140
Oración tan toque'n Ryos tan kacolche'n
1 Ta', chin cole'u' ẍchik'ab yi e' mal nak.
Chin q'uicy'leju' ẍchik'ab yi e' aj biyonl.
2 Yi e' yi ntin oyintzi' na chitxum, qui'c jun tkuj yi qui'k na choyintzin.
3 Chin ch'on nin chijilon chi ẍch'onal yi na kalo'on tan jun lu'baj. Ni'cu'n chijilon tu wenenil jun lu'baj.
4 Ta', chin q'uicy'leju' ẍchik'ab yi e' mal naka'tz.
Chin q'uicy'leju' ẍchik'ab yi e' aj biyonl, yi e' yi na chitzan tan joyle'n puntil tan inxite'n.
5 Na yi e'a's yi na cyocsaj quib nim tu cyajtza'kl ja bnix tramp cyak'un tan incwe'n tul. List tane'n e'chk leb tu akwil tan intz'amle'n. Ja wi't cu' cya'n le imbe'.
6 Je inyole'j yi wal tetz Kajcaw: “Ta', ilu' inRyosil. Tbit tzaju' bin yi intzi' inkul. Ilu' colol wetz nin chin cham nin ilu'.
7 Ilu' na colon inwi' yi na chu'l incontr tan oyintzi' swe'j.”
8-9 Ta', qui'k tak'u' ama'l scyetz yi e'a's tan chibnol yi cyajbil.
Qui'k tak'u' ama'l tan chibnol yi e'chk takle'n yi ja wi't baj chitxumul.
Na yi e' incontra'tz nternin na cyocsaj quib nim, na le chiwutz cyetz ja wi't chitx'acon.
Poro e' te'n nink chicu' tc'u'l chitxumu'n yi ja wi't baj chitxumul.
10 Lok saj jun chin k'ak' tanu' tan chisotzaje'n.
Che' jo'lninu' tul e'chk julil a' kale qui'cle't rmeril tan cyele'n tzaj.
11 Quil tak'u' ama'l scyetz e' aj jisonl tan cya'te'n skaxo'l tzone'j wuxtx'otx'.
Lok xom yi il scye'j yi e' aj biyonla'tz tan chixite'n cu'n.
12 Poro na el intxum tetz Ta', yi na ocu' tan pujle'n xtisya', qui na tak'u' quil yi e' me'ba' yi ko qui'c cyetz quil.
Ma na na ocu' tan chicolche'n yi e' yi buchijche'.
13 Yi e' balaj wunak cyak'e' k'eju', yi e' yi tz'aknak cu'n e', ya'stzun yi e' yil ẍchinajank te'ju'.