47
Ryos, i' yi wi'tz ajcaw bene'n tzi'n wi munt
1 Ma jalu', cyakil axwok yi atix bene'n tzi'n wi munt, kaẍpok'loj kak'ab tan tak'le'n kak'ajsbil tetz Ryos.
Tzatzin cu'n kaẍch'ink tan tak'le'n k'ej i'.
2 Na yi ketz Kataj cya'l jun na xcye' quen te'j.
Chin xo'wbil nin yi tetz porer, na i' yi wi'tz ajcaw bene'n tzi'n wi munt.
3 Ja xcye' i' tan chixite'n cu'n cyakil yi e' nación yi ja chu'l tan oyintzi' ske'j.
Nin ja tak' i' ama'l sketz tan kacawune'n squibaj.
4 I' ntxa'one'n yi ketz ka'ama'l tan jale'n kak'ej, yi o' xonl k'ajtzun kamam Jacow.
Na wi'nin na pek' i' ske'j.
5 Ma jalu' tzan je'mpone'n tan c'olewe'n tibaj yi tetz c'olchbil kale tz'oque't tan cawu'n.
Tzatzin cu'n na chiẍchin wunak, nin na tzan e'chk chun tan tak'le'n k'ej i'.
6 Kak'e' bin kak'ajsbil tetz, na i' kareyil.
7 Kak'e' kak'ajsbil swutz i', na i' yi wi'tz ajcaw tibaj cyakil yi e'chk ama'l bene'n tzi'n.
8 Yi kaRyosil i' yi wi'tz ajcaw tibaj cyakil nación.
Nin ja c'ole' wi ẍchem yi chin xan nin.
9 Cyakil chibajxom yi e'chk nacióna'tz, scyuch' yi e' wunak yi at chik'ej, ja chu'l swutz Kataj, nin ja cho'c tajlal yi tanum Ryos, yi Ryosil kamam Abraham.
Na yi Kataj Ryos i' yi wi'tz Ajcaw squibaj cyakil ajcaw yi ate' wi munt.