3
Njon Mbabtas Biyao Aolom angal bib hobao sao ko hasao o
Mat 3:1-12; Mak 1:1-8; Njo 1:19-28
1 Ngo tomb Orom semon aol wesmbao aondao ora obun imbi Tabiriyas kismil, obum su aondao ngo hambun bor karasmas maoklaopun teb oran maomb bo hasesa. Ngo tomb su ngo baebenon Njuriyan maomb bo haraoklao aol Pondiyas Paler obu sisaol, aol Heror obu su Kalilin maomb bo haraoklao aol sisesa. Ngo tomb Heroron haeme Pilib sisaol, aol ngo obum di su Ituriya hesa Terekonatis kab maomunu maomb bo hasesa. Ngo tomb aol Laseniyas obu di su Abilinin maomb bo haraoklao aol sisesa.
2 Ngo tomb aol Anas hesa Kayapas kab di Nju semon baolum aol wesmbao aondao ora haenbur sisesa. Ngo tomb mbini aol ngo baebenom ngub maomb bo haenbur aol Sekarayan isi Njon obu su tenaol nao biri bor po hasaol, Ngaorom obun angal aol ngo bor eben kisesa.
3 Ngub bisaol obum su Njoran hambun bor pobur kisaon, obum tenaol hambun bor kone baol munubur mbabtas bibaebe kisesa. Inim ngub buklemi tomb khorob bismi sao inin kone bor wiyao o Ngaorom kunaklao ko kao kalisesa.
4 Ngub bisaol angal ngon mbes Ngaoron man mini aol Asayam di mbuk waeb ngub bu wisao.
Su tenaol nao biri bor
Aol mondom angal aondao bu ora mend kobur kakl
Aorao Aondao poklao hareron oborob ora kareyo
Mao dund sa man man bibaebe.
5 Harer mendbor kuwis ha taol ha bi uklao hakl
Taemb soklwaebe.
Su aolu muyae kang sao baeben di
Inim harbor aondao baeben di
Tombo hond ber peb bibaebe.
Harer mendbor kul maongul bi baeben di
Dund mao sa peb bibaebe.
Harer mendbor han biri luklao baeben di
Kobo tuwa peb bu ebe mao saklwaebe.
6 Ngaorom obun sem ngo bu muklbur be ko
Tenaol hambunom hondoklemi ko
Asayam waeb bu wisao ub Njonom kisesa.
7 Ngo tomb tenaol andub ora Njonom mbini mbabtas bin ko obo kiril mbaesmil Njonom mbini bor kakl, Ini suklumb sem o hakl o, Ngaorom ini ko homo ke mao handaklao ub, aem was ini ke ngo nao hondoklemi ko kao njaonaob? kisesa.
8 Wakl kakl, Ngub inj, njem oborob buklesi ub Ngaorom njen kone baol minisi ko henden, inin kone ora bor em we ebe sao por ken haklwaebe kisesa. Ngo tomb Njonom wakl kakl, Nao Eberehem obu Ngaorol hul ha hasao on isi wane ora hayom ol, ebe soklao ko nen nao saboklwaebe. Ngub inj, nim ini bor heneng ora kao njurukl, Ngaorom Eberehemon isi wane haklemi ub hobao sao ora ko hem kokl beyaon, obum han ngo wi o baeben di Eberehemon isi wane ebe mao ingiyakl beyao kisesa.
9 Ngo tomb Njonom ngub kobur kakl, Kuwi kakeb is te bor man man bu pa wisao o bao wiyao ora. Is mendbor il oborob nao saoklao baeben obum bobur is de bor haoruklao kisesa.
10 Njonom ngub kisaol tenaol nda baebenom Njon bor naom kone baol munuklbur asub ora buklmaob ko? ne mismisa.
11 Ngub kismil Njonom mbinin angal ngon ko san ngub lisesa. Ini ngo hayem haklon mondom njen siyor kab wae sin, mende njen tenaol sango siyor nao wi buruklao o bao kalaebe. Nje aol mondom ne kang mend andub sao wae sin, njem di ngub bibi kisesa.
12 Ngo tomb mone takis moroklme aol mendbor Njonom mbini mbabtas bin ko obo hasmi baebenom di Njon bor ne mubur kakl, Aol aondao o, naom kone baol munuklbur asub buklmaob? kismisa.
13 Ngub kismil Njonom mbini bor kakl, Inim mone takis muklemi tomb kabmanom ngub baeben mibaebe ko kao njuklao ub ora mibaebe. Inim mone mendbor baehaemen habarabur nao mibaebe ora kisesa.
14 Ngo tomb mbini mendbor ami aol obo hasmi baebenom di Njon mbabtas biyao aol bor ne mubur kakl, Naom di kone baol munuklbur asub was buklmaob? kismisa. Ngub kismil obum mbini bor kakl, Inim aol mende lu bowes bu mbini maobowa, baehaemen mbinin mone muklbur howes ko ngub nao bibaebe ora. Inin sokl muklemi o makl homo hem was nao lowaebe kisesa.
15 Ngo tomb tenaol ngo hasmi baebenom turi aondao ora homobur, mbinin kone bor aol ngo obu Ngaorom Eben Lao Aol mend oboklao lomao nda ye ko nen sab sab bismisa.
16 Ngub nen sabismil Njon Mbabtas Biyao Aolom mbini bor kakl, Nim ini ibom ora mbabtas biyu o mabor aol hobao sao mend oboklao. Aol ngo obun burim nao buri men mbae ora yao. Ni di kho ora hae ol nim obun aongao su di nao kolakaeb se ora hae kisesa. Ngub kobur kakl, Obum ini obun Wesao Ebe Tangar di is sung kabom ini mbabtas buklao kisesa.
17 Ngub kobur kakl, Obun ki bor ang honde hesa mondolom kab sarbe kobaraoklao is hul mend meneyaom, ang tu honde hesa mondolom kab* sarbe koboklme nda ub obum ang noklme anda bor sarbe maemb kobur, mondolom baeben isaolao nao hindili dao hakol bi bor hi haoruklao kisesa.
18 Ngo tomb Njon Mbabtas Biyao Aolom tenaol ngo hasmi baebenon kone mao komba angal tangar tangar andub ora kao kalobur kisaon, tenaol hambun bor Angal Bib Hobao Sao ngo oborob ora kao dund bisesa.
Njonom Njises mbabtas bisao o
Mat 3:13-17; Mak 1:9-11
Herorom Njon kalabus mao palaesao o
19-20 Ngub bisao o mbinin kabmanon maomb bo haraoklao aol Herorom khorob andub sao was bubur kisaon, obun haemen were ten Heroriyas di obu akl ba habur, aol Heror ngom khorob tangar sao di andub ora bisesa. Ngub bisaol Njon Mbabtas Biyao Aolom aol Heror ngo bor ngub nao bibi ko taolu lisesa. Ngo tomb aol Heror ngom khorob ngub was bu hasao ub khorob aondao bu ora mend di kond ba bubur kisaon, obum Njon Mbabtas Biyao Aol nda di kalabus mao palaesesa.
21-22 Ngo tomb Njonom tenaol hambun mbabtas bisao ub Njises di mbabtas bisesa. Ngub bu peyobur Njisesom Ngaor bor kao kalakl hasaol, yu heben kebe kobabur Ngaoron Wesao obu sao ebeyabukl non bim obobur kisaon, Njises obo men mbaesaol hindismi tomb yu heben bor angal mend obobur kakl, Nje nao Isi ora hael ol, nim njel kone uruklul nao kone bor di turi aondao ora bin hae kisesa.
Njiseson ab sumb wil ngub baeben ha himismi o
Mat 1:1-17
23 Ngo tomb Njises marisao o karasmas supu hor mend hor kabo nanon tobon kab be? menjao pibi hasao tomb Njisesom obun kongon hobao sao bukl ibisao nda ub tibiya bisesa. Ngub bisao o mbini tenaolon kone bor non Njises obu Njosebon isi ora e ko nen sabismisa. Ngo tomb Njoseb obu Hilaen isi sisesa.
24 Hilae obu Mataton isi sisesa.
Matat Libaen isi sisesa.
Libae Melkaen isi sisesa.
Melkae Njanaen isi sisesa.
Njanae Njosebon isi sisesa.
25 Njoseb Matatayason isi sisesa.
Matatayas Emoson isi sisesa.
Emos Neyamon isi sisesa.
Neyam Eslaen isi sisesa.
Eslae Nakaen isi sisesa.
26 Nakae Mayaton isi sisesa.
Mayat Matatayason isi sisesa.
Matatayas Semenon isi sisesa.
Semen Njosekon isi sisesa.
Njosek Njoran isi sisesa.
27 Njora Njonanon isi sisesa.
Njonan Eresan isi sisesa.
Eresa Serababelon isi sisesa.
Serababel Salliyelon isi sisesa.
Salliyel Neraen isi sisesa.
28 Nerae Melkaen isi sisesa.
Melkae Eraen isi sisesa. Erae Kosamon isi sisesa.
Kosam Elmaramon isi sisesa.
Elmaram Eron isi sisesa.
29 Er Njosuwan isi sisesa.
Njosuwa Eliyesan isi sisesa.
Eliyesa Njorimon isi sisesa.
Njorim Mataton isi sisesa.
Matat Libaen isi sisesa.
30 Libae Simiyonon isi sisesa.
Simiyon Njuran isi sisesa.
Njura Njosebon isi sisesa.
Njoseb Njonamon isi sisesa.
Njonam Elayakimon isi sisesa.
31 Elayakim Meliyan isi sisesa.
Meliya Menan isi sisesa.
Mena Matatan isi sisesa.
Matata Netanon isi sisesa.
Netan Debiron isi sisesa.
32 Debir Njesin isi sisesa.
Njesi Oberon isi sisesa.
Ober Bowason isi sisesa.
Bowas Salmonon isi sisesa.
Salmon Nasonon isi sisesa.
33 Nason Aminarabon isi sisesa.
Aminarab Arminon isi sisesa.
Armin Anaen isi sisesa.
Anae Hesronon isi sisesa.
Hesron Pereson isi sisesa.
Peres Njuran isi sisesa.
34 Njura Njekobon isi sisesa.
Njekob Isakon isi sisesa.
Isak Eberehemon isi sisesa.
Eberehem Teran isi sisesa.
Tera Nehoron isi sisesa.
35 Nehor Serukon isi sisesa.
Seruk Ereyun isi sisesa.
Ereyu Pelekon isi sisesa.
Pelek Eberon isi sisesa. Eber Selan isi sisesa.
36 Sela Kenanon isi sisesa.
Kenan Apaksaron isi sisesa.
Apaksar Semon isi sisesa.
Sem Nowan isi sisesa.
Nowa Lamekon isi sisesa.
37 Lamek Metuselan isi sisesa.
Matusela Inokon isi sisesa.
Inok Njereron isi sisesa.
Njerer Mahalalelon isi sisesa.
Mahalalel Kenanon isi sisesa.
38 Kenan Enoson isi sisesa.
Enos Seron isi sisesa.
Ser Aramon isi sisesa.
Aram obu Ngaoron isi sisesa.