122
At wi'nin k'ej Jerusalén
1 Chumbalaj nin na wil yi na cyal swetz:
“Quin xe ca'l Kajcaw, tan c'u'laje'n i'.
Quin xe ca'l yi kaRyosil yi at Jerusalén,” che'ch swetz.
2 Nin yil kocopon le tnuma'tz, nin yi na ko'c tul yi tapij yi at solte'j,
3 na kanachon te'j yi i'tz yi tnum yi bnixnak tan kamolol kib tul, cyakil yi o' yi o' xonl Israel.
4 Na cho'n na kamol kib cyakil yi o' xonl Jacow tul, tan tak'le'n kak'ajsbil tetz Kataj, chi alijt cyen ta'n scyetz kamam kate'.
5 Nin i'tz yi tnum kale e' c'olewe't yi e' rey, yi e' xonl k'ajtzun rey Luwiy, tan pujle'n xtisya' sajle'nix tunintz.
6 Nachwok bin Kataj tibaj Jerusalén, tan jale'n tzatzin paz tc'u'l.
Nin nachwok Kataj tan jale'n tzatzin paz squibaj yi e' wunak yi na chipek' te'j.
7 Ncha'tz nachwok Kataj squibaj yi e' yi najlche' tul tapij yi at solte'j.
Nachwok Kataj, yi qui'k ljal xo'w scye'j yi e' yi najlche'-tz tul.
8 Ncha'tz na cu' intzi' tan jakle'n yi tzatzin paz tibaj, na at e' inxonl, nin at e' wamiw yi najlche'-tz tul.
9 Nin ncha'tz tan tu' yi at yi ca'l Kataj Ryos tul, na cu' intzi' tan tk'ol i' yi banl tibaj.