72
Nachle'n Kataj tibaj kareyil
1 Ilu' inRyosil, na waj yil tzinjak jun wajbil teru'.
Nin yi wajbil i'tz yil tak'u' yi balajil tu tajtza'kl yi kareyil,
2 bantz sk'il cunin cawun i' skibaj yi o' tanumu', nin squibaj cyakil yi e' tal prow yi at tajwe'n scyetz.
3 Tan tu' yi chin sk'il cunin yil cawun i', lok jal tzatzin paz bene'n tzi'n.
Lok jal tzatzin paz je'n tzi'n wi'wtz nin xo'lak wutz.
4 Lok xom wi' i' scye'j yi e' tal prow me'ba'.
Nink tz'el k'ajab scye'j yi e' chinitxajil.
Poro nink tz'el chik'ej yi e' yi na chitzan tan chibuchle'n yi e' tal prowa'tz.
5 Ej nin yi wajbil i'tz: yi nink tek ẍchi' yi kareyil yi teru' ca'wlu'.
Nink xom te yi teru' tajbilu', jalen yil sotz yi k'ej tu yi xaw.
6 Cho'nk tz'an yi cawun i', chi na ban yi a'bal, yi na cu' bene'n tzi'n, nin yi na xcye' tan tac'se'n cyakil e'chk ama'l.
Cho'nk tz'an yi cawun i' chi na ban yi k'ab che'w, yi na xcye' tan tac'se'n yi wuxtx'otx'.
7 Nink jal tzatzin paz te yi tiemp yil cawun i'.
Chumbalaj nink tz'an tircu'n yil cawun i', jalen cu'n yil sotz yi xaw yi at tcya'j.
8 Nin yil cawun i', nink tz'opon cu'n yi ca'wl jalen tzi mar, nin jalen te yi wutzile'n tzanla' Eufrates, nin bene'n tzi'n wi munt.
9 Ej nin cyakil yi e' tetz contr, yi ate' le e'chk ama'l tz'inunin tu', nink cho'c jak' ca'wl i'.
10 Chu'l cyakil yi e' bajxom tan toye'n, nin tan ẍchojle'n alcawal tetz yi kareyil.
Chu'l cyakil, chi tane'n yi rey tetz Tarsis tu yi rey tetz e'chk isla tu yi rey tetz Sabá, tu yi rey tetz Seba.
11 Tajwe'n chimeje' yi e' mas rey swutz yi ketz kareyil.
Nin tajwe'n tan cyak'ol cyakil wunak k'ej i'.
12 Na i' tz'ocopon tan quich'eye'n yi tal prow yil cu' chiwutz tetz.
Nin tz'ocopon i' tan quich'eye'n yi e' yi cya'l na pek' tan quich'eye'n.
13 Tz'el pon k'ajab scye'j yi e' tal prow yi qui'c nin ate't cu'nt.
Nin ncha'tz tz'ocopon tan chicolche'n ẍchik'ab yi chicontr.
14 Tz'elepon k'ajab scye'j yi e' yi buchijche'.
Nin tz'elepon k'ajab scye'j yi e' yi chin q'uixc'uj nin quitane'n.
Na at len chixac cyakil wunak swutz i'.
15 Kak'e' bin k'ej yi kareyil.
Lok cyak' yi e' aj Sabá oro tetz.
Lok chocopon wunak tan jakle'n yi banl i' tetz Ryos.
16 Nin ncha'tz lok jal wi'nin ixi'n triw.
Lok jal je'n tzi'n wi'wtz.
Lok ch'uy chi tane'n yi e'chk tze' Líbano.
Lok jal jun c'oloj wutz, chi na jal e'chk xtze' wutz wutz.
17 Nink ben ẍkon yi tiemp yi kareyil tan cawune'n tzone'j.
Qui'k sotz, chi qui na sotz yi k'ej.
Nink jal chibanl yi e'chk mas nación ta'n, bantz cyak'ol yi ba'n teri yi jun reya'tz.
18 Kak'e' bin k'ej yi kaRyosil, yi ketz kaRyosil yi o' xonl Israel.
Na ntin i' na xcye' tan banle'n e'chk milawra'tz.
19 Kak'e' bin k'ej yi tetz bi' tetz ben k'ej ben sak.
Na scyale' cyakil wunak bene'n tzi'n wi munt:
“Chumbalaj nin i'.” ¡Amén!
20 Cho'n na tzaj wi' yi e'chk oración yi rey Luwiy tzone'j, yi jun Luwiya'tz yi cy'ajl Isaí.