45
Ja tak' Ryos banl tibaj yi kareyil
1 At wi'nin e'chk balaj yol yi na tijin te walma', tan walol tetz yi kareyil.
Nin cyakil yi yol yi swale', ni'cu'n chi na ban jun yaj, tan stz'ibe'n e'chk balaj ajtza'kl.
Ma jalu' swale' bin yi e'chk balaj yola'tz tetz yi kareyil.
2 Ilu' kareyil, qui'c nin junt yaj yi ni'cu'nk chi tane'nu', ẍchixo'l cyakil wunak bene'n tzi'n.
Nin chumbalaj nin e'chk yol yi na talu'.
Cha'stzun te ja tak' Ryos banl tibu' tetz ben k'ej ben sak.
3 Weke' bin tibu'. C'ale' quenu' yi sparu' xe c'u'lu'.
Na chin cham nin ilu', nin at k'eju'.
4 Na na jal k'eju' yi na tx'aconu' scye'j contru'.
Na yi na ocu' tan oyintzi', na tzanu' tan colche'n yi mero bintzi, nin ba'n atit cyakil yi na banu'.
5 Cyakil yi e' wunak yi ate' bene'n tzi'n, na cho'c jak' ca'wlu', nin na cyek ẍchi'u', na yi na xconsaju' yi ma'clu' tetz oyintzi', na che'l cu'n yi e' contru' swutz.
6 Ilu' Kataj, at cawl tk'abu' tetz ben k'ej ben sak.
Nin chin tz'aknak cunin na cawunu'.
7 Na yi ilu' teru', na xom wi'u' te yi e'chk takle'n balaj, nin qui na pek'u' te e'chk takle'n cachi'.
Cha'stzun te ja je' xtxa'ol Ryos ilu'.
Nin ja tak' i' mas teru' banlu' swutz alchok ajcaw bene'n tzi'n.
8 Nin cyakil k'ej chin c'o'c nin te'ju', tan e'chk balaj perfum, chi tane'n mirra, áloe tu canel.
Nin cyakil nin k'ej na tzan e'chk kbetz xe yi ca'lu', kale na cawune'tu', yi wekij tan e'chk balaj takle'n chi tane'n marfil.
9 Ẍchixo'l yi e' xna'n yi xomche' te'ju' ate' balaj xun.
Nin c'olchij yi reina xlaju'.
Chin yube'n nin i', tan e'chk balaj uwaj yi chin oro cu'n.
10 Ma jalu' ilu' jun c'oloj reina, tbit tzaju' cobox inyol yi swale' teru':
Che'lken yi e' taj xtxu'u' te c'u'lu'.
Ncha'tz che'lken yi e' tanumu' te c'u'lu'.
11 Na tan yi balajilu' wi'nin na pek' kareyil te'ju'.
Tajwe'n bin yil tbitu' yi tetz ca'wl.
12 Nin yi e' me'l yi rey cwent Tiro, scyuch' yi e' ric, chu'l swutzu' tan toye'n e'chk balaj oy teru', na yi cyajbil, i'tz yi nink tz'el k'ajabu' scye'j.
13 E'u' katanum, quilninu' yi reina tz'ucu'le'j.
Chin yube'n nin i', na weko'n tib, nin oro cu'n at te yi be'ch tetz.
14 Chin weko'n nin tib, na cho'n tz'ocopon swutz yi rey.
Nin xomche' yi e' mas xun tan tak'le'n i'.
15 Wi'nin chitzatzine'n.
Na chitzatzin na chocopon swutz yi rey.
16 Ilu' kareyil tbitzaju':
Cyakil yi e' cy'ajlu' scyuch' yi e' mamaju', chocopon tetz ajcaw chi banake' yi e' mam cyenu' sajle'n, nin ẍchicawunk bene'n tzi'n.
17 Tzinjoye' puntil tan cyoque'n cyakil wunak tan na'wse'n yi bi'u' sbne' opon tunintz.
Na tajwe'n cyak'ol wunak k'eju' ben k'ej ben sak.