9
ܓܒܝܬܐ ܕܐܠܗܐ
1 ܫܪܵܪܵܐ ܗܲܡܙܘܼܡܹܐ ܝܘܸܢ ܒܡܫܝܼܚܵܐ، ܘܠܹܐ ܝܘܸܢ ܕܲܓܘܼܠܹܐ، ܘܐܸܢܝܲܬܝܼ ܒܸܣܗܵܕܵܐ ܝܠܵܗ̇ ܥܲܠܝܼ ܒܪܘܼܚܵܐ ܕܩܘܼܕܫܵܐ،
2 ܕܦܵܫܲܡܬܵܐ ܓܘܼܪܬܵܐ ܐܝܼܬ ܠܝܼ، ܘܚܲܫܵܐ ܡ̣ܢ ܓܵܘ ܠܸܒܝܼ ܠܹܐ ܝܠܹܗ ܒܸܦܪܵܩܵܐ.
3 ܣܵܒܵܒ ܐܵܢܵܐ ܒܵܥܹܝܢ ܗܘܵܐ ܕܒܓܵܢܝܼ ܗܵܘܹܝܢ ܗܘܵܐ ܡܘܼܚܪܸܡܵܐ ܡ̣ܢ ܡܫܝܼܚܵܐ ܒܘܼܬ ܚܵܬܸܪ ܕܐܲܚܘܿܢܘܵܬܝܼ̈، ܘܚܸܙܡܵܢܝܼ̈ ܒܦܲܓ݂ܪܵܐ،
4 ܕܝܼܢܵܐ ܒܢܲܝ̈ ܐܝܼܣܪܵܐܹܝܠܔ، ܘܕܝܼܵܝܗܝ ܝܠܵܗ̇ ܒܪܘܿܢܘܼܬܵܐ، ܘܚܸܩܪܵܐ، ܘܘܲܥܕܹ̈ܐ، ܘܝܵܗܒ݂ܵܠܬܵܐ ܕܢܵܡܘܿܣܵܐ، ܘܣܓ݂ܵܕܬܵܐ ܘܩܵܘܠܹ̈ܐ،
5 ܘܕܝܼܵܝܗܝ ܝܢܵܐ ܐܲܒ݂ܵܗܵܬܹ̈ܐ، ܘܡܸܢܵܝܗܝ ܝܠܹܗ ܡܫܝܼܚܵܐ ܡ̣ܢ ܐܢܵܫܘܼܬܹܗ ܓܹܒܵܐ، ܗ̇ܘ ܕܝܼܠܹܗ ܐܲܠܵܗܵܐ ܥܲܠܔ ܟܠܔ، ܡܒܘܼܪܟ݂ܵܐ ܠܥܵܠܡܝܼܢ، ܐܵܡܹܝܢ.
6 ܐܝܼܢܵܐ ܠܹܐ ܝܠܵܗ̇ ܒܛܝܼܠܬܵܐ ܗܹܡܸܙܡܵܢ ܕܐܲܠܵܗܵܐ. ܣܵܒܵܒ ܟܠܵܝܗܝ ܐܵܢܝܼ ܕܝܼܢܵܐ ܡ̣ܢ ܒܢܲܝ̈ ܐܝܼܣܪܵܐܹܝܠܔ ܠܹܐ ܝܢܵܐ ܝܼܣܲܪ̈ܠܵܝܹܐ،
7 ܘܠܵܐ ܐܵܢܝܼ ܕܝܼܢܵܐ ܡ̣ܢ ܙܲܪܥܵܐ ܕܐܲܒ݂ܪܵܗܵܡ ܒܢܘܿܢܹ̈ܐ ܕܐܲܒ݂ܪܵܗܵܡ ܝܼܢܵܐ، ܐܸܠܵܐ
ܒܐܝܼܣܚܵܩ ܒܸܬ ܦܵܐܹܫ ܝܘܼܗܒ݂ܵܐ ܐܸܠܘܼܟ݂ ܙܲܪܥܵܐ.
8 ܝܲܥܢܹܐ، ܠܹܐ ܝܠܵܗ̇ ܕܒܢܘܿܢܹ̈ܐ ܕܦܲܓ݂ܪܵܐ ܕܝܼܢܵܐ ܒܢܘܿܢܹ̈ܐ ܕܐܲܠܵܗܵܐ، ܐܸܠܵܐ ܒܢܘܿܢܹ̈ܐ ܕܩܵܘܠܵܐ، ܐܲܢܹܐ ܝܢܵܐ ܚܘܼܫܒܸܢܹܐ ܠܙܲܪܥܵܐ.
9 ܣܵܒܵܒ ܐܵܗܵܐ ܝܠܵܗ̇ ܗܹܡܸܙܡܵܢ ܕܩܵܘܠܵܐ ܕܦܝܼܫܬܵܐ ܝܗܘܵܐ ܐܡܝܼܪܬܵܐ:
ܡܐܲܝܟ݂ ܐܵܗܵܐ ܥܕܵܢܵܐ ܒܸܬ ܐܵܬܹܝܢ، ܘܣܲܪܵܐ ܒܸܬ ܗܵܘܹܐ ܠܵܗ̇ ܒܪܘܿܢܵܐ.
10 ܘܠܵܐ ܐܲܚܟ̰ܝܼ ܐܵܗܵܐ، ܐܝܼܢܵܐ ܐܘܼܦ ܪܲܦܩܵܐ ܙܘܼܘܸܓ ܠܵܗ̇ ܥܲܡ ܚܲܕ، ܥܲܡ ܒܵܒܲܢ ܐܝܼܣܚܵܩ.
11 ܣܵܒܵܒ ܡ̣ܢ ܩܲܕܡ ܕܦܵܝܫܝܼ ܗܘܵܘ ܝܠܝܼܕܹܐ ܒܢܘܿܢܹ̈ܐ، ܘܡ̣ܢ ܩܲܕܡ ܕܥܵܒ݂ܕܝܼ ܗܘܵܘ ܛܵܒ݂ܬܵܐ ܝܲܢ ܒܝܼܫܬܵܐ، ܦܝܼܫ ܠܹܗ ܡܘܼܩܘܝܼܵܐ ܢܝܼܫܵܐ ܕܐܲܠܵܗܵܐ ܒܓܲܒܲܝܬܵܐ،
12 ܠܵܐ ܒܝܲܕ ܦܘܼܠܚܵܢܹ̈ܐ ܐܸܠܵܐ ܒܝܲܕ ܗ̇ܘ ܕܟܹܐ ܓܲܒܹܐ ܦܝܼܫ ܠܹܗ ܐܡܝܼܪܵܐ ܐܸܠܘܼܗ̇:
ܗ̇ܘ ܓܘܼܪܵܐ ܒܸܬ ܥܵܒܹܕ ܚܸܠܡܲܬ ܠܗ̇ܘ ܙܥܘܿܪܵܐ.
13 ܐܲܝܟ݂ ܕܝܼܠܹܗ ܟܬܝܼܒ݂ܵܐ:
ܠܝܲܥܩܘܿܒ݂ ܡܘܼܚܸܒ ܠܝܼ، ܘܠܥܹܣܘܿ ܣܢܹܐ ܠܝܼ.
14 ܡܘܼܕܝܼ ܐܵܡܪܲܚ؟ ܠܲܝܬ ܫܪܵܪܵܐ ܠܟܸܣ ܐܲܠܵܗܵܐ؟ ܚܵܣ ܠܝܼ.
15 ܣܵܒܵܒ ܐܡܝܼܪܹܗ ܠܡܘܼܫܹܐ:
ܒܸܬ ܥܵܒ݂ܕܹܢ ܪ̈ܲܚܡܹܐ ܥܲܠܔ ܡ̇ܢ ܕܥܵܒ݂ܕܹܢ ܪ̈ܲܚܡܹܐ، ܘܒܸܬ ܥܵܒ݂ܕܹܢ ܫܵܦܵܩܲܬ ܥܲܠܔ ܡ̇ܢ ܕܥܵܒ݂ܕܹܢ ܫܵܦܵܩܲܬ.
16 ܗܵܕܟ݂ܵܐ، ܠܹܐ ܝܠܵܗ̇ ܟܠܝܼܬܵܐ ܥܲܠܔ ܗ̇ܘ ܕܒܵܥܹܐ، ܘܠܵܐ ܥܲܠܔ ܗ̇ܘ ܕܓ̰ܲܪܸܒ ܒܚܲܝܠܹܗ، ܐܸܠܵܐ ܥܲܠܔ ܪ̈ܲܚܡܹܐ ܕܐܲܠܵܗܵܐ.
17 ܣܵܒܵܒ ܦܝܼܫ ܠܹܗ ܐܡܝܼܪܵܐ ܓܵܘ ܟܬܵܒ݂ܵܐ ܠܦܸܪܥܘܿܢ:
ܩܵܐ ܐܵܗܵܐ ܢܝܼܫܵܐ ܩܵܡ ܡܲܩܸܡܸܢܘܼܟ݂، ܕܡܲܚܙܹܝܢ ܚܲܝܠܝܼ ܒܝܼܘܼܟ݂، ܘܕܦܵܐܹܫ ܝܕܝܼܥܵܐ ܫܸܡܝܼ ܓܵܘ ܟܠܵܗ̇ ܐܲܪܥܵܐ.
18 ܗܵܕܟ݂ܵܐ، ܐܲܠܵܗܵܐ ܟܹܐ ܥܵܒܹܕ ܪ̈ܲܚܡܹܐ ܠܡ̇ܢ ܕܒܵܥܹܐ ܥܵܒܹܕ ܪ̈ܲܚܡܹܐ، ܘܡܲܩܫܹܐ ܠܸܒܵܐ ܕܡ̇ܢ ܕܒܵܥܹܐ ܡܲܩܫܹܐ ܠܸܒܹܗ.
19 ܩܵܘܡܵܐ ܒܸܬ ܐܵܡܪܹܬ ܐܸܠܝܼ: ”ܩܵܡܘܿܕܝܼ ܐܲܠܵܗܵܐ ܒܸܬ ܕܵܒܹܩ ܓܢܵܗܵܐ ܥܲܠܲܢ؟ ܣܵܒܵܒ ܡܵܢܝܼ ܡܵܨܹܐ ܟܵܠܹܐ ܕܲܠܩܘܼܒ݂ܠܔ ܕܨܸܒ݂ܝܵܢܹܗ؟“
20 ܠܵܐ. ܡܵܢܝܼ ܝܘܸܬ ܐܲܢ݇ܬ ܝܵܐ ܒܲܪܢܵܫܵܐ ܕܓ̰ܲܘܸܒܸܬ ܠܐܲܠܵܗܵܐ؟ ܡܵܨܝܵܐ ܐܵܡܪܵܐ ܓܒ݂ܝܼܠܬܵܐ ܠܓܵܒ݂ܠܵܢܵܐ: ”ܩܵܡܘܿܕܝܼ ܗܵܕܟ݂ܵܐ ܩܵܡ ܓܵܒ݂ܠܹܬ ܠܝܼ؟“
21 ܠܲܝܬ ܠܹܗ ܦܲܚܵܪܵܐ ܫܘܼܠܛܵܢܵܐ ܥܲܠܔ ܛܝܼܢܵܐ ܕܥܵܒܹܕ ܗܲܪ ܡ̣ܢ ܚܕܵܐ ܓܒ݂ܝܼܠܬܵܐ ܕܛܝܼܢܵܐ ܚܲܕ ܡܵܐܢܵܐ ܠܐܝܼܩܵܪܵܐ ܘܗ̇ܘ ܐܚܹܪܢܵܐ ܠܡܲܣܠܲܝܬܵܐ؟
22 ܡܘܼܕܝܼ ܐܸܢ ܐܲܠܵܗܵܐ ܒܥܹܐ ܠܹܗ ܕܡܲܚܙܹܐ ܟܲܪܒܹܗ ܘܡܲܕܸܥ ܚܲܝܠܹܗ، ܡܘܼܪܝܸܟ݂ ܠܹܗ ܒܹܐܢܹܗ ܥܲܠܔ ܡܵܐܢܹ̈ܐ ܕܟܲܪܒܵܐ ܕܝܼܢܵܐ ܗܘܼܕܪܹܐ ܠܛܠܵܩܵܐ؟
23 ܘܕܡܲܚܙܹܐ ܝܘܼܬܪܵܢܵܐ ܕܫܘܼܒ݂ܚܹܗ ܠܐܵܢܝܼ ܕܝܼܢܵܐ ܗܘܼܕܪܹܐ ܠܪ̈ܲܚܡܹܐ، ܐܵܢܝܼ ܕܡ̣ܢ ܩܲܕܡܵܝܬܵܐ ܗܘܼܕܪܵܝ ܠܹܗ ܠܚܸܩܪܵܐ،
24 ܐܘܼܦ ܐܲܚܢܲܢ، ܐܵܢܝܼ ܕܐܲܠܵܗܵܐ ܓܘܼܒܝܵܝ ܠܹܗ ܠܵܐ ܐܲܚܟ̰ܝܼ ܡ̣ܢ ܝܗܘܼܕܵܝܹ̈ܐ ܐܝܼܢܵܐ ܐܘܼܦ ܡ̣ܢ ܐܸܡܘܵܬܹ̈ܐ.
25 ܕܵܐܟ݂ܝܼ ܕܐܘܼܦ ܗܘܿܫܲܥ ܢܒ݂ܝܼܵܐ ܐܡܝܼܪܹܗ:
ܐܵܢܝܼ ܕܠܹܐ ܝܢܵܐ ܥܲܡܝܼ، ܒܸܬ ܩܵܪܹܢܗܘܿܢ ܥܲܡܝܼ، ܘܗ̇ܝ ܕܠܹܐ ܝܠܵܗ̇ ܡܘܼܚܸܒܬܵܐ، ܒܸܬ ܩܵܪܹܢܵܗ̇ ܡܘܼܚܸܒܬܵܐ.
26 ܘܒܸܬ ܗܵܘܝܵܐ ܒܕܘܼܟܵܐ ܕܦܝܼܫܬܵܐ ܝܗܘܵܐ ܐܡܝܼܪܬܵܐ ܐܸܠܵܝܗܝ: ܠܹܐ ܝܬܘܿܢ ܥܲܡܝܼ، ܬܵܡܵܐ ܒܸܬ ܦܵܝܫܝܼ ܩܸܪܝܹܐ ܒܢܘܿܢܹ̈ܐ ܕܐܲܠܵܗܵܐ ܚܵܝܵܐ.
27 ܐܹܫܲܥܝܵܐ ܡܘܼܩܘܸܚ ܠܹܗ ܒܘܼܬ ܐܝܼܣܪܵܐܹܝܠܔ ܘܐܡܝܼܪܹܗ:
ܐܘܼܦ ܐܸܢ ܕܗܵܘܹܐ ܡܸܢܝܵܢܵܐ ܕܒܢܲܝ̈ ܐܝܼܣܪܵܐܹܝܠܔ ܐܲܝܟ݂ ܣܹܠܵܐ ܕܝܵܡܵܐ، ܐܲܚܟ̰ܝܼ ܚܲܕ ܣܵܗܡܵܐ ܡܸܢܵܝܗܝ ܒܸܬ ܦܵܪܹܩ.
28 ܣܵܒܵܒ ܡܵܪܝܵܐ ܒܓ̰ܲܠܕܘܼܬܵܐ ܒܸܬ ܬܲܡܸܡ ܠܹܗ ܫܘܼܠܹܗ ܥܲܠܔ ܐܲܪܥܵܐ.
29 ܐܲܝܟ݂ ܕܐܡܝܼܪܹܗ ܐܹܫܲܥܝܵܐ ܡ̣ܢ ܩܲܕܡܵܝܬܵܐ:
ܐܸܢ ܡܵܪܝܵܐ ܚܲܝܠܬܵܢܵܐ ܠܵܐ ܗܵܘܹܐ ܗܘܵܐ ܫܒ݂ܝܼܩܵܐ ܐܸܠܲܢ ܙܲܪܥܵܐ، ܒܸܬ ܗܵܘܲܚ ܗܘܵܘ ܐܲܝܟ݂ ܣܕܘܿܡ ܘܒܸܬ ܕܵܡܲܚ ܗܘܵܘ ܠܥܵܡܘܿܪܵܐ.
30 ܒܘܼܬ ܐܵܗܵܐ ܐܵܡܪܲܚ، ܕܐܸܡܘܵܬܹ̈ܐ ܕܠܹܐ ܝܗܘܵܘ ܒܸܛܥܵܝܵܐ ܠܙܲܕܝܼܩܘܼܬܵܐ ܡܘܼܫ݇ܟ̰ܸܚ ܠܗܘܿܢ ܙܲܕܝܼܩܘܼܬܵܐ، ܙܲܕܝܼܩܘܼܬܵܐ ܕܝܼܠܵܗ̇ ܒܗܲܝܡܵܢܘܼܬܵܐ.
31 ܐܝܼܢܵܐ ܒܢܲܝ̈ ܐܝܼܣܪܵܐܹܝܠܔ، ܕܒܸܛܥܵܝܵܐ ܝܗܘܵܘ ܠܙܲܕܝܼܩܘܼܬܵܐ ܕܟܹܐ ܐܵܬܝܵܐ ܡ̣ܢ ܢܵܡܘܿܣܵܐ، ܠܵܐ ܡܘܼܫ݇ܟ̰ܚܵܐ ܠܗܘܿܢ.
32 ܩܵܡܘܿܕܝܼ؟ ܣܵܒܵܒ ܠܹܐ ܝܗܘܵܘ ܒܸܛܥܵܝܵܐ ܒܗܲܝܡܵܢܘܼܬܵܐ ܐܸܠܵܐ ܒܦܘܼܠܚܵܢܹ̈ܐ ܕܢܵܡܘܿܣܵܐ. ܒܘܼܬ ܐܵܗܵܐ ܬܘܼܪܩܸܠܔ ܠܗܘܿܢ ܒܟܹܐܦܵܐ ܕܬܲܪܩܲܠܬܵܐ.
33 ܕܵܐܟ݂ܝܼ ܕܝܼܠܹܗ ܟܬܝܼܒ݂ܵܐ:
ܒܸܬ ܡܲܬܒܸܢ ܓܵܘ ܨܸܗܝܘܿܢ ܟܹܐܦܵܐ ܕܬܲܪܩܲܠܬܵܐ، ܘܩܵܝܵܐ ܕܢܦܵܠܬܵܐ، ܘܡ̇ܢ ܕܗܲܡܸܢ ܒܝܼܹܗ ܠܹܐ ܢܵܟܹܦ.