61
At Ryos tan kacolche'n
Ilu' inRyosil, tbite'u' yi intzi' inkul, na na chintx'ayne' swutzu'. Stza'weju' yi inoración.
Chin joylaj nin atine't poro na cu' inwutz teru', na txant tan wele'n cu'n swutz.
Bne'u' pawor swetz, chin cole'u'.
Chin jeken tanu' tibaj jun chin wutzile'n c'ub bantz inclaxe'n.
Na ilu' yi colol wetz.
Nin ni'cu'n ilu' tu jun chin wutzile'n torre,* kale tzincolwit wib ẍchik'ab yi e' incontr.
Na waj na'tij xe yi teru' ca'lu' cyakil k'ej tan incolol wib te'ju'.
Wajcaw, jun cu'n ja tbitu' cyakil yi mbi minsuk teru'.
Nin ja wi't tak'u' yi e'chk oy swetz, yi suki'nt tanu' scyetz cyakil yi e' yi na chixom te yi teru' tajbilu', nin yi na cyek ẍchi'u'.
Ta', tak'u' ama'l tetz yi rey, yi wi'tz ajcaw, tan cawune'n.
Nink ben ẍkon yi tiemp tanu' tan cawune'n mas.
Nin yil cawun, nink xom te yi teru' tajbilu', nin tzatzin cu'nk lcawun.
Q'uicy'leju' tan yi banl talma'u' yi ba'n k'uke' kac'u'l te'j.
Ko ya'tz sbanu' Ta', swak'e' tzun ink'ajsbil teru' cyakil tiemp.
Nin ncha'tz cyakil nin k'ej, tzimbne' tane'n cyakil yi inyol, yi minsuk teru'.
* 61:3 Yi yol “torre” tzone'j, na jop jun ca'l yi nim wutz tkan, yi nxcon cyak'un wunak tan chicolol quib ẍchik'ab chicontr. 61:6 Na yolbej tib rey Luwiy stibil tib tzone'j.