75
Kataj Ryos i' yi wi'tz pujul xtisya'
1 Ilu' kaRyosil, nternin na katyoẍin teru'.
Na katyoẍin teru', nin na kana'wsaj yi bi'u', nin na kak' kak'ajsbil teru', na wi'nin e'chk takle'n balaj yi bnixnak tanu' ske'j.
2 Ej nin je yol Kataje'j: “Yil bixe' yi tiemp wa'n tan woque'n tan pujle'n xtisya' quil je' ink'ab twi' jun.
3 Na yil bajij wi'nin e'chk takle'n bene'n tzi'n, yi qui't pujx cyak'un wunak yi mbil chiban, tzinchaje' yi i ina'tz yi jun yi na chincawun tibaj cyakil.”
4 Poro swale' nin tzitetz yi axwok, yi na itocsaj itib nim, tu yi axwok mal nak:
“Quil tzitocsaj itib nim tu itajtza'kl.
5 Nin quil tzitocsaj itib nim tu yi ca'wl yi at tik'ab.
Nin qui tzitelsaj k'ej jun tu cxjilon,” chij Kataj ban scyetz.
6 Na nk'e'tz cho'n na saj yi ẍch'eybil ketz tele'n tzi'n, nka toque'n tzi'n.
Nin nk'e'tz cho'n na saj le e'chk ama'l yi at cwe'n tzi'n.
7 Ma na cho'n na saj te'tz tu Ryos, yi wi'tz pujul xtisya'.
Na ko na taj i', ba'n tak' chik'ej cobox.
Nin ko na taj i', ba'n tz'el chik'ej cobox ta'n.
8 List atit Kataj tan tak'le'n chicaws yi e' juchul il.
Chin xkolum nin sbne' yi chicaws.
Na ni'cu'n sbne' chi na cu' yujij wenen tul win.
Nin cyakil wunak yi ate' bene'n tzi'n, ẍchitije' yi jun cawsa'tz.
9 Poro yi in wetz, ilenin tzintxole' yi balajil yi Ryosil k'ajtzun Jacow.
Nin ilenin swak'e' ink'ajsbil tetz i'.
10 Na i' tz'ocopon tan chisotzaje'n yi e' mal nak, scyuch' yi e' yi na cyocsaj quib nim tu cyajtza'kl.
Poro tz'ocopon i' tan tak'le'n mas kak'ej, yi o' yi na kaban yi e'chk takle'n balaj.