Enno'sa' Kareta
Ipuru Amʉ'
Ena'
Ekamanin
Enno'sa' Kareta Ipuru Amʉ' Ena' e'menuka'pʉ tamu'kuru' tawon kon Kʉri'san amʉ' ena', tewa'nomanin kon epamʉ wenai Kʉri'san pe te'to' kon uya apurɨto' ɨnnonkapai te'san. Imenukanin uya to' pori'mapɨtʉ to' uya apurɨto' yau Sises Kʉrai esi i'nai rɨ Papa usenpoikasa' pe tukai' enpoika tʉuya winɨ kuru. Serɨ kupʉ tʉuya pɨ' osorʉwawon ton i'nairon ton pɨ' iyetʉ'kapɨtʉ: wapiya, Sises esi inkero' rɨ Papa Mumu pe, isenupasa' rʉ'pʉ i'nai rɨ main awɨrɨ e'nɨto' pɨ', Ikʉipʉnʉ pɨ' tekota'mato' tʉnmoronka'pʉ poro. Papa Mumu pe tesi ke, Sises esi eke pe pu'kena' amʉ' Penaro' Ekonekan nɨto' awon kon, inserʉ amʉ' mɨrɨ awonsi'kɨ Mosi' rɨ entai. Itisakon pe, Papa uya Sises ekamasa' inkero' rɨ use'man nɨto' tʉrawasomanin pe eke pe Penaro' Ekonekan nɨto' awon kon use'man nɨto' tʉrawasoma entai, mɨrɨ awonsi'kɨ itosorʉwano pe, Sises poro apurɨnin epika'tɨ makoi, enari'ke' pe te'to' mɨrɨ awonsi'kɨ uma'tan nɨto' piyapai; Sises si use'man nɨto' epuru pe esii'ma uya si i'nai rɨ epika'tɨn nɨto' tʉrʉ, ento' ipɨ' pe iye'sa' rʉ'pʉ iku'to' pe inonkasa' mɨrɨ awonsi'kɨ o' ke use'man nɨto' Ipuru amʉ' ɨpʉremato' ekareei winɨ.
Ipan pe tʉnmenuka'pʉ ennin nan panama iya apurɨto' tʉuya'nokon yau to' uko'manto' pe miyarɨ iu'matʉ pʉ'kʉ pona, Sises pɨ' tenu kon tʉtʉse, mɨrɨ awonsi'kɨ imoronkanin pe ɨ'rɨ rɨ ekota'man nɨto' esi a'tai mɨrɨ awonsi'kɨ ɨsɨ yau tʉku'to' kon eporo tʉuya'nokon a'tai. Kareta uta'koro panaman nɨto' mɨrɨ awonsi'kɨ ɨsɨ te'ku'ton pɨ' to' pana'tɨ pe.
Iyawon Ekamanin
Ekamanin: Kʉrai iyenuka'sa' pe kuru rɨ Papa usenpoikato' iwinɨ (1:1-3)
Eke pe Kʉrai e'to' inserʉ amʉ' entai (1:4—2:18)
Eke pe Kʉrai e'to' Mosi' mɨrɨ awonsi'kɨ Isa'suwa entai (3:1—4:13)
Eke pe Kʉrai e'to' use'man nɨto' tʉrawasomato' iya yau (4:14—7:28)
Eke pe Kʉrai e'to' emenna' tekonekasa' yau (8:1—9:22)
Eke pe Kʉrai e'to' use'man nɨto' pe te'to' yau (9:23—10:39)
Eke pe kuru apurɨto' esi (11:1—12:29)
Papa pori'mato' (13:1-19)
Uta'koron pe ɨpʉreman nɨto' (13:20-21)
Iu'matʉ main (13:22-25)
1
Imu Eke Inserʉ Amʉ' Entaino
Pena Papa uya utamokori kon amʉ' auro'kapɨ'pɨtʉ'pʉ pu'kena' amʉ' poro tʉron nɨ a'tai'ne, tu'kan winɨ rɨ, e'tane si serɨ ton iu'matʉ weyu ton a'tai'ne uyauro'kasa' iya 'nokon Tʉmu winɨ, tʉnanʉmʉ'pʉ tanporon nɨ anʉnnin pe iye'to' pe, iporo tanporon nɨ mɨ yawɨron kaa'pʉ iya na'ne'. Imu esi te'wei'tɨsen Papa a'kwarii ke, mɨrɨpan esi kʉrɨ rɨ e'to' e' pe kuru rɨ, meruntɨ imaimu erupa' rɨ tanporon nɨ uko'mamʉ miyarɨ. Makoi ekorʉkato' tʉrʉ tʉpo, iyereuta'pʉ Eke emiyatʉ enwo'netʉ winɨ Epʉn po. Mɨrɨpan si ena'pʉ eke pe inserʉ amʉ' entai, tese' tʉnanʉmʉ'pʉ esi eke pe to' ese' entai kasa.
Apʉne pʉra, nai kʉrɨ warai inserʉ pɨ' ken Papa,
“Umu ɨmɨrɨ tikin nan kuru rɨ; serɨ pe ɨkʉipʉnʉ pe enasa',”*
tawon? Mɨrɨ pe pʉra kanan,
“Ikʉipʉnʉ pe e'to' oton,
mɨrɨ awonsi'kɨ umu pe iye'to' oton,”
tawon? Mɨrɨ awonsi'kɨ kanan, tɨmʉrewato' ennoko Papa uya a'tai non pona,
“Tɨwɨ tanporo Papa inserʉʉi ton napurɨpɨtʉi,”
ta'pʉ iya. Inserʉ amʉ' pɨ' tʉusaurokʉ a'tai,
“Uinserʉʉi ton kupʉ uya a'setun pe,
upoitorʉ ton apo' e'werouwerouma pe,”§
ta iya. E'tane si Imu pɨ',
“Papa, ayapon e'to' oton inke rɨ, inke rɨ,
mɨrɨ awonsi'kɨ ipokena' pe e'nɨto' itesa' pe ɨwesi yʉʉi pe.
Ipoken e'nɨto' i'nʉnkasa' auya, ipoken pʉra e'nɨto' ewaruma'tɨsa' auya;
mɨrɨ pe iyesi pɨ', Papa, itese' pɨ' ɨwe'to' uya ɨku'sa' ɨtonpa ton epoi,
ɨmɨrɨ tʉkarapaimai' pori' pe ɨwesi ekamanin pe,”*
ta iya. 10 Tasa' iya rɨ marɨ,
“Itepuru, iyepiya'tɨ yau non apon nonka'pʉ auya,
mɨrɨ awonsi'kɨ ka' esi ɨyemiyatʉ ton tʉrawasooi rʉ'pʉ ton pe.
11 Tʉuma'ta ton nɨ, ɨmɨrɨ moro rɨ;
tanporo pon a'mota kasa ta'mota ton.
12 Pon pʉro'pon e'mepɨtʉ kasa e'mepɨ'to' auya oton;
pon usensima kasa isensimato' oton.
E'tane ɨmɨrɨ moro mɨrɨ kasa rɨ,
ɨukɨɨi'pamʉ pen nɨ,”
ta iya. 13 Nai kʉrɨ warai inserʉ pɨ' ken,
“Ereutakɨ, uyemiyatʉ enwo'netʉ winɨ
ɨyeyaton non tʉrʉ uya pʉ'kʉ pona
a'ta apon pe,”
tawon Papa? 14 Inserʉ amʉ' pen pe' kamoro a'kwarʉ ton e'tʉrawasomai' enno'sa' kon kamo epika'tɨn nɨto' eponin nan apiyo' pe?
* 1:5 Eren 2:7 1:5 2 Sanwerʉ 7:14; 1 Kʉrono'kʉrʉs 17:13 1:6 Isu'taronomi 32:43 (LXX) § 1:7 Eren 104:4 (LXX) * 1:9 Eren 45:6-7 1:12 Eren 102:25-27 (LXX) 1:13 Eren 110:1