36
Yi stze'tzal tajtza'kl jun yaj
1 Ite'n nin yi yab ajtza'kl yi at te cyalma' yi e' mal nak, ya'stzun yi na a'lon scyetz, yi qui tajwe'n tan cyak'ol k'ej Ryos nka yil cyek ẍchi' i'.
2 Yi e'a'tz, na cyocsaj quib tz'aknak cu'n.
Nin le wutz cyetz cyajtza'kl chumbalaj nin yi e'chk takle'n yi na chitzan tan banle'n.
3 Chin cachi' nin chijilon. E' cu'n la'j.
Qui na chixom te yi ajtza'kl balaj.
Qui't na chitzan tan banle'n yi e'chk takle'n yi na chiban yi e' yi at cyajtza'kl.
4 Yi na chicoye' wi chitx'ach, ntin na cho'c tan xtxumle'n yi e'chk ajtza'kl cachi'.
Xomche' te e'chk ajtza'kl yi nk'e'tz balaj.
Nin qui na cyaj chicyajscyen yi e'chk ajtza'kla'tz.
5 Poro yi teru' Wajcaw, wi'nin xtxaxl talma'u' skibaj, na icy'nak cu'n swutz yi tcya'j.
Ba'n k'uke' kac'u'l te'ju', na na el k'abu' te yolu'.
6 Yi cawunu' chin tz'aknak cunin.
Ni'cu'n chi e'chk wutz yi qui na yucan.
Nin yi xtxumu'nu' chumbalaj nin, nin quinin bajsbe'n tetz.
Ni'cu'n chi tane'n yi a' yi at xe mar.
Nin ilu' q'uicy'lom cyetz cyakil wunak nin cyakil txuc.
7 Chumbalaj nin yi teru' balajilu' ske'j, na ilu' kaRyosil.
Nin na ko' ẍch'eyaju' cyakil o' yi cho'n na kacol kib te'ju'.
Na ba'n na kacol kib te'ju' chi na chiban yi e' ne'ẍ q'uitx, yi na chicol quib jak' xicy' yi chitxu'.
8 Na noj cu'n kac'u'l yi na kawan tanu' xe ca'lu'.
Nin yi na kuc'a' te yi balaj a' yi na tak'u' sketz.
9 Na cho'n na saj yi itz'ajbil te'ju'.
Nin tan ilu' na lajluchaxe't yi e'chk balaj ajtza'kl skawutz.
10 Tak' tzaju' bin yi teru' banlu' yi chin tz'aknak cunin, skibaj yi o' yi ato' tk'abu'.
Tak' tzaju' yi balajilu' ske'j yi o' yi jicyuch te kajtza'kl.
11 Quil tak'u' ama'l scyetz yi e', yi na cyocsaj quib nim tu cyajtza'kl tan inyak'pe'n.
Ma na tk'e'u' inwalor tan qui wele'n ojk ẍchiwutz.
12 Ma jalu', quile'u' yi ẍe'n nchilo'on yi e' mal naka'tz.
Ja wi't chicu' trimp, nin qui'ct rmeril tan chixcyewe'n cu'n junt tir.