40
Kak'e' kak'ajsbil tetz Kataj
Ja injak ẍch'eybil wetz tetz Kataj.
Nin ja jal impasens tan ẍch'iwe'n.
Ja tzun stza'wej i' inyol.
Ja tbit i' yi intzi' yi inkul, nin ja ne'l tzaj ta'n tul e'chk sotzaj c'u'lal.
Ja chinclax ta'n. Nin ja chimbixe' junt tir ta'n.
Nin ja ẍchaj i' yi balaj be' swetz.
Na ja tak' i' ama'l swetz tan wuk'ol e'chk balaj k'ajsbil tetz i'.
Swak'e' bin ink'ajsbil tetz i' tetz cu'n walma'.
Nin cyakil yi e' yi ja quil yi mbi cu'n mban i' swe'j, ja k'uke' mas chic'u'l te i'.
Ba'n cyeri yi e' yi cho'n k'uklij chic'u'l te Wajcaw, nin yi qui k'uklij chic'u'l scye'j yi e' mal nak.
Nin ba'n cyeri yi e' yi qui na xom chiwi' scye'j yi e' yi na cho'c tan chic'u'laje'n yi e'chk ryos yi banij cuntu'.
Wajcaw, ja bnix wi'nin e'chk milawr tanu' tan wuch'eye'n.
Na wi'nin banl talma'u' swibaj.
Quil chinxcye' tan talche'n cyakil yi mbi mbanu' swe'j, na nimix cunin banl talma'u' swibaj.
Nk'era'tz tajbilu' yi e'chk tx'ixwatz tu e'chk oy yi na oyij teru', na qui na tzanu' tan jakle'n yi e' txuca'tz, yi na patij tetz chitx'ixwatz wunak, nin qui na tzanu' tan jakle'n e'chk tx'ixwatz yi na quim tan stzajse'n klo' yi quil wunak.
Ma na ja jakxij inẍchin tanu' tan wital yi tajbilu'.
Cha'stzun te walol teru':
“Wajcaw, je ine'j, chi yi tz'iba'nt cyen swe'j le tu'ju'.*
Ilenin na chimpek' tan banle'n yi tajbilu', na qui na el yi ca'wlu' te inc'u'l.”
Sak swutzu' yi na wal scyetz cyakil yi e' tanumu', yi chin tz'aknak cu'n ilu'.
Nin qui'c nin jun e'chk takle'n yi jak wew, yi qui'k nwal scyetz.
10 Ja wal cyakil yi balajilu' tan cawu'n.
Nin ja wal yi ba'n k'uke' kac'u'l te'ju'.
Nin ja wal yi ba'n kaclax tanu'.
Quinin nwew yi balajilu' tu yi lok' ib yi at tuch'u' scyetz cyakil yi e' tanumu'.
11 Ma jalu' Wajcaw, quil cy'ajlenu' yi banl talma'u' swibaj.
Na yi wajbil i'tz yil tz'a'tij yi lo'klu' tu balajilu' swe'j tan incolche'n.
12 Wi'nin sotzaj c'u'lal na ul tzinwutz.
Quinin bajsbe'n tetz cyakil yi e'chk takle'na'tz yi na ul tzinwutz.
Qui ajlbe'n tetz, na ni'cu'n chi tane'n xi'il kawi' yi qui na kaxcye' tan tajle'n.
I na bantz tzinwutz, yi ja wi't chintx'amxij tan cyakil yi wil.
I cu'n chinlo'onk nin ta'n, na qui'ct inwalor at.
13 Ilu' inRyosil, chin cole'u'. Sajkchanu' tan wuch'eye'n.
14 Yi wajbil Ta', i'tz yi nink tz'el chitx'ix yi e' yi na cyaj yil chinquim wetz.
Lok che'l ojk tu chitx'ix yi e' yi na cyaj yil chin lo'on.
15 Lok che'l ojk yi e'a'tz yi na chitze'en swe'j.
16 Poro tak' tzaju' tzatzin scyetz cyakil yi e' yi na chitzan tan joyle'n puntil tan chixome'n te'ju'.
Nin yil cho'c tan joyle'n ẍch'eybil cyetz teru', nink cyal: “Chin cham nin yi Kataj.”
17 Ma yi in wetz Ta', yi nternin na chimbisun, bne'u' pawor, sajkchanu' tan wuch'eye'n.
Na ntin cu'n ilu' xcyeku' tan wuch'eye'n, nin tan incolpe'n.
Qui'k ẍch'iwu' mas tiemp, sajku' tan wuch'eye'n.
* 40:7 Heb 10:5-7.