5
Ba'n kajak ẍch'eybil ketz tetz Kataj cyakil jalchan
1 Ta', ilu' Wajcaw.
Tbite'u' yi intzi' inkul.
Tbite'u' yi na chintx'ayne' swutzu'.
Stza'weju' yi na chintzan tan jakle'n teru'.
2 Na ilu' inReyil. Ilu' inRyosil Ta'.
Cho'n na cu' inwutz teru'.
Tbitzaju' yi to'kl walma', na cho'n na nok' swutzu' Ta'.
3 ¡Siwl Ta'!
Jalchan cunin na tbitu' yi intzi' inkul.
Jalchan cunin na chinjilon teru'.
Na injak ẍch'eybil wetz teru' Ta', nin na inch'iw yi tajbilu'.
4 Na yi ilu' teru' Ta', nk'e'tz ilu' jun Ryos yi nak pek'u' te yi ilc'ol, yi nak pek'u' te yi e'chk takle'n yi cachi'.
Na yi e' juchul il, qui'c rmeril tan chinajewe'n te'ju'.
5 Yi e' yi na cyocsaj quib nim tu cyajtza'kl, qui'c cyopombil te'ju'.
Yi e' yi chin cachi' nin na chiban, qui na ajwij chiwutz tanu'.
6 Na che'l cu'n cyakil yi e' la'j tanu' swutz.
Na che'l cu'n cyakil yi e' jopol wutzaj tanu' swutz.
Na che'l cu'n cyakil yi e' biyol nak tanu' swutz.
Na qui na pek'u' scye'j.
7 Ma yi in wetz Ta', tan tu' banl talma'u', at rmeril tan wopone'n xe ca'lu', at rmeril tan wocompone'n tan c'u'laje'nu', tan wuk'ol k'eju'.
At rmeril tan inxmayilnin kale najle'tu', yi na no'c tan nachle'n bi'u'.
8 Ta', chin nicy'saju' tan inxome'n te yi tajbilu', na wi'nin incontr yi na cyaj chixmayin swe'j.
Chin nicy'saju' bin tan inxome'n te yi be'u'.
9 Ma yi e' incontra'tz nk'e'tz bintzi chijilon.
Na ni'cu'n quitane'n tu jun nichil alma', yi chin k'aynak nin tul.
Na yi na chijilon, chitzi' tu', chiplaj tu'.
Ntin la'jil na xcon cya'n.
10 Ta', che' cawse'u' yi e'a'tz.
Ite'n nink cyajtza'kl tz'oc tan chibense'n tul il.
Che' lajlenu', na nimix cunin quil baj chijuchul swutzu'.
Na qui nin ncho'c c'ulutxum jak' ca'wlu'.
11 Cyakil yi e' yi cho'n na chicol quib te'ju', chitzatzink, nin tetz cu'n cyalma' chibitzink.
Ilen nin chitzatzink nin chibitzink, na ilu' q'uicy'lom cyetz.
12 Na yi teru' Ta', na tak'u' chibanl yi e' yi ilenin k'uklij chic'u'l te'ju'.
Nin yi banl talma'u' at nintz tan chicolche'n, chi jun makbil flech.