e' contra'tz.