138
Jun oración tan tyoẍi'n tetz Kajcaw
1 Wajcaw, tetz cu'n walma' chintyoẍink teru', nin swak'e' ink'ajsbil teru' ẍchiwutz cu'n yi chiryosil yi e' mas wunak.
2 Yil chinmeje', cho'n tz'ajnin inwutz kale atite't yi ca'lu', yi wi'nin xanil.
Na ẍchinmejek tan tyoẍi'n teru' tan yi banl talma'u'.
Nin ẍchinmejek tan tu' yi na el intxum tetz yi nk'e'tz ilu' la'j.
Nin ẍchinmejek tan tu' yi at mas k'ej yi bi'u' tu yi yolu', swutz cyakil e'chk takle'n yi at.
3 Yi cwe'n inwutz teru', ja stza'weju' yi intzi' inkul nin ja tak'u' junt tir inwalor.
4 Cyakil yi e' rey yi ate' bene'n tzi'n wi munt, chocopon len tan tak'le'n chik'ajsbil swutzu', yil quibit yi mbi'tz yi suki'nt tanu'.
5 Chocopon tan tak'le'n chik'ajsbil teru' tan cyakil yi txumijt tanu'.
Na yi ilu' teru' Wajcaw, wi'nin teru' k'eju'.
6 Mpe cho'nk atu' tu yi k'eju' jalen tzi'n tcya'j, ilenin na ocu' il scye'j yi e' prow yi ajnake' tzaj.
Ma yi e' yi na cyocsaj quib nim tu cyajtza'kl qui na ocu' il scye'j.
7 Te yi atin tul sotzaj c'u'lal tan paj yi e'chk il, ilenin atu' tan wuch'eye'n.
Xomij yi poreru' tan wuch'eye'n.
Nin na chinclax tanu',
ẍchik'ab yi e' incontr, yi nternin na chi'ch chic'u'l swe'j.
8 Wajcaw, tzatzin cu'n jeponu' tan banle'n yi teru' tajbilu' yi txumijt tanu' swe'j.
Na yi banl talma'u', quinin bajsbe'n tetz.
Qui bin ltx'akbaj cyenu' yi ja wi't xe'tiju' tan banle'n swe'j.