116
Katyoẍink tetz Ryos
Wi'nin na chimpek' te Kajcaw, na ja tbit i' intzi' inkul.
Na na tak' ama'l tan tbite'n yi mbi na injak tetz.
Cha'stzun te ilenin tzinna'wse' yi tetz bi'.
Jalt nin tan waje'n ẍchixo'l yi e' alma', na nsken chintx'amxij tak'un quimichil.
Poro ja oc Kajcaw tan impujle'n.
Quimichtlen tu' atine't yi mme'l intzi' tetz Kajcaw tan jakle'n ẍch'eybil wetz.
Cho'n me'l intzi' tetz i', na i' inRyosil.
Nin ja opon to'kl walma' kale atite't i'.
Cha'stzun te, ja tbit i' yi intzi' inkul.
Na el k'ajab i' ske'j.
Nin yi na oc i' tan pujle'n xtisya', qui na xom wi' te jun mal nak.
Bintzi nin na el k'ajab i' ske'j.
Na oc i' tan chicolche'n yi e' sloj wunak.
Na yi woque'n wetz wutz pe'm, ja oc i' tan wuch'eye'n.
Cha'stzun te, jalu' qui'ct tzimbislej, na chumbalaj nin ban i' swe'j.
Na ja ne'l liwr ta'n tk'ab quimichil.
Qui't na el ta'al inwutz jalu'. Qui't chinje' trimp.
Te yi cobox k'ej yi atin tzone'j ẍchixo'l yi e' yi itz' e', tzinjoye' puntil tan qui injuchul wil swutz i'.
10 Ilenin ja k'uke' inc'u'l te Wajcaw.
Wech na sken el intxum tetz yi nim il wutane'n.
11 Te yi atin tul sotzaj c'u'lal, cya'l jun oc tan wuch'eye'n.
Cha'stzun te walol: “Qui'c rmeril tan k'ukewe'n kac'u'l te jun, na e' cu'n la'j.”
12 ¿Ẍe'n tzimban tan ẍchojle'n tetz Kajcaw yi mbi cu'n ban i' swe'j?
13 Swoye' yi jun lak ta'al uva teru' Wajcaw, na yi jun laka'tz na ẍchaj yi na chintzatzin, na ja chincolpij tanu'.
Ilenin tzinna'wse' yi bi'u' yi na no'c tan tyoẍi'n teru'.
14 Nelepon cu'n te yi inyol yi insuknak teru'.
Nin ẍchiwutz cunin yi e' nim juy, tzimbne' tane'n yi e'chk takle'n yi insuknak teru'.
15 Wi'nin na bisun Kajcaw, yi na chiquim yi e' tetz, yi e' yi xansa'n che' ta'n, yi e' yi cho'n k'uklij chic'u'l te'j.
16 Ilu' Wajcaw, in ẍchakumu', in xconsbe'tzu'.
Nin in tal yi ẍchakumu'.
Ja ne'l liwr tanu', na ja xcye'u' tan pujle'n yi e'chk akwil, yi c'albil wetz.
17 Swak'e' intx'ixwatz teru' yi na ẍchaj yi na chintyoẍin teru'.
Nin yil no'c tan tyoẍi'n teru', ilenin tzinna'wse' yi bi'u' Ta'.
18 Nelepon cu'n te yi inyol yi insuknak teru'.
Ẍchiwutz cunin yi e' nim juy tzimbne' tane'n yi e'chk takle'na'tz.
19 Tzimbne' tane'n le tnum Jerusalén.
Tzimbne' tane'n le teru' ca'lu'.
Kak'e' bin kak'ajsbil tetz Kajcaw, yi kaRyosil.