68
Yi na oc Kataj tan oyintzi' na xcye' i' te cyakil
1 Yi na xe'tij Kataj tan oyintzi' na che'l ojk yi e' contr i' swutz. Ncha'tz na chiban yi e' yi na chi'ch chic'u'l te'j.
2 Ej nin yi e' contra'tz, cho'n cunin na chiban chi na ban sib yi na ben tan cyek'ek', nka chi na ban mu'ẍ xcab yi na oc tk'ak', na yi e' juchul ila'tz, qui'c mu'ẍ chixac swutz Ryos.
3 Poro yi e' balaj, ẍchitzatzink cyera'tz.
Nin ẍchitz'itpunk tan yi tzatzin yi ate' cu'nt.
4 Cha'stzun te kak'e' kak'ajsbil tetz Ryos.
Kabitzij balaj bitz tetz i', na yi i' tetz cho'n na xon tibaj sbak'.
Katzatzink bin tk'ab Kataj.
Katzatzink tan tak'le'n k'ej i'.
5 Cho'n najlij yi ketz kaRyosil xe tetz ca'l, yi wi'nin xanil.
Ej nin i' yi chitaj yi e' me'ba' yi qui'c chitaj.
Nin ncha'tz i' ch'eyl cyetz yi e' xma'lca'n.
6 Ncha'tz yi e', yi chichuc ate', na tak' i' ama'l scyetz tan chinajewe'n scyuch' jun najal.
Ej nin na oc i' tan chicolpe'n yi e' pres, nin na jal tzatzin scyetz.
Poro yi e' mal wunak, cho'n ẍcha'tok cyera'tz le e'chk ama'l tz'inunin tu'.
7 Kataj, yi bajxe'nu' ẍchiwutz yi e' tanumu', yi cyele'n tzaj Egipto nin yi chixone'n le ama'l tz'inunin tu',
8 ja chucan yi wuxtx'otx' swutzu', nin ja saj jun chin wutzile'n a'bal tanu'.
Ej nin yi wi'wtz Sinaí, ja chucan swutzu'.
Ja chucan tan yi teru' poreru', yi ilu' kaRyosil yi o' xonl Israel.
9 Ja saj wi'nin a'bal tanu', tan tac'se'n yi e'chk ama'l skajwutz, nin ja ult yos tuch'.
10 Ej nin yi e' teru' tanumu', cho'n chicyaje'n cyentz le e'chk ama'la'tz.
Nin tan yi teru' poreru', ja tak'u' yi tajwe'n scyetz.
11 KaRyosil ncawun. Nin ja katx'acon.
Ej nin wi'nin xna'n e' ul tan talche'n stziblal.
Nin je chiyole'j:
12 “Ja che'l ojk cyakil kacontr.
Ja che'l ojk chibajxom tuml yi cyetz chisanlar,” che'ch yi e' xna'na'tz ban.
Nin cyakil yi e' xna'n yi ate' cyentz, e' octz tan jatxle'n cu'n yi e'chk takle'n yi nchicambaj yi e' sanlar scye'j yi chicontr.
13 Yi axwok itetz ja itew itib tulak e'chk picy, nin chin tz'il nin axwok mban.
Ma jalu' apart itane'nwok, na ni'cu'n axwok jalu' chi tane'n jun plomẍ yi na litz'un yi xicy' tan sakal tu balaj oro.
14 Na yi toque'n Kataj, yi na xcye' te cyakil, tan chixite'n chiryosil icontra'tz, e' el xit, chi na el num yi k'ab che'w wi'wtz Salmón.
15 Chin wutz tkan nin yi e'chk wi'wtz cwent Basán.
Nin chin txicl nin tane'n.
16 Mbi xac na chi'ch ic'u'l te yi wi'wtz kale najle't Kataj.
Na cho'n snajank i' wi jun wi'wtza'tz tetz ben k'ej ben sak.
17 Jat lo' millón care't tetz oyintzi' at tu kaRyosil, nin xomche' te'j, yi saje'n le wi'wtz Sinaí tan tule'n xe tetz ca'l.
18 Ej nin yi taje'n tcya'j, e' aj tcy'al wi'nin e' yi ate' pres.
Ej nin yi ntaxk aj, ja cyak' wunak e'chk oy tetz.
Nin ncha'tz yi e' mal nak, e' oc jak' ca'wl i'.
19 Ntyoẍ tetz Kataj, yi cyakil nin k'ej list i' tan teke'n nin yi kektz tane'n, na i' yi colol ketz.
20 Na yi ketz Kataj, i'tz jun Ryos yi ba'n na kaclax ta'n, nin yi list tan kacolche'n tk'ab quimichil.
21 Tz'ocopon Ryos tan cabse'n chiwi' yi e' tetz contr, yi e' yi ch'inch'uj e' tan juchle'n quil.
22 Je yol Kataje'j:
“Cxpakxokwok wa'n, pe tzun cho'nk atixwok le ama'l Basán.
Cxpakxokwok wa'n, mpe cho'nk atixwok xe mar.
23 Cxonkwok tul chiẍch'el yi e' icontr.
Nin sbajk chiẍch'el cyak'un itx'i'.”
24 Ilu' kaRyosil, ilu' kaReyil, wi'nin procesión na bajij xe ca'lu' tan tak'le'n k'eju'.
25 Na ilenin na chicham quib cyakil wunak tan tak'le'n k'eju'.
Bajxche' yi e' aj bitz ẍchiwutz.
Ma yi e' aj kbetzum xomche' wutz chicoc.
Ej nin nicy'al, xomche' cobox xun, yi na chitzan len tan tocse'n e'chk pandereta.
26 Kak'e' bin kak'ajsbil tetz Kataj yi kaRyosil.
Na cyakil yi o', yi o' xonl Israel, ja kamol kib tan tak'le'n k'ej i'.
27 Ej nin ẍchixo'l cyakil yi e' wunaka'tz, bajxij Benjamín yi ẍch'i'p Jacow.
Ncha'tz xomij Judá, tu cobox tetz bajxom.
Ncha'tz xomche' Zabulón tu Neftalí.
28 Ilu' kaRyosil, ẍchaje'u' yi poreru' sketz.
Yi poreru' yi ẍchajnaku' sketz sajle'n tunintz.
29 Cawunk tzaju' le ca'lu' yi at Jerusalén, yi ca'lu' kale na chopone't e' rey tan toye'n e'chk oy swutzu'.
30 Make'u' chiwutz yi e' aj Egipto, na i cu'n cyuch' yi jun chin txuc yi at xe a'.
Ncha'tz make'u' chiwutz yi e' mas tnum, na ni'cu'n e' tu jun c'oloj smaron wacẍ.
Na yi e'a'tz, tan tu' yi ẍkant tzaj nin na cyaj, ja cho'c tan telse'n chik'ej yi mas tnum.
Poro Ta', tak'e'u' chicaws, na yi e' cyetz, ntin oyintzi' na chitxum.
31 Chu'l wi'nin bajxom nin ajcaw jalen Egipto.
Ncha'tz chu'l jalen Etiopía.
Chu'l len, nin jepon chik'ab tan tak'le'n k'eju'.
32 E'u' ajcaw tetz tnum, cyak'u' chik'ajsbilu' tetz Kataj.
Cyak'e'u' chik'ajsbilu' tetz Kataj.
33 Cyak'e'u' k'ej yi juna'tz yi na xon tcya'j, yi tcya'j, yi at nintz sajle'n tunintz.
Kubite' yi na jilon i', na chin wi' nin i' tan yol.
34 Kak'e' bin k'ej Kataj na at tetz porer.
Nin chin mam nin yi banl talma' i' skibaj yi o' xonl Israel.
Nin yi banl i', icy'nak cu'n swutz yi tcya'j.
35 Chin xo'wbil nin i' sbne', yil cu'ul te tetz ca'l, yi chin xan nin.
Na i' tz'ak'onk kachamil tu kawalor yi o' tetz tanum, yi o' xonl Israel.
Kak'e' bin kak'ajsbil tetz.